ޓޮމް އާއި ޒެންޑަޔާ އެންގޭޖުވެއްޖެ

އިނގިރޭސި އެކްޓަރު ޓޮމް ހޮލެންޑާއި އެމެރިކާގެ އެކްޓްރެސް ޒެންޑަޔާ އެންގޭޖުވެއްޖެ އެވެ.

އެ ތަރިންނާ ގާތް މީހަކާ ހަވާލާދީ ޓީއެމްޒީން އިއްޔެ ރިޕޯޓްކުރި ގޮތުގައި، ޓޮމް ޒެންޑަޔާއަށް ޕްރޮޕޯސް ކުރީ މިދިޔަ ކްރިސްމަސް އާއި އާ އަހަރާ ދިމާކޮށް ލިބުނު ޗުއްޓީގެ ދުވަސްވަރުގަ އެވެ. ޓޮމް ޒެންޑަޔާއަށް ޕްރޮޕޯސްކުރީ އެމެރިކާގައި ކަމަށް ވެސް އެ ނޫހުގައި ބުނެފައިވެ އެވެ.

އެކަމާ ބެހޭ ގޮތުން އެ ދެތަރިން ވެސް އަދި އެއްވެސް އެއްޗެއް ނުބުނެ އެވެ.

ނަމަވެސް، އިއްޔެ ބޭއްވި ގޯލްޑެން ގްލޯބްސް އެވޯޑުގެ ރެޑްކާޕެޓަށް ޒެންޑަޔާ ދިޔައިރު އޭނާގެ ވާތުގެ ކަށި އިނގިލީގައި ބޮޑު ޖަވާހިރު އަނގޮޓި އޮއްވާ ވަނީ ފެނިފަ އެވެ. އެއީ އޭނާގެ އެންގޭޖުމަންޓް އަނގޮޓި ކަމަށް ޓީއެމްޒީން ބުންޏެވެ.

ޓޮމް އާއި ޒެންޑަޔާގެ އާއިލާއާ ގާތް މީހަކާ ހަވާލާދީ "ލައިފް އެންޑް ސްޓައިލް" މެގަޒިންގައި މިދިޔަ ސެޕްޓެމްބަރު މަހު ރިޕޯޓްކުރި ގޮތުގައި، އެ ދެ ތަރިން މި އަހަރު ކައިވެނިކުރަން ވަނީ ނިންމައިފަ އެވެ. އެ ކައިވެންޏަށް ދެ ފަރާތުގެ އާއިލާއިން ތައްޔާރުވަމުން އަންނަ ކަމަށް ވެސް ބުނެފައިވެ އެވެ.

އެ ދެ ތަރިން ލޯބީ ގޮތުން ގުޅުނީ މާވެލްގެ ސުޕަހީރޯ ފިލްމު "ސްޕައިޑަމޭން"ގައި ކޯ-ސްޓާރުންގެ ގޮތުގައި މަސައްކަތްކުރަން ފެށިތާ ވެސް އެތައް ދުވަހެއްވީ ފަހުންނެވެ. އެ ދެމީހުން ރައްޓެހިވެގެން އުޅޭ ކަމަށް އޭރު އަޑު ފެތުރި ނަމަވެސް، އެކަން ދޮގުކޮށް ބުނަމުން އައީ ދެމީހުންނަކީ ވަރަށް ގާތް ރަށްޓެހިން ކަމަށެވެ.

ޓޮމް އާއި ޒެންޑަޔާ ލޯބީގެ ގޮތުން ގުޅިގެން އުޅޭކަން ކަށަވަރުވީ ޖުލައި 2021 ގަ އެވެ. އޭގެ ފަހުން، ދެމީހުން ވެސް ވަނީ އިންސްޓަގްރާމްގައި އެކަކު އަނެކެއްގެ ލޯބި ޕޯސްޓުތައް ކޮށްފަ އެވެ.

"ސްޕައިޑަމޭން"ގެ ތިން ފިލްމުގައި ވެސް ޓޮމްއާ އެކު ޒެންޑަޔާ މަސައްކަތްކުރި އެވެ.