އަމިއްލަ އެކަޑަމީގެ ކުޅުންތެރިންނަށް ފުރުސަތު ދިނުމުގައި ފޮރެސްޓް 83 އަހަރު

އަމިއްލަ އެކަޑަމީ އުފައްދާ ކުޅުންތެރިންނަށް ފުރުސަތު ދިނުމުގައި ނޮޓިންހަމް ފޮރެސްޓުން ދަމަހައްޓަމުން އަންނަ 83 އަހަރުވީ ރެކޯޑް ރޭ ވެސް އެ ކްލަބުން ދަމަހައްޓައިފި އެވެ.

އެވަޓަންއާ ދެކޮޅަށް ރޭ ކުޅުނު މެޗަށް ފޮރެސްޓްގެ ކޯޗު ނޫނޯ އެސްޕިރޭޓޯ ސަންޓޯ އެކުލަވާލި ޓީމުގެ ސްކޮޑުން ފުރުސަތު ދިން ޒާކް އެބޮޓްއަކީ އެ ކްލަބްގެ އެކަޑަމީން އުފެއްދި ކުޅުންތެރިޔެކެވެ.

އުމުރުން 18 އަހަރުގެ ޑިފެންޑަރު، ރޭގެ މެޗު ނިމެންދެން ބެންޗުގައި ހުރި ނަމަވެސް، އެ މެޗަކީ ސީނިއާ ޓީމުގެ ސްކޮޑުން އޭނާ އަށް ފުރުސަތު ދިން ފުރަތަމަ މެޗެވެ. ސީނިއާ ޓީމުގެ ސްކޮޑަށް އޭނާ ގެންދަން ނޫނޯ ނިންމީ ރަޔަން ޔޭޓްސް ސަސްޕެންޝަނުގައި ހުރުމުންނެވެ.

ފޮރެސްޓުން، 1941 ގައި ނިންމީ އެ ޓީމުގެ ކޮންމެ މެޗެއްގައި، ކްލަބްގެ އަމިއްލަ އެކަޑަމީން އުފެއްދި ކުޅުންތެރިޔަކަށް ފުރުސަތު ދިނުމަށެވެ. އެ ސާގާފަތް 83 އަހަރަށް ވަނީ ދެމިގެންގޮސްފަ އެވެ.

މިދިޔަ 83 އަހަރުގައި އެ ޓީމުން ކުޅުނު 4،084 މެޗުގައި ވެސް އެ ކްލަބުން ވަނީ ކްލަބްގެ އެކަޑަމީން އުފެއްދި ކުޅުންތެރިންގެ ތެރެއިން މަދުވެގެން އެއް ކުޅުންތެރިޔަކަށް ފުރުސަތު ދީފަ އެވެ.

ވަގުތީ ކޯޗުން ނުލައި 31 ކޯޗުން އެ ކްލަބަށް އެ މުއްދަތުގައި ކޯޗުކޮށް ދިނެވެ. އެކަމަކު ބަދަލުނުވެ އޮތް ސަގާފަތަކީ އަމިއްލަ އެކަޑަމީގެ ކުޅުންތެރިންނަށް ދޭ ފުރުސަތެވެ.

"މިއީ އަމިއްލައަށް އުފެއްދި ލޯކަލް ހުނަރަށް ހިދުމަތް ކުރިކަމުގެ ހެއްކެކެވެ،" އެ ކްލަބްގެ ސަޕޯޓަރުން ހިންގާ ވެބްސައިޓެއްގައި ލިޔެފައި ވެ އެވެ.

ރޭ އެވަޓަންއާ ދެކޮޅަށް ކުޅުނު މެޗު 2-0 ން ކާމިޔާބުކޮށް ފޮރެސްޓުން ވަނީ ޕްރިމިއާ ލީގު ތާވަލުގެ ދެވަނަ އަށް ޖެހިލައިފަ އެވެ.