އާސެނަލް ބަލިކޮށް ނިއުކާސަލް ފައިނަލާ ގާތަށް

އިނގިރޭސި ލީގު ކަޕުގެ ސެމީ ފައިނަލުގެ ފުރަތަމަ ލެގުގައި އާސެނަލްގެ ދަނޑުގައި އެ ޓީމު އަތުން 2-0 އިން މޮޅުވެ ނިއުކާސަލް ޔުނައިޓެޑުން ފައިނަލާ ފިޔަވަޅަކާ ގާތަށް ޖެހިލައިފި އެވެ.

މާނައަކީ އަންނަ މަހުގެ 5 ވަނަ ދުވަހުގެރޭ ސެއިންޓް ޖޭމްސް ޕާކުގައި ކުޅޭ ދެ ވަނަ ލެގުން 1-0 އިން ބަލިވިޔަސް ނިއުކާސަލް އަށް ފައިނަލުން ފުރުސަތު ލިބުމެވެ.

ނިއުކާސަލް އަށް މިހާތަނަށް ލީގު ކަޕް ކާމިޔާބުކުރެވިފައެއް ނުވެ އެވެ. އަދި 1969 ގެ ފަހުން އަދި ތަށްޓެއްގައި އަތް ލެވޭ ގޮތެއް ނުވެ އެވެ. މިކޭލް އާޓެޓާގެ ކޯޗުކަމުގައި އާސެނަލް އަލުން އިނގިރޭސި ގަދަބާރަކަށް ހަދާފައިވީ ނަމަވެސް އޭނާ އަށް ވެސް ހޯދިފައިވަނީ އެފްއޭ ކަޕް އެކަނި ކަމުން އެ ޓީމަށް ވެސް ތަށްޓެއްގެ މުހިއްމުކަން ވަނީ ބޮޑުވެފަ އެވެ. އެހެންވެ ދެ ޓީމުން ވެސް މެޗަށް ނެރުނީ، އާއްމުކޮށް ކަޕް މުބާރާތްތަކަށް ނެރޭ ވަރަށް ވުރެ ވަރުގަދަ ޓީމެކެވެ.

މި މެޗުގައި ނިއުކާސަލަށް ލީޑު ނަގައިދިނީ މިވަގުތު އިންގްލެންޑުގައި އެންމެ ފޯމުގައި ހުރި ފޯވާޑް އެލެކްސެންޑާ އިސާކެވެ. އޭނާ މި ގޯލް ޖެހީ ފުރަތަމަ ހާފުގެ ފަހުކޮޅު 37 ވަނަ މިނެޓުގަ އެވެ. އަދި އެ ޓީމުގެ ދެ ވަނަ ގޯލް 51 ވަނަ މިނެޓުގައި ޖެހީ އެންތަނީ ގޯޑަން އެވެ.

"މިއީ ވަރަށް ބޮޑު ކާމިޔާބެއް. އެކަމަކު އަދި މިއީ ފުރަތަމަ ހާފު. އެގޮތަށް ވިސްނަން ޖެހޭ. އެންމެ މުހިއްމީ އަނެއް ލެގުގައި ވެސް ނަތީޖާއެއް ނެރުން،" އިސާކް ބުންޏެވެ.

ސްވިޑަންގެ އިސާކް ރޭގެ ގޯލާ އެކު ވަނީ ނިއުކާސަލް އަށް 50 ގޯލު ހަމަކޮށްދީފަ އެވެ. އޭނާ އެ އަދަދަށް ލަނޑު މި ޖެހީ އެ ޓީމުގެ ލެޖެންޑް އެލަން ޝިއެރާ އަށް ވުރެ މަދު މެޗު ކުޅެގެންނެވެ.

މުބާރާތުގެ ދެ ވަނަ ސެމީ ފައިނަލުގެ ލެގުގައި މިރޭ ޓޮޓެންހަމް ހޮޓްސްޕާސް އިން އަމިއްލަ ދަނޑުގައި ލިވަޕޫލާ ދެކޮޅަށް ނުކުންނާނެ އެވެ.