ބަނދަރުގެ ބޭރުތޮށި ނުލާ އޮތުމުން ނަރުދު އަށް އާދަޔާހިލާފަށް އުދަ އަރައި ބޮޑެތި ގެއްލުންތަކެއް!

މިހާރު ރާއްޖެ އަށް ކުރަމުންދާ ބޯ ވިއްސާރައިގައި ށ. ނަރުދު އަށް އާދަޔާ ހިލާފަށް އަރައި، ރަށުގެ ބޮޑު ބައެއްގައި ފެން ބޮޑުވެ އާންމު ދިރިއުޅުމަށް ބުރޫއަރައިފި އެވެ.

ރޭ ދިޔަވަރު ބޮޑުވި ގަޑީގައި ނަރުދު އަށް ވަރަށް ބޮޑަށް އުދަ އަރާފައިވާއިރު، ފެން ހިނދުމުގެ މަސައްކަތަށް ސިފައިންގެ ޓީމެއް އެ ރަށަށް ގޮސް ޕަންޕް ޖަހައިގެން މަސައްކަތް މިހާރު ވަނީ ފަށައިފަ އެވެ.

ނަރުދޫ ކައުންސިލްގެ ރައީސް މުހައްމަދު މުސްތަރުސިދު ވިދާޅުވީ އުދަ އެރުމުގެ ސަބަބުން ރަށުގެ ވަރަށް ބޮޑު ސަރަހައްދެއްގައި ފެން ބޮޑުވެފައިވާ ކަމަށާއި ގާތްގަނޑަކަށް 12 ވަރަކަށް ގެއަށް ފެން ވަދެފައިވާ ކަމަށެވެ.

ގޭގޭގައި ހުރި ހިފައި ގެންގުޅޭ ތަކެއްޗާއި އެކި ބާވަތްތަކުގެ ގިނަ ގަސްތަކަކަށް ގެންލުންވެފައިވާ ކަަމަށް އޭނާ ވިދާޅުވި އެވެ. އޭގެ ތެރޭގައި ފަތްކެޔޮ ދަނޑުތައް ވެސް ހިމެނޭ ކަމަށް ނަރުދޫ ކައުންސިލްގެ ރައީސް ވިދާޅުވި އެވެ.

"އާންމު ދިރިއުޅުމަށް ވަނީ ބުރޫއަރާފައި، ގޭގޭގެ ގޯތި ތެރޭގައި ވަނީ ފެން ބޮޑުވެފައި، ބަދިގެތަކުގައި ވެސް ވަނީ ފެންބޮޑުވެފައި، ރައްޔިތުންނަށް އެކި ވަރުގެ ގެއްލުންތަކާ ވަނީ ކުރިމަތިލާން ޖެހިފައި،" މުސްތަރުސިދު ވިދާޅުވި އެވެ.

ނަރުދު އަށް މި މޫސުމުގައި ކުރިން ވެސް އުދައިގެ އަސަރު ކުރި ނަމަވެސް، އޭގެ ދެ ގުނައަށް މި ފަހަރު އުދަ އުދަ އަރަމުންދަނީ މުސްތަރުސިދު ވިދާޅުވި ގޮތުގައި، ރަށުގެ އިރުމަތި ފަރާތުގައި އަލަށް ތަރައްގީ ކުރާ ބަނދަރުގެ ބޭރު ތޮށިލާފައި ނުވާތީ އެވެ.

"ބަނދަރުގެ މަޝްރޫއުގެ ދަށުން މިހާތަނަށް ބޭރު ތޮށި ލާފައެއް ނުވޭ. އެހެންވެ އެއްވެސް ރައްކާތެރިކަމެއް ނެތް އެ ސަރަހައްދުގައި، އެ ދިމާލުން ނަގާ ރާޅުތައް އެއްވެސް ހިމާޔަތެއް ނެތި އަންނަނީ ރަށު ތެރެއަށް،" އޭނާ ވިދާޅުވި އެވެ.

ނަރުދޫގެ ކުރީގެ ބަނދަރާއި އެ ބަނދަރުގެ ނެރު ވެސް އޮތީ ބޭނުން ނުކުރެވޭ ވަރަށް ހަލާކުވެފަ އެވެ.

ނަރުދޫ ބަނދަރު ހެދުމުގެ މަޝްރޫއު އެމްޓީސީސީއާ ހަވާލުކޮށްފައިވަނީ 2022 ވަނަ އަހަރު އެވެ. އެއީ 1 އަހަރުން ނިންމަން 44 މިލިއަން ރުފިޔާ އަށް ހަވާލުކުރި މަޝްރޫއެކެވެ. ނަމަވެސް، މިހާތަނަށް ވެސް މަޝްރޫއުގެ މަސައްކަތް އޮތީ ނުނިމި އެވެ.

އިރުވައި މޫސުމުގެ ހަޅަ ޖަހަން ފަށާފައިވާ އިރު، އެއީ އިރުމަތީ ފަރާތުން ގަދަޔަށް ވައި ޖެހުމެވެ. ނަކަތް ބުނާ ގޮތުން ހަޅަ ލައްވާލާނީ މިދިޔަ އަހަރުގެ ޑިސެމްބަރު 23 އިން ފެށިގެން މި ޖެނުއަރީ 18އާ ހަމައަށެވެ. އެއީ ހަޅައަށް ހާއްސަކޮށް ނަން ދީފައިވާ އިރުވައި މޫސުމުގެ ފުރަހަޅަ އާއި އުތުރުހަޅައިގެ ދުވަސްތަކުގަ އެވެ.

ހަޅާގައި ގަދަ ވަޔާ އެކު، ކަނޑު ވެސް ގަދަވެ އެވެ.

މިދިޔަ ޑިސެމްބަރު 23 އިން ފެށިގެން ކުރިއަށް މިދަނީ އިރުވައި މޫސުމުގެ ދެވަނަ ނަކަތް ކަމަށްވާ ފުރަހަޅަ ނަކަތުގެ ދުވަސްތަކެވެ. މި ދުވަސްވަރު އިރު އުތުރުން ބާރަށް ވައިޖެހި، ކަނޑުތައް ގަދަވެ އެވެ. ފުރަހަޅަ ނިމޭނީ އަންނަ އާދިއްތަ ދުވަހު އެވެ.