ފެންބޮޑުވާ މައްސަލަ ހައްލުކުރަން މަޖިދީ މަގުން ބައެއް ބަންދުކޮށްފި

މަޖީދީ މަގުގައި ފެންބޮޑުވާ މައްސަލަ ހައްލުކުރަން އެކި ދުވަސްތަކުގެ މަތިން އެ މަގުގެ ސަރަހައްދުތައް ބަންދު ކުރަން މާލެ ސިޓީ ކައުންސިލް އިން ނިންމައިފި އެވެ.

މިދިޔަ ބުރާސްފަތި ދުވަހު ސިޓީ ކައުންސިލުން ކުރި އިއުލާނެއްގައި ބުނީ މަޖީދީ މަގުގައި ފެން ބޮޑުވާ މައްސަލަ ހައްލު ކުރަން މިއަދުން ފެށިގެން އަންނަ ހަފްތާގެ ހޮނިހިރު ދުވަހުގެ ނިޔަލަށް ޗާންދަނީ މަގާއި ރަށްދެބައި މަގާއި ހަމައަށް ޓްރެފިކް ފްލޯ އަށް ބަދަލުތަކެއް ގެނެސްފައިވާ ކަމަށެވެ.

އެގޮތުން ދަނބުރުމަގުން ނިކަގަސްމަގާ ހަމައަށް މަގު ބަންދު ވާނެ ކަމަށް ކައުންސިލުން ބުންޏެވެ. އެއީ މާލެ ގްރޭންޑް ފްލެޓް ހުންނަ ސަރަހައްދެވެ.

މާލޭގައި ބޯކޮށް ވާރޭ ވެހޭ ދުވަސްތަކުގައި މަޖީދީ މަގުގައި އެންމެ ބޮޑަށް ފެންބޮޑުވާނީ އެ ސަރަހައްދުގަ އެވެ.

ފެންބޮޑުވާ މަގުތައް މަރާމާތު ކުރުމުގެ މަސައްކަތް މާލެ ސިޓީ ކައުންސިލުން ފަށާފައި ވަނީ މިދިޔަ ހަފްތާ ތެރޭގަ އެވެ.