ފުލުހުން ބުނަނީ ކަސްޓަމްސްގެ އޮފިސަރުންގެ ހިޔާނާތުގެ މައްސަލަ ބަލާތާ ފަސް މަސް ވެއްޖެ ކަމަށް

ކަސްޓަމްސް އޮފިސަރުންތަކެއްގެ އެކައުންޓުން 400 މިލިއަން ރުފިޔާ ދައުރުކުރި ކަމަށް ކުރެވޭ ތުހުމަތުގެ މައްސަލަ ތަހުގީގު ކުރަމުންދާތާ ފަސް މަސް ވެފައިވާ ކަމަށް ފުލުހުން މިއަދު ބުނެފި އެވެ.

އިމްޕޯޓު ޑިއުޓީ އަށް ދައުލަތަށް ފައިސާ ނެގުމުގެ ތެރޭގައި ރިޝްވަތުގެ އަމަލުތަކެއް ހިންގާފައިވާ ކަމަށް ތުހުމަތު ކުރެވޭ ކަންކަމާ ގުޅުން ހުރެގެން ކަސްޓަމްސްގެ އޮފިސަރުންތަކެއްގެ މައްސަލަ ބަލަމުންދާ ކަމަށް ބައެއް މީޑިއާތަކުން ރިޕޯޓްކޮށް އަދި އެ ސުވާލުތައް ކުރުމުން ފުލުހުން ބުނީ، އެފަދަ މައްސަލަތަކެއް ފުލުހުންގެ ސަމާލުކަމަށް އައިސްފައި ވަނީ މިދިޔަ އަހަރުގެ އޮގަސްޓް މަހު ކަމަށެވެ.

"މޯލްޑިވްސް ކަސްޓަމްސް ސާވިސްގެ މުވައްޒަފުންތަކަށް ތުހުމަތު ކުރެވޭ މަނީ ލޯންޑަރިންގެ، ހިޔާނާތް އަދި ރިޝްވަތުގެ މައްސަލައެއް ފުލުހުންގެ ސަމާލުކަމަށް އައުމާ ގުޅިގެން 2024 އޯގަސްޓް 19 ވަނަ ދުވަހު އެ މައްސަލައިގެ ތަހުގީގު ދިވެހި ފުލުހުންގެ ޚިދުމަތުން ވަނީ ފަށާފައި،" ނޫސްވެރިންގެ ސުވާލުތަކާ ގުޅިގެން ފުލުހުން ދިން ޖަވާބުގައި ވެ އެވެ.

ނަމަވެސް، މިހާތަނަށް އެ މައްސަލާގެ ތަހުގީގު ނިންމައި ދައުވާ ކޮށްދޭން އެދި ފޮނުވާފައެއް ނުވެ އެވެ. އަދި އެ ތުހުމަތުތަކާ ގުޅިގެން އެ މުވައްޒަފުންނާ މެދު ކަސްޓަމްސް އިން ފިޔަވަޅު އަޅާފައެއް ވެސް ނުވެ އެވެ.

އެނގިފައިވާ ގޮތުގައި، އިމްޕޯޓު ޑިއުޓީ އަށް ދައުލަތަށް ފައިސާ ނެގުމުގެ ތެރޭގައި ރިޝްވަތުގެ އަމަލުތަކެއް ހިންގާފައިވާ ކަމަށް ތުހުމަތު ކުރެވޭ ކަންކަމާ ގުޅުން ހުރެގެން ކަސްޓަމްސްގެ ތިން އޮފިސަރެއްގެ މައްސަލަ ފުލުހުން މިހާރު އަންނަނީ ބަލަމުންނެވެ.

އެކަމަކު، ރިޝްވަތުގެ މި ތުހުމަތުގައި ކަސްޓަމްސްގެ ވިއްސަކަށް އޮފިސަރުންގެ ޝާމިލްވުން އޮތް ކަމަށް މައުލޫމާތު އެނގޭ އިސްބޭފުޅަކު "މިހާރު" އަށް މިއަދު ކަށަވަރު ކޮށްދެއްވި އެވެ.

އެ މައްސަލަތަކާ ގުޅުން ހުރި ބައެއް ކަންކަން ރައްޔިތުންގެ މަޖިލިހުގެ 241 ކޮމިޓީ އަށް ވެސް ވަނީ ހުށަހަޅައިފަ އެވެ. އަދި ކޮމިޓީގެ ބައްދަލުވުންތައް ސިއްރު ކޮށްގެން، ސަރުކާރުގެ ކަމާ ގުޅުން ހުރި އިދާރާތަކުގެ ބައެއް އިސްވެރިންނާ ކޮމިޓީން ސުވާލު ކޮށްފައިވާ ކަމަށް އެނގިފައި ވެ އެވެ.

ޔުނިފޯމް އެޅި މުއައްސަސާތަކާ މެދު ވެސް އިތުބާރު ކޮށްގެން ބަލަން ތިބެވެން ނެތް ކަމަށާއި 241 ކޮމިޓީން ބަލަމުންދާ މައްސަލަތައް ނިމުމުން، މަސްތުވާތަކެތީގެ މައްސަލަ ފަދަ ކަންކަމުގައި ވެސް ހައްލުތަކެއް ހުށަހަޅުއްވާނެ ކަމަށް ރައްޔިތުންގެ މަޖިލީހުގެ ނައިބު ރައީސް އަހްމަދު ނާޒިމް މިދިޔަ ޑިސެމްބަރު މަހު ވިދާޅުވެފައި ވެ އެވެ.

ރާއްޖެއަށް އެކި ބާވަތުގެ އެއްޗެހި އެތެރެކުރުމުގައި ކަސްޓަމްސްގެ މުވައްޒަފުންގެ އަބަދު ވެސް ތުހުމަތުގެ އިނގިލި ދިއްކުރެ އެވެ.