ކުށްވެރިންގެ ސުވަރުގެއަކަށް ރާއްޖެ މިދަނީ ބަދަލުވަމުން: ފަނޑިޔާރު

ޖިނާއީ މައްސަލަތަކުގައި ދައުވާ ކުރުމުގެ މުއްދަތު ގުނުމުގައި، ކުށުގެ ތުހުމަތު ކުރެވޭ މީހުން ސަލާމަތްވާ ގޮތަށް ގާނޫނު މާނަކުރަން ފެށުމުން ކުށްވެރިން ސުވަރުގެއަކަށް ރާއްޖެ ބަދަލުވަމުންދާ ކަމަށް ހައި ކޯޓުގެ ހުކުމެއްގައި އެ ކޯޓުގެ ފަނޑިޔާރަކު މިއަދު ވިދާޅުވެއްޖެ އެވެ.

މަސްތުވާތަކެތީގެ މައްސަލައެއްގެ ތުހުމަތުގައި ހައްޔަރުކުރި މީހަކާއި ވައްކަމުގެ ތުހުމަތެއްގައި ހައްޔަރުކުރި މީހަކަށް ދައުވާކޮށް، ނ. މަނަދޫ ކޯޓަށް ހުށަހެޅުމުން އެ ކޯޓުން ވަނީ ޖިނާއީ އިޖުރައާތުގެ ގާނޫނުގައި ބުނާ ދައުވާ ކުރުމުގެ މުއްދަތު ހަމަވެފައިވާ ކަމަށް ބުނެ އެ ދެ މީހުންގެ މައްސަލަ ބަލައިނުގަތުމަށް ނިންމައިފަ އެވެ. އެއީ ކޯޓުން ބަންދުގެ މުއްދަތު އިތުރު ކޮށްފައި ވަނިކޮށް ފުލުހުން އަމިއްލަ އަށް ދޫކޮށްލި ދެ މީހުންނެވެ.

ޖިނާއީ އިޖުރާއަތުގެ ގާނޫނު ބުނާގޮތުން ކޯޓުން މީހެއްގެ ބަންދު މުއްދަތު އިތުރުކޮށްފައިވާ ނަމަ އެ މީހަކަށް 45 ދުވަސް ތެރޭގައި ދައުވާ ކުރަން ޖެހޭނެ އެވެ. ނަމަވެސް ކޯޓުން ނުވަތަ ފުލުހުން އަމިއްލައަށް ދޫކޮށްލާފައިވާ މީހެއް ނަމަ ދައުވާ ކުރުމަށްޓަކައި 60 ދުވަހުގެ މުއްދަތެއް ލިބޭނެ އެވެ.

އެކަމަކު މަނަދޫ ކޯޓަށް ހުށަހެޅި މައްސަލާގައި ނިންމީ އެ ދެ މީހުން ބަންދުކުރަން ކޯޓުން އަމުރު ކޮށްފައި އޮތުމުން ