ދެ ރަށަކަށް ރޯދަ ހަދިޔާ ހިފައިގެން ދިޔަ ދޯނި ފަރަށް އަރައި ކާޑު ބަސްތާތައް މޫދަށް

ގއ. ނިލަންދު އާއި އެ އަތޮޅު ދާންދުއަށް ރޯދަ ހަދިޔާ ހިފައިގެން ދަތުރުކުރި ދޯންޏެއް މިއަދު ފަރަށް އަރައި، އޭގައި ހުރި ކާޑު ބަސްތާތައް މޫދަށް ވެއްޓިއްޖެ އެވެ.

މި ދެ ރަށުގައި މީހުން ދިރިއުޅޭ ހުރިހާ ގެތަކަކަށް ކާޑު ހަދިޔާކުރީ ލިއޯ ޓްރޭޑިން ކުންފުނިންނެވެ.

އެ އަތޮޅު ކައުންސިލުން ބުނީ ލިއޯ ވިންގު ދޯނީގައި ހުރީ އެ ދެ ރަށުގައި މީހުން ދިރިއުޅޭ ހުރިހާ ގެއަކަށް އެ ކުންފުނީގެ ޗެއާމަން އަބްދުﷲ ސަވާދުގެ ރޯދަ ހަދިޔާ ކަމަށެވެ. ނިލަންދުއަކީ ސަވާދުގެ އުފަން ރަށެވެ.

އެ ދޯނީގައި، ހަކުރާއި ހަނޑުލާއި ފުށުގެ 1،070 އަށްވުރެ ގިނަ ބަސްތާ ހުންނާނެ ކަމަށް ކައުންސިލުން ބުންޏެވެ.

ކައުންސިލުން ބުނީ ދޯނި އެކެފަރު ފަރަށް އެރުމުން އެ ހުރިހާ ކާޑެއް ވަނީ މޫދަށް ވެއްޓިފަ އެވެ.

އެ ކުންފުނިން ވާހަކަ ދެއްކި އޮފިޝަލަކު ވިދާޅުވި ގޮތުގައި ދޯނި ފުންކުރުމުގެ މަސައްކަތް މިހާރު އަންނަނީ ކުރަމުންނެވެ.