ކާންޔޭ އަންހެނުން އުރާލައިގެން ބޮޑުބެރަށް ނަށަނީ

އާ އަހަރުގެ ފާހަގަކުރަން ރާއްޖެއަށް އައި އެމެރިކާގެ ރެޕް ލަވަކިޔުންތެރިޔާ ކާންޔޭ ވެސްޓް ބޮޑުބެރަށް ނަށާ މަންޒަރު ފެންނަ ވީޑިއޯއެއް ސޯޝަލް މީޑިއާގައި އާންމުވެއްޖެ އެވެ.

ޓިކްޓޮކާއި ޓުވިޓާގައި އެ ވީޑިއޯ ވަނީ ވައިރަލްވެފަ އެވެ.

އެ ވީޑިއޯ އިން ފެންނަ ގޮތުގައި، ރިސޯޓުގައި ގްރޫޕަކުން ބޮޑުބެރު ޝޯއެއް ބާއްވަމުން ދިޔައިރު، ކާންޔޭ ނަށަން ހުރީ އޭނާގެ އަންހެނުން އޮސްޓްރޭލިއާގެ މޮޑެލް ބިޔަންކާ ސެންސޮރީ އުރާލައިގެންނެވެ.

ޝޯޝަލް މީޑިއާގައި މި ވީޑިއޯ އާންމުވުން ބައެއް ދިވެހިންގެ ސަމާލުކަން ވެސް ވަނީ މިކަމަށް ލިބިފަ އެވެ.

"ދުވަހަކު ވެސް ހިޔެއް ނުކުރަން ކާންޔޭ ބޮޑުބެރަށް ނަށާތަން ފެނިދާނެ ކަމަށް،" މީހަކު އެކްސްގައި ބުނެފައިވެ އެވެ.

"ދެން އޮތް އަލްބަމްގައި ބޮޑުބެރުގެ އަޑު އިވޭނެ ކަމަށް ހީކުރަން،" ބައެއް މީހުން ޓިކްޓޮކްގެ ކޮމެންޓުތަކުގައި ބުނެފައިވެ އެވެ.

އެމެރިކާގެ ރިޔަލިޓީ ޓީވީގެ ރާނީ ކިމް ކަޑޭޝިއަންގެ ކުރީގެ ފިރިމީހާ ކާންޔޭ ރާއްޖެ އައީ އާ އަހަރު ފާހަގަކުރުމަށެވެ.

ކާންޔޭގެ ދެމަފިރިން ތިބީ މާލެ އަތޮޅުގައި ހިންގާ ވަން އެންޑް އޮންލީ ރީތި ރަށް ރިސޯޓުގަ އެވެ. އެ ރިސޯޓުގައި އާ އަހަރު ފާހަގަކުރަން މިދިޔަ ބުދަ ދުވަހުގެ ރޭ ކާންޔޭގެ ހާއްސަ ޑީޖޭއެއް ވެސް ބޭއްވި އެވެ. އެ ޝޯގެ ބައެއް ވީޑިއޯތައް ޝޯޝަލް މީޑިއާގައި ވަނީ އާންމުވެފަ އެވެ.

ރާއްޖޭގައި ޗުއްޓީ ހޭދަކުރުމަށް ފަހު ކާންޔޭގެ ދެމަފިރިން ދިޔައީ ދުބާއީ އަށެވެ. ދުބާއީ އަށް ދިޔައީ އޭނާގެ އަންހެނުންގެ އުފަންދުވަސް ފާހަގަކުރުމަށް، މިދިޔަ އާދިއްތަ ދުވަހު އެވެ.