ޗެލްސީ އަށް ކުރިއެރުމެއް ނައި، ވަނީ ބަލި

ލަންޑަން (ސެޕްޓެމްބަރު 3) - ބަދަލުތަކާ އެކު ވެސް ކުރިއެރުމެއް ނުލިބި ޗެލްސީ ރޭ ނޮޓިންހަމް ފޮރެސްޓް އަތުން 1-0 ން ބަލި ވެއްޖެ އެވެ.

ރޭ ސްޓެމްފޯޑް ބްރިޖްގައި ކުޅުނު މެޗުގައި ފޮރެސްޓްގެ ލަނޑު ޖެހީ އެންތޮނީ އެލަންގާ އެވެ.

ޕްރިމިއާ ލީގުގައި ޗެލްސީ ކުޅުނު ހަތަރު މެޗުގެ ތެރެއިން އެ ޓީމަށް ހޯދުނީ ތިން ޕޮއިންޓެވެ.

މެޗުން ބަލިވިޔަސް، ޗެލްސީގެ ފަރާތުން ރަނގަޅު ކަންތައްތަކެއް ފެނުނުކަން އެ ޓީމުގެ ކޯޗު މައުރީޝިއޯ ޕޮޗެޓިނޯ ފާހަގަ ކުރި އެވެ.

"މި ކަހަލަ މެޗުތަކުގެ ސަބަބުން އަހަރެމެންނަށް އިތުރަށް މެޗޫއާވުމަށް މަގުފަހިވެގެންދާނެ. އެއީ ހަމައެކަނި ކޮލިޓީ އޮތުމެއް ނޫން،" ޕޮޗެޓީނޯ ބުންޏެވެ.

ޗެލްސީގެ މެޗުން ނަތީޖާ ލިބުމުން ހިތްހަމަޖެހިފައި ހުރި ފޮރެސްޓްގެ ކޯޗު ސްޓިވް ކޫޕާ ބުނީ އޭނާގެ ޓީމަށް ނަތީޖާ ހައްގު ކަމަށެވެ.

ކުރިން އާސެނަލް އާއި މެންޗެސްޓާ ޔުނައިޓެޑާ ދެކޮޅަށް ކުޅުނު މެޗުގައި އޭނާގެ ޓީމު ބަލިވީ އެންމެ އިންސާފުވެރި ނިންމުންތަކުން ނޫން ކަމަށް އޭނާ ބުނެ އެވެ.

"މެންޗެސްޓާ ޔުނައިޓެޑްގައި އަހަރެމެންނާ މެދު ކަންތައް ކުރި ގޮތް އަހަންނަށް ފެނުނު. ލީގުގެ ފުރަތަމަ ހަފުތާ ބަންދުގައި އާސެނަލްގެ ވަރުގަދަ ޓީމާ ދެކޮޅަށް ރަނގަޅު ކުޅުމެއް ފެނިގެން ދިޔަ (އެ މެޗުގައި ފޮރެސްޓް ބަލިވީ 2-1 އިން،" ކޫޕާ ބުންޏެވެ.

"މިއަދު [ރޭ] މި ކުޅު ކަހަލަ މެޗަކުން މޮޅުވާން ކުރަން ޖެހޭ ކަންކަން ކުޅުންތެރިން ގަބޫލުކުރަމުން ގެންދިއަ، އެ ކުޅުންތެރިންނަށް ވަރަށް ބޮޑު ކްރެޑިޓެއް ހައްގު. އަހަރެމެން ޕްލޭން ކާމިޔާބު ކުރުމުގައި ކުޅުންތެރިން ބުރަ މަސައްކަތް ކުރި"

ލަންޑަންގެ އަނެއް ޓީމު، ޓޮޓެންހަމް ހޮޓްސްޕާސް ރޭ ވަނީ ބާންލީގެ މައްޗަށް 5-2 ން މޮޅުވި އެވެ.

މެޗުގައި ސަން ހިއުންގް މިން ހެޓްރިކް ހެދި އެވެ. އަނެއް ދެ ލަނޑު ޖެހީ ކްރިސްޓިއަން ރޮމޭރޯ އާއި ޖޭމްސް މެޑިސަން އެވެ. ބާންލީގެ ދެ ލަނޑު ޖެހީ ލައިލް ފޮސްޓާ އާއި ޖޯޝް ބްރައުންހިލް އެވެ.