ރައީސް ބައްލަވަނީ ކޮރަޕްޝަން ހިންގި މީހާއަކަށް ނޫން، އެ ކުރި ކަމަކަށް: އަބްދުއްރަހީމް

ދައުލަތުގެ ތެރޭގައި ހިންގާ ކޮރަޕްޝަންގެ މައްސަލަތައް ތަހުގީގު ކުރުމުގައި ރައީސް ޑރ. މުހައްމަދު މުއިއްޒު ބައްލަވަނީ މީހާ އަށް ނޫން ކަމަށާއި އެ މީހަކު ކުރި ކަމަކަށް ކަމަށާއި ރާއްޖެ މި ހިސާބަށް ދިޔައީ ކޮރަޕްޝަން ހިންގި މީހާ އަށް ބަލައިގެން ފިޔަވަޅު އަޅާތީ ކަމަށް ރައްޔިތުންގެ މަޖިލިހުގެ ރައީސް އަބްދުއްރަހީމް އަބްދުﷲ ރޭ ވިދާޅުވެއްޖެ އެވެ.

ޕީއެސްއެމްގެ "ރާއްޖެ މިއަދު" ޕްރޮގްރާމްގައި އަބްދުއްރަހީމް ވިދާޅުވީ، ކޮރަޕްޝަންގެ މައްސަލަތަކުގައި ފިޔަވަޅު އަޅާއިރު، އެއީ ކުރީ ސަރުކާރުގެ އިސްބޭފުޅެއްތޯ ނުވަތަ އެއީ އެ ވަގުތަކު ވެރިކަމުގައި ހުންނެވި ބޭފުޅެއްގެ އަރިސް މީހެއްތޯ ބަލާކަށް ނުޖެހޭ ކަމަަށެވެ.

"ކަން ކުރި މީހާއަކަށް ނޫން ބަލަންވީ، ކުރި ކަމަށް ބަލަންވީ. އަޅުގަނޑުމެންނަށް ވަރަށް ގިނަ ފަހަރު ވާ ގޮތެއް މިއީ ކަން ކުރި މީހާ އަށް ބަލައިގެން ކަންކަން ބަލަން އުޅުން. އެހެން އުޅެން ހަދައިގެން އަޅުގަނޑު މި ދެންނެވި ގޮތަށް އެ ފައިސާތައް ނުހޯދި މިހާ ގިނަ ދުވަސްވީ،" ކޮރަޕްޝަނާއި އެހެނިހެން ކަންކަމުގެ ތެރޭގައި ދައުލަތުން ގެއްލިފައިވާ ފައިސާތައް ހޯދުމަކީ ރައީސް މުއިއްޒު ވަރަށް އިސްކަން ދެއްވާ ކަމެއް ކަން ފާހަގަކުރައްވަމުން އަބްދުއްރަހީމް ވިދާޅުވި އެވެ.

"ރައީސް ޑރ. މުހައްމަދު މުއިއްޒުގެ އަމާޒަކީ އެކަން ކުރީ ކާކުތޯ ބެލުމެއް ނޫން. އެ ކުރީ ކޮން ކަމެއްތޯ؟ އެކަން ކުރީ ހަމައިންތޯ ނަހަމައިންތޯ ގާނޫނާ އެއްގޮތަށްތޯ ގާނޫނާ ހިލާފަށްތޯ މާލިއްޔަތު ގާނޫނުން އެކަން ކުރަން ތަންދޭތޯ އޭގައި ދައުލަތަށް ގެއްލުން ވަނީ ކިހާވަރެއްތޯ އެ ގެއްލުންވީ ކާކުގެ ސަބަބުންތޯ؟ އެ ހިސާބުން ކާކު މި ތަނަށް މި އަންނަނީ."

ސަރުކާރު ހިންގާ ޕާޓީ ޕީއެންސީގެ ޗެއާޕާސަންގެ މަގާމު ވެސް ފުރުއްވާ އަބްދުއްރަހީމް ވިދާޅުވީ، ކޮރަޕްޝަން ހިންގީ ނުވަތަ ގާނޫނާއި އުސޫލުގެ ބޭރުން ކަންކަން ކުރީ ކާކުކަން އެނގުނަސް ކުށްވެރިވާ މީހަކު ކަނޑައަޅާނީ އިޖުރާއަތުތަކުގެ ތެރެއިން ކަމަށެވެ. އޭނާ ވިދާޅުވި ގޮތުގައި އެ މީހަކަށް ދައުވާ ކުރުމާއި ނުކުރުމުގެ ޒިންމާ އޮތީ ޕްރޮސެކިއުޓާ ޖެނެރަލްގެ އަތްމަތީގަ އެވެ.

