ސުލްހައިގެ ވާހަކަ ފެށި ކަމަށް ބުނެފައި ޣައްޒާއިން އިއްޔެ 23 މީހަކު ޝަހީދުކޮށްލައިފި

މީގެ 15 މަސް ދުވަސް ކުރިން ފެށިގެން އިޒްރޭލުން ފަލަސްތީނުގެ ޣައްޒާއަށް ދެމުން ގެންދާ ހަމަލާތަކުގައި އިއްޔެ އެކަނިވެސް 23 މީހަކު ޝަހީދުކޮށްލާފައިވާ ކަމަށް، މީހުން ސަލާމަތްކުރުމުގެ މަސައްކަތުގައި އުޅޭ ޓީމުތަކުން ބުނެފި އެވެ.

އިޒްރޭލުން މި ޖަރީމާތައް ހިންގާފައި މި ވަނީ ހަމަލާތައް ހުއްޓާލައި ރަހީނުން މިނިވަންކުރުމާ ބެހޭ ނުސީދާ މަޝްވަރާތައް ގަތަރުގައި މިހާރު ފަށާފައިވާ ކަމަށް އިއުލާނުކުރުމަށް ފަހުގަ އެވެ.

ޣައްޒާގެ އުތުރުގެ ޝައިޚް ރަދުވާން ސަރަހައްދުގެ ގެއަކަށް އާދީއްތަ ދުވަހުގެ ފަތިހު ވައިގެ މަގުން ދިން ހަމަލާއެއްގައި 11 މީހަކު ޝަހީދުވެފައިވާ ކަމަށް ސިވިލް ޑިފެންސް އެޖެންސީގެ ތަރުޖަމާނު މަހްމޫދު ބަސަލް ވިދާޅުވި އެވެ. އޭނާ ވިދާޅުވީ ޝަހީދުވި މީހުންގެ ތެރޭގައި އަންހެނުންނާއި ކުޑަކުދިން ވެސް ހިމެނޭ ކަމަށެވެ.

"އެ ގޭގެ ގާކުނޑިތަކުގެ ދަށުގައި ތާށިވެފައި ތިބި ފަސް މީހަކު ހޯދުމުގެ މަސައްކަތް އަދިވެސް ކުރަމުން އެބަދޭ،" އެ މަސައްކަތް ކުރަނީ އެއްވެސް މެޝިނަރީއެއް ބޭނުން ނުކޮށް އަތުން ކަމަށް އޭނާ ވިދާޅުވި އެވެ.

އިސްރާއީލުގެ އަސްކަރިއްޔާއިން ބުނީ ފާއިތުވި ދެ ދުވަހުގެ ތެރޭގައި ޣައްޒާއަށް 100 އަށްވުރެ ގިނަ "ޓެރަރިސްޓް ޓާގެޓް" ތަކަށް ހަމަލާދީފައިވާ ކަމަށެވެ.

ޣައްޒާގެ ހަމާސް ޖަމާއަތުން ހިންގާ ހެލްތު މިނިސްޓްރީން އިއްޔެ ބުނީ 24 ގަޑިއިރުގެ ތެރޭގައި 88 މީހަކު ޝަހީދުވެފައިވާ ކަމަށެވެ.

އެއް ހަމަލާއެއްގައި ޣައްޒާގެ މެދުތެރޭގައި ހުންނަ ނުސައިރަތު ރެފިއުޖީ ކޭމްޕްގައި ހުންނަ ގެޔަކުން އެއް އާއިލާއެއްގެ ފަސް މީހަކު ވެސް ޝަހީދުވި ކަމަށް، މީހުން ސަލާމަތްކުރުމުގައި އުޅޭ މީހުން ބުންޏެވެ.

މިދިޔަ އަހަރުގެ އޮކްޓޫބަރު މަހުގެ ހަތް ވަނަ ދުވަހު އިޒްރޭލަށް ހަމާސް އިން ދިން ކުއްލި ހަމަލާތަކުގައި ހާހަކަށްވުރެ ގިނަ މީހުން މަރާލައި 250 އަށް ވުރެ ގިނަ މީހުން ރަހީނުކުރުމާ އެކު އިޒްރޭލުން ދޭން ފެށި ހަމަލާތަކުގައި ޣައްޒާއިން މިހާތަނަށް 45،805 މީހަކު ވަނީ ޝަހީދުވެފަ އެވެ.