އިތުރު މުވައްޒަފުން ނެރެ، ވެލާނާ އެއާޕޯޓުގެ ޓްރެފިކް ހަމައަކަށް އަޅުވައިފި

ވިިއްސާރައާއެކު ވެލާނާ އިންޓަނޭޝަނަލް އެއާޕޯޓަށް ބާރުބޮޑުވިއަސް، އިތުރު މުވައްޒަފުން ނެރެގެން ޓްރެފިކް ހަމައަކަށް އަޅުވާފައިވާ ކަމަށް، އެމްއޭސީއެލް އިން މިރޭ ބުނެފި އެވެ.

އެއާޕޯޓަށް މިއަދު ބާރު ބޮޑުވީ ރާއްޖެ އިން އުމްރާ އަށް ދިޔަ ގިނަ ބަޔަކު އެނބުރި އައުމާއި ޗުއްޓީ ނިންމައި ފުރާ މީހުންނާއި އަންނަ މީހުން އެއާޕޯޓުގައި ތާށިވުމުންނެވެ. މިއަދު ހެނދުނުން ފެށިގެން ވާރޭ ވެހި މާލޭގެ މަގުތަކާއި ހުޅުލޭގައި ވެސް ފެންބޮޑުވެފައި އޮތުމުން ދަތުރުފަތުރަށް ވަނީ ހުރަސްއެޅިފަ އެވެ.

އެމްއޭސީއެލްގެ މީޑިއާ އޮފިޝަލަކު ވިދާޅުވީ އެއާޕޯޓުގެ ތޮއްޖެހުން ކުޑަކޮށް، އާއްމުންނަށް ފަސޭހަކޮށްދޭން ގިނަ ފިޔަވަޅުތަކެއް އެޅި ކަމަށެވެ. އޭތެރޭގައި އިތުރު މުވައްޒަފުން ޑިއުޓީއަށް ނެރެ، ފުރާ މީހުންނާއި އެނބުރި އައި މީހުންނަށް އެހީތެރިކަން ފޯރުކޮށްދީފައިވާ ކަމަށް އޭނާ ވިދާޅުވި އެވެ.

އެންމެ ބާރުބޮޑުވި އެއް ގަޑި، ހެނދުނު 6:00 އިން 9:00 އަށް 618 އުމްރާވެރިން ހިމެނޭހެން 2،678 މީހުން ރާއްޖެ އަ އެވެ. އެ ވަގުތުތަކުގައި 1،372 މީހަކު އެއާޕޯޓުން ފުރަން ހަމަޖެހިފައިވާ ކަމަށް އެމްއޭސީއެލް އިން ބުންޏެވެ. ދެން އެންމެ ބާރުބޮޑުވީ މެންދުރުފަހު 2:00 އިން ހަވީރު 4:00 އަށެވެ. އެ ވަގުތުގެ ތެރޭގައި 2،071 މީހުން އެތެރެވި އެވެ. އޭގެ ތެރޭގައި އުމްރާގެ އަޅުކަމުން އައި 452 މީހުން ހިމެނެ އެވެ. އަދި 1،091 ފުރާނެ ކަމަށް ލަފާކޮށްފައިވާތީ، އެމްއޭސީއެލުން ވަނީ އެއާޕޯޓަށް ދަތުރުކުރުމުގައި ސަމާލުވަން އިއްޔެ އެދިފަ އެވެ.

"އުމްރާއިން ރާއްޖެ އައި މީހުން އަނބުރާ ދިއުމުގެ ކަންތައް ހަމަޖެހިއްޖެ. ގެސްޓްހައުސްތަކާއި ރިސޯޓުތަކަށް ފުރާ ޓޫރިސްޓުން މިހާރު ތިބީ،" އެއާޕޯޓުގެ އޮފިޝަލް ވިދާޅުވި އެވެ.

މާލޭގެ މަގުތަކުގައި ފެންބޮޑުވެ، ޓެކްސީތަކަށް ދަތުރުކުރަން އުނދަގޫވުމުން އެމްޓީސީސީގެ ބަސްތަކުގައި އެއާޕޯޓުން މާލެއަށް މީހުން ގެނަ އެވެ.