"އެކަމަކު އެ މަރުހަލާތައް [ތުހުމަތު ކުރެވޭ މީހުންގެ ތަހުގީގުކޮށް ސުވާލުކުރުން] ހިނގަން އެބަޖެހޭ. މިއަދު މި ކުރަނީ އެ ކަންތައް. ރައީސް ޑރ. މުހައްމަދު މުއިއްޒު ވިދާޅުވި މަގާމު ދެނީ ވައްކަން ކުރާކަށް ނޫނޭ،" އަބްދުއްރަހީމް ވިދާޅުވި އެވެ.

އެ މަނިކުފާނު ވިދާޅުވީ، ގާނޫނުއަސަސީގެ 115 ވަނަ މާއްދާގެ ދަށުން އެކި މަގާމުތަކަށް މީހުން އައްޔަން ކުރައްވަނީ ރައީސުލްޖުމްހޫރިއްޔާގެ މަގާމުގެ މަސްއޫލިއްޔަތު އަދާކުރައްވަން ކަމަށާއި އޭގެ ބޭރުން އެ މީހުން ކަންކަން ކުރާ ނަމަ އެ ކަމެއް ބަލާނެކަން މި ސަރުކާރުން އަންނަނީ ދައްކަމުން ކަމަށެވެ.

އަބްދުއްރަހީމް ވިދާޅުވީ، މީހަކު ކުރި ކުށަކާ ގުޅިގެން އެ މައްސަލަ ތަހުގީގީ އިދާރާތަކުން ބަލަން ފެށުމުން މި ސަރުކާރުން ނުކުމެ އެކަމެއް ނުހުއްޓުވާނެ ކަމަށެވެ.

އެޗްޑީސީގެ ތެރެއިން ދާދި ފަހުން ފެންމަތިވި ކޮރަޕްޝަންގެ ތުހުމަތު ކުރެވޭ މައްސަލަތަކަށް އިޝާރާތް ކުރައްވަމުން އެ މަނިކުފާނު ވިދާޅުވިީ، އެ ކުންފުންޏަށް އޭރުގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު އައްުޔަން ކުރައްވާފައި ހުންނެވީ މިނިސްޓަރުކަމުގެ ފެންވަރުގައި ކަމަށާއި "އެކަމަކު އެ ދާންވީ އެ ގޮތަށް އެ ދަނީ ނޫންތޯ" ކަމަށެވެ.

ގޯތި ހައްގު ނޫން ބަޔަކަށް ގޯތިތަކެއް ދޫކުރި މައްސަލާގައި ފަޒުލް އެޗްޑީސީގެ އެމްޑީކަމުން ސަސްޕެންޑް ކޮށްފައި ވަނިކޮށް އޭނާ ވަނީ އެ މަގާމުން އިސްތިއުފާ ދެއްވައިފަ އެވެ. އަދި ފަޒުލް އަށް ކުރެވޭ ތުހުމަތުތަކާ ގުޅޭ ތަހުގީގެއް ފުލުހުންނާއި އޭސީސީން އަންނަނީ ހިންގަމުންނެވެ.

"އެއީ އަޅުގަނޑު މި ދަންނަވާ ވާހަކައަކީ. ފުރަތަމަ ކުރަންޖެހޭ ކަމަކީ ގާނޫނު ތަންފީޒު ކުރުން. މި ކަންކަމަށް އޮތް ހައްލަކީ ގާނޫނު ތަންފީޒު ކުރުން. އަދި ގާނޫނުގައި މި ކަންކަން ހައްލު ކުރަން އުނދަގޫތަކެއް ހުރިއްޔާ އެ އުނދަގޫތައް ފިލުވައި ދިނުމަކީ އެއީ ރައްޔިތުންގެ މަޖިލިހުގެ ޒިންމާއެއް. އެކަން ކޮށްދޭން އަޅުގަނޑުމެން މި ތިބީ ތައްޔާރަށް،" ރައްޔިތުންގެ މަޖިލިހުގެ ރައީސް ވިދާޅުވި އެވެ.

އެޗްޑީސީގެ އެތެރޭގެ ހިޔާނާތްތަކެއް ފަޅާ އެރުމުން، ރައީސް މުއިއްޒު ވަނީ ސަރުކާރުގެ އެއްވެސް ވެރިއަކު ކޮރަޕްޝަނަށް މަގުފަހިވާ ގޮތަށް އެއްވެސް ކަމެއް ކުރި ކަމުގެ މައުލޫމާތު ލިބިވަޑައިގެންފި ނަމަ ވަގުތުން ފިޔަވަޅު އަޅުއްވާނެ ކަމަށް ވިދާޅުވެ، ސަރުކާރު ހިއްސާވާ ކުންފުނިތަކުގެ ވެރިންނަށް އިންޒާރެއް ދެއްވައިފަ އެވެ.

ސަރުކާރު ހިއްސާވާ ކުންފުނިތަކުގެ ސީއީއޯއިންނާއި މެނޭޖިން ޑިރެކްޓަރުން ތިއްބަވާ ވަޓްސްއެޕް ގުރޫޕްގައި ރައީސް މިދިޔަ ޑިސެމްބަރު 19 ވަނަ ދުވަހުގެ ރޭ ލިޔުއްވި މެސެޖެއްގައި ވިދާޅުވީ، އެއްވެސް ބޭފުޅަކު ގަވާއިދާ ހިލާފަށް، ކޮރަޕްޝަނަށް މަގުފަހިވާ ގޮތަށް ނުވަތަ ބޭއިންސާފުން ކަމެއް މަގުފަހިވާ ގޮތަށް ކަމެއް ކޮށްފައިވާ ކަމުގެ މައުލޫމާތު ލިބިވަޑައިގެންފި ނަމަ އަޅަންޖެހޭ ފިޔަވަޅެއް އަޅުއްވާނެ ކަމަށެވެ.

އޭގެ ފަހުން ވެސް ރައީސް މުއިއްޒު މީޑިއާގައި ވިދާޅުވެފައި ވަނީ ކޮރަޕްޝަން ހިންގައި، ގަވާއިދާ ހިލާފަށް ކުރާ ކަމެއް ހުއްޓުވުމުގައި އެ މަނިކުފާނު ފަހަތަށް ޖެހިވަޑައިނުގަންނަވާނެ ކަމަށެވެ. އެ މަނިކުފާނުގެ ވެރިކަމުގައި މިދިޔަ ދުވަސްތަކުގައި ވެސް ހުންނާނީ އެކި ކަންތަކުގައި، އެކި މީހުން އެގޮތަށް ކޮށްފައި ހުރި ކަންކަމުގެ މައުލޫމާތު ލިބިވަޑައިގަތުމުން އެކަމަށް ފިޔަވަޅު އަޅައި، ކަމާބެހޭ ފަރާތްތަކަށް އަންގާފައި ކަމަށް ރައީސް ވިދާޅުވި އެވެ.

"އަޅުގަނޑު މަގާމުތަކަށް މީހުން ލަނީ ވައްކަންކުރާކަށް ނޫން، ކޮރަޕްޝަން ހިންގާކަށް ނޫން، ގަވާއިދާ ހިލާފު ކަމެއް ކުރާކަށް ވެސް ނޫން. އޭގެ ބަދަލުގައި ތެދުވެރިކަމާއި އަމާނަތްތެރިކަމާ އެކު، ރައްޔިތުންނަށް ހިދުމަތް ދިނުމަށް،" މިދިޔަ ޑިސެމްބަރު 22 ގައި ރައީސް ވިދާޅުވެފައި ވެ އެވެ.

ރައްޔިތުންގެ މަޖިލިހުގެ ރައީސް އަބްދުއްރަހީމް ރޭ ވިދާޅުވީ، ރައީސް މުއިއްޒުގެ މި ވެރިކަމުގެ ފަސް އަހަރު ނިންމަވައިލައްވާނީ ދިވެހިން އެދޭ، "ދިވެހީންގެ ރާއްޖެ" އެއް ބިނާކޮށްދެއްވާފައި ކަމަށެވެ.

ނަމަވެސް ވިދާޅުވީ، ފަސް އަހަރުގެ ތެރޭގައި ހުރިހާ ކަމެއް "ރަނުންރަނަށް" ނުކުރެވި ހިނގައިދާނެ ކަމަށާއި އެކަން ދިވެހިން ގަބޫލުކުރާނެ ކަމަށެވެ.

"އެކަމަކު މީގެ ބޮޑު ބައި އިރާދަކުރެއްވިއްޔާ އެ މަނިކުފާނު ހާސިލް ކޮށްދެއްވާނެ ކަމުގެ ޔަގީންކަން އެބައޮތް،" އަބްދުއްރަހީމް ވިދާޅުވި އެވެ.