ކާންޔޭ އާ އަހަރު ފެށީ ރާއްޖޭގައި

ދަރިންނަށް ވަގުތު ނުދީ، އެމެރިކާގެ ރެޕް ލަވަކިޔުންތެރިޔާ ކާންޔޭ ވެސްޓް އާ އަހަރު ފާހަގަކުރަން ރާއްޖެ އައުމުން ގިނަ ބައެއްގެ ފާޑުކިޔުން އޭނާ އަށް އަމާޒުވެއްޖެ އެވެ.

ބައެއް ނޫސްތަކުން ރިޕޯޓްކުރި ގޮތުގައި، އެމެރިކާގެ ރިޔަލިޓީ ޓީވީގެ ރާނީ ކިމް ކަޑޭޝިއަންގެ ކުރީގެ ފިރިމީހާ ކާންޔޭ ދަރިންނަށް ވަގުތު ނުދީ، އާ އަހަރު ފާހަގަކުރަން ރާއްޖެ އައުމުން އޭނާގެ ފޭނުން ވަނީ ސޯޝަލް މީޑިއާގައި އެކަމަށް ވަރަށް ބޮޑަށް ފާޑުކިޔައިފަ އެވެ.

ކާންޔޭ ހުރީ މާލެ އަތޮޅުގައި ހިންގާ ވަން އެންޑް އޮންލީ ރީތި ރަށް ރިސޯޓުގަ އެވެ. އެ ރިސޯޓުގައި އާ އަހަރު ފާހަގަކުރަން މިދިޔަ ބުދަ ދުވަހުގެ ރޭ ކާންޔޭގެ ހާއްސަ ޑީޖޭއެއް ވެސް ބޭއްވި އެވެ. އެ ޝޯގެ ބައެއް ވީޑިއޯތައް ޝޯޝަލް މީޑިއާގައި ވަނީ އާންމުވެފަ އެވެ.

އެ ވީޑިއޯތައް ރެޑިޓްގައި ހިއްސާކުރި އޭނާގެ ފޭނަކު ބުނީ ކިމް ކުދިން ގޮވައިގެން މި ޗުއްޓީ ހޭދަކުރާ އިރު، ކާންޔޭ ކުދިންނާ މާ ދުރުގައި، އެ ކުދިންނަށް އެއްވެސް ވަގުތެއް ނުދީ މަޖާކުރަން އުޅުން ކަމުނުދާ ކަމަށެވެ.

"އެ ކުދިންނަށް ހާދަ ދެރައޭ. އެ ކުދިންނަށް ބޭނުންހާ އެއްޗެއް ލިބުނަސް، ކައިރީގައި މައިންބަފައިން ނެތުމަކީ ވަރަށް ބޮޑު އަސަރެއް ހަގީގަތުގައި ކުރާނެ ކަމެއް،" ފޭނަކު ބުންޏެވެ.

"ކުދިން ކައިރިއަށް ނުދެވޭ ކިޔައިގެން ހުރިހާ ސޯޝަލް މީޑިއާ ޕްލެޓްފޯމެއްގައި ރޮވުނު މީހަކު މިހާރު ކުދިންނާ ކައިރިއަށް ވެސް ނުދޭ. ކިހާ ލަދުވެތި ކަމެއް،" އެހެން މީހަކު ބުންޏެވެ.

ކިމްއާ ވަރިވި ފަހުން ކުދިން އޭނާއާ ދުރުކުރި ކަމަށް ބުނެ ކާންޔޭ ވަނީ ސޯޝަލް މީޑިއާގައި މީގެ ކުރިން އެ ވާހަކަ ދައްކައިފަ އެވެ. އެކަމަކު، ކޯޓުން ވަނީ އެ ދެ މީހުންނަށް ވެސް ކުދިން ބެލޭނެ ގޮތަށް ޖޮއިންޓް ކަސްޓަޑީގެ އެއްބަސްވުމެއް ހަދައި ދީފަ އެވެ. ނަމަވެސް، އެ ދެމީހުންގެ ތިބި ހަތަރު ކުދިންގެ ގިނަ ކަންކަން އަދިވެސް ބަލަހައްޓަނީ ކިމް އެވެ.

ކިމް އާއި ކާންޔޭ ވަރިވީ 2022 ވަނަ އަހަރު އެވެ. ކާންޔޭ މިހާރު އުޅެނީ އޮސްޓްރޭލިއާގެ މޮޑެލް ބިޔަންކާ ސެންސޮރީއާ ކައިވެނި ކޮށްގެންނެވެ.