ޣައްޒާގައި 24 ގަޑިއިރު ތެރޭ 77 މީހަކު ޝަހީދުކޮށްލައިފި

ފަލަސްތީނުގެ ޣައްޒާގައި މިދިޔަ 24 ގަޑިއިރު ތެރޭ އިޒްރޭލުގެ ހަމަލާތަކުގައި 77 މީހަކު ޝަހީދުކޮށްލާފައިވާ ކަމަށް ޣައްޒާގައި ހުންނަ ހެލްތު މިނިސްޓްރީން މިއަދު ބުނެފި އެވެ.

މި މަރުތަކާ އެކު މިހާރު ވަނީ އިޒްރޭލުން މީގެ 15 މަސް ދުވަސް ކުރިން ދޭން ފެށި ހަމަލާތަކުގައި ޣައްޒާއިން ޝަހީދުވި މީހުންގެ އަދަދު 45،658 އަށް އަރައިފަ އެވެ. ހެލްތު މިނިސްޓްރީގެ ހިސާބުތަކުން ދައްކާ ގޮތުގައި މި ހަމަލާތަކުގައި މިހާތަނަށް 108،583 މީހަކު ވަނީ ޒަހަމްވެފަ އެވެ.

އިޒްރޭލުން މި ދެތިން ދުވަހު ހަމަލާތައް އަލުން ވަރުގަދަކޮށްފައި ވާއިރު ބުރާސްފަތި ދުވަހުގެ ރޭ ދިން ހަމަލާތަކުގައި ވަނީ ހަމާސްގެ ފުލުހުންގެ ވެރިޔާ މަހްމޫދު ސަލާހް އާއި އޭނާގެ ނައިބުގެ އިތުރުން ވެސް ފުލުހުންގެ އިސް ވެރިންތަކެއް އަވަހާރަކޮށްލައިފަ އެވެ. އެ ބޭފުޅުން އަވަހާރަކޮށްލީ އިޒްރޭލުން ހަމަލާ ނުދޭ، ރައްކާތެރި ހިސާބެއްގެ ގޮތުގައި ކަނޑައަޅާފައިވާ ތަނެއްގައި ހުރި އިމާރާތަކަށް ހަމަލާދީގެންނެވެ.

އެ ރޭގެ ހަމަލާތަކުގައި ވެސް މަދުވެގެން 11 މީހަކު ޝަހީދުވި ކަމަށް ހެލްތު ޣައްޒާގެ ސިވިލް ޑިފެންސް އެޖެންސީން ބުނެފައިވެ އެވެ.

އިޒްރޭލުގެ ހަމަލާތަކުގެ ސަބަބުން ޣައްޒާ އެއްކޮށް ހަލާކުވެފައި ވާއިރު މިހާރު ދަނީ ސަލާމަތުން ހުރި މަދު ހޮސްޕިޓަލްތަކަށާއި އެ ތަންތަނުގެ ވަށައިގެން ވެސް ހަމަލާދީ އަސްކަރީ އޮޕަރޭޝަންތައް ހިންގަމުންނެވެ. އެހެންވެ ހޮސްޕިޓަލްތަކުގައި ފަރުވާ ދެވޭނެ ގޮތެއް ނެތި ވަނީ ހުއްޓުމަކަށް އައިސްފަ އެވެ.

ޣައްޒާއަށް އެހީގެ ސާމާނު ވައްދަން ވެސް އިޒްރޭލުން ހުރަސްއަޅަމުން ދާއިރު ހޮސްޕިޓަލްތައް ހިންގުމަށް ވެސް ދަތިކުރަމުން ދާތީ ޑަބްލިޔުއެޗްއޯ އިން ވެސް ވަނީ ފާޑުކިޔައި ކުށްވެރިކޮށްފަ އެވެ. އަދި މިދިޔަ ހަފްތާގައި ވަނީ ހާލުބޮޑު 55 މީހަކު ޔުނައިޓެޑް އަރަބި އެމިރޭޓްސް އަށް ވެސް ގެންގޮސްފަ އެވެ.