އެސްޓީއޯއިން ލޮނުމެދު ވިއްކަނީ މީހަކަށް ގިނަވެގެން ކިލޯއެއްގެ ރޭޓުން

ލޮނުމެދަށް ޑިމާންޑް ބޮޑުވުމުން އެސްޓީއޯއިން ބޮލަކަށް ކިލޯއެއްގެ ރޭޓުން ލޮނުމެދު ވިއްކަން ފަށައިފި އެވެ.

އެސްޓީއޯއިން ބުނީ މީހަކަށް އެންމެ ގިނަވެގެން ކިލޯއެއްގެ ރޭޓުން ލޮނުމެދު ވިއްކާ ގޮތަށް ހަމަޖެއްސީ ބައެއް ކަސްޓަމަރުން މާގިނައިން ލޮނުމެދު ގަންނަމުންދާތީ ކަމަށެވެ. އެ މައްސަލަ ބޮޑުވީ، މިއަދު މެންދުރުފަހު ޓްރޯލީއެއް ފުރެންދެން މީހަކު ލޮނުމެދު ގަނެގެން ދިއުމުންނެވެ. އެއާއެކު އެހެން ބައެއް މީހުން ވެސް ގިނަ އަދަދަކަށް ލޮނުމެދު ގަތެވެ.

އެސްޓީއޯއިން ބުނީ ވަކިވަކި ކަސްޓަމަރުން އާދަޔާ ހިފާލަށް ގިނައިން ލޮނުމެދު ގަންނާތީ ވިއްކާ މިންވަރު ލިމިޓުކުރި ނަމަވެސް، ލޮނުމެދުގެ ސްޓޮކް މަދުނުވާ މިންވަރަށް އެބަހުރި ކަމަށެވެ.

އެސްޓީއޯއިން ލޮނުމެދު ވިއްކަނީ ބާޒާރުގައި ލިބެން ހުރި އަގަށް ވުރެ ގާތްގަނޑަކަށް ދެ ގުނަ ހެޔޮކޮށެވެ. އެ ފިހާރައިން ވިއްކަނީ ކިލޯއެއް 45ރ. އަށެވެ. ބާޒާރުގައި ލޮނުމެދު ވިއްކަން ލިބެން ހުރީ ވެސް ވަރަށް މަދު ފިހާރައަކުންނެވެ. ބާޒާރުގައި ލޮނުމެދު ކިލޯއެއް އުޅެނީ 100ރ. އާއި 120ރ. އާ ދެމެދުގެ އަގެއްގަ އެވެ.

އެސްޓީއޯއިން މި ފަހަރުގެ ރޯދަމަހަށް ހާއްސަކޮށް 24 ބާވަތެއް ބާޒާރަށް ގެނެސް ކޮންޓްރޯލް އަގުތަކެއްގައި އަންނަނީ ވިއްކަމުންނެވެ. އެހެންވެ، ރޯދަމަސް ފެށިއިރު ތަކެތީގެ އަގު ވަނީ އެއް ވަރެއްގައި ހިފެހެއްޓިފަ އެވެ.