ޣައްޒާގައި އިތުރު މަރުތަކެއް؛ ޖުމްލަ 45،000 އަށް

އިޒްރޭލުން އިއްޔެ ރޭ ފަލަސްތީނުގެ ޣައްޒާގެ އެކި ހިސާބުތަކަށް ދިން ހަމަލާތަކުގައި މަދުވެގެން 18 މީހަކު ޝަހީދުވެފައިވާ ކަމަށް އެ ތަނުގެ ސިވިލް ޑިފެންސް އެޖެންސީން ބުނެފި އެވެ.

އެ އެޖެންސީގެ ތަރުޖަމާނު މަހްމޫދު ބަސަލް އޭއެފްޕީއަށް ވިދާޅުވީ ރޭގަނޑު 18 މީހެއްގެ ހަށިގަނޑު ފެނުނު ކަމަށެވެ. އޭނާ ވިދާޅުވީ ޣައްޒާގެ އެކި ސަރަހައްދުތަކުގައި މިހާރު ހިނގަމުންދާ ހަމަނުޖެހުންތަކާއި އިޒްރޭލުން ވައިގެ މަގުންނާއި އާޓިލަރީއަށް ދިން ބޮމުގެ ހަމަލާތަކުގައި އިތުރު އެތައް ބަޔަކު ޒަހަމްވެފައިވާ ކަމަށެވެ.

ޝަހީދުވި މީހުންގެ ތެރޭގައި މަދުވެގެން ހަތަރު ކުޑަ ކުދިން ވެސް ހިމެނޭ ކަމަށް އޭނާ ވިދާޅުވި އެވެ.

އޭނާ ވިދާޅުވީ ޣައްޒާގެ މެދުތެރޭގެ ގެއަކަށް އަމާޒުކޮށް ދިން ވައިގެ ހަމަލާއެއްގައި ވެސް ހަތަރު މީހަކު ޝަހީދުވި ކަމަށެވެ.

ޣައްޒާގެ މެދުތެރޭގައި އޮންނަ ދީރް އަލް ބަލާހުގައި ގެދޮރު ގެއްލިފައިވާ އެތައް ބަޔަކު ދިރިއުޅެމުން ދިޔަ ޓެންޓަކަށް އިޒްރޭލުން މިސައިލް ހަމަލާދީ އިތުރު ހަތަރު މީހަކު ޝަހީދުކޮށްލާފައި ވާއިރު އެތަނުން، އަށް މީހަކު ޒަހަމްވި އެވެ.

މިދިޔަ ހޮނިހިރު ދުވަހު ދީރް އަލް ބަލާހްގެ މޭޔަރު ދިއާބް އަލް ޖާރޯ ވެސް ވަނީ ހަމަލާއެއްގައި ޝަހީދުވެފަ އެވެ. އިޒްރޭލުން ބުނަނީ އޭނާ އަކީ ހަމާސްގެ އަސްކަރީ ގޮފީގެ މެންބަރެއް ކަމަށެވެ.

މީގެ އަހަރެއް ކުރިން އިޒްރޭލުން ދެމުން ގެންދާ ހަމަލާތަކުގައި 2.5 މިލިއަން މީހުން ހާލުގައި ޖެހިފައި ވާއިރު މިހާތަނަށް ހަމަލާތަކުގައި ޝަހީދުވި މީހުންގެ އަދަދު އިއްޔެގެ ނިޔަލަށް ވަނީ 44،976 އަށް އަރައިފަ އެވެ. މީގެ ތެރޭގައި ގިނައީ އަންހެނުންނާއި ކުޑަކުދިންނެވެ.