ޣައްޒާގެ ސިއްހީ ހިދުމަތް ހުއްޓެނީ، 55 ބަލިމީހުން ޔޫއޭއީއަށް ގެންގޮސްފި

އިޒްރޭލުން ޣައްޒާގައި ދެމުން ގެންދާ ހަމަލާތަކާ ހެދި ސިއްހީ ހިދުމަތް ދެވޭނެ ގޮތެއް ނެތި، ޣައްޒާގެ ހޮސްޕިޓަލްތަކުން 55 ބަލިމީހަކާއި އެ މީހުންގެ އެހީތެރިންގެ ތެރެއިން 72 މީހަކު ޔުނައިޓެޑް އަރަބި އެމިރޭޓްސް (ޔޫއޭއީ) އަށް ގެންގޮސްދީފައިވާ ކަމަށް ވޯލްޑް ހެލްތު އޯގަނައިޒޭޝަނުން އިއްޔެ ބުނެފި އެވެ.

ޑަބްލިޔުއެޗްއޯ އިން މިކަން އިއުލާނުކޮށްފައި މި ވަނީ އިޒްރޭލުން މީގެ 15 މަސް ދުވަސް ކުރިން ފެށިގެން ޣައްޒާއަށް ހަމަލާ ދެމުން ދާއިރު ހޮސްޕިޓަލްތަކާއި އެ ތަންތަނުގެ ކައިރީގައި ދެމުން ގެންދާ ހަަމަލާތަކާ ހެދި ސިއްހީ ހިދުމަތް އެއްކޮށް ހުއްޓުމަކާ ހިސާބަށް ގޮސްފައިވާ ކަމަށް އދ.ގެ ރިޕޯޓެއްގައި ބުނެފައި ވަނިކޮށެވެ.

"ބަލި މީހުންގެ ތެރޭގައި އޮޓޮއިމިއުން އަދި ލޭގެ ބަލިތަކާއި ކެންސަރާއި ހިތުގެ ބަލިތަކާއި ލޮލާއި ގުނަވަންތަކުގެ މައްސަލަތަކާއި ޓްރޯމާ އިންޖަރީތަކާއި ނިއުރޮލޮޖިކަލް ޑިސްއޯޑާ އަދި ހަމުގެ ބަލިތައް ހުންނަ މީހުން ހިމެނޭ،" ޑަބްލިއުއެޗްއޯއިން ބުންޏެވެ.

އެ ޖަމިއްޔާއިން ބުނީ މި ވަގުތު ވެސް 12،000 އަށް ވުރެ ގިނަ މީހުން ޣައްޒާއިން ބޭރަށް ގެންގޮސް ފަރުވާދޭން ޖެހޭ ހާލަތުގައި އެބަތިބި ކަމަށެވެ.

އދ.ގެ އިންސާނީ ހައްގުތަކާ ބެހޭ އޮފީހުން މި ހަފްތާގައި ނެރުނު ރިޕޯޓެއްގައި ޣައްޒާގެ ސިއްހީ ހިދުމަތްތައް އޮތް ހާލަތު ބަޔާންކޮށް އިޒްރޭލުން ބައިނަލްއަގުވާމީ ގާނޫނުތަކާ ހިލާފްވަމުންދާ މައްސަލަ އަނެއްކާވެސް ފާހަގަކޮށްފައިވެ އެވެ.

އދ.ގެ އިންސާނީ ހައްގުތަކާ ބެހޭ އިދާރާއިން ނެރުނު ބަޔާނެއްގައި ބުނެފައިވަނީ އިސްރާއީލުން ޣައްޒާގެ ހޮސްޕިޓަލްތަކަށާއި އެ ތަންތަނުގެ ކައިރީގައި ދޭ ނުރައްކާތެރި ހަމަލާތަކާއި އެ ކަންކަމާ ގުޅިފައިވާ އަމަލުތަކުގެ ސަބަބުން ސިއްހީ ނިޒާމު އެއްކޮށް ހުއްޓޭ ހިސާބަށް ގޮސްފައިވާ ކަމަށެވެ.

އޮކްޓޫބަރު 7، 2023 އިން ޖޫން 30، 2024 އާ ދެމެދު 27 ހޮސްޕިޓަލަކާއި 12 މެޑިކަލް ފެސިލިޓީއަކަށް، މަދުވެގެން 136 ހަމަލާދީފައިވާ ކަމަށް އެ ރިޕޯޓްގައިވެ އެވެ. އަދި މި ހަމަލާތަކުގައި ޑޮކްޓަރުންނާއި ނަރުހުންނާއި އާންމުންނަށް އަނިޔާވެފައިވާ ކަމަށާއި މަދަނީ އުމްރާނީ ވަސީލަތްތައް މުޅިން ހަލާކު ނުވި ނަމަވެސް ބޮޑެތި ގެއްލުންތަކެއް ލިބިފައިވާ ކަމަށް ވެސް ބުނެފައިވެ އެވެ.

އިޒްރޭލަށް ހަމާސް އިން ދިން ހަމަލާގެ ބަދަލު ހިފަން ކަމަށް ބުނެ ޣައްޒާއަށް ދޭން ފެށި ހަމަލާތަކުގައި މިހާތަނަށް 45،500 އަށް ވުރެ ގިނަ މީހުން ފަލަސްތީނުން ވަނީ ޝަހީދުވެފަ އެވެ. އޭގެ ތެރޭގައި ގިނައީ އާންމުން ކަމަށް އދ. އިން ބުނެ އެވެ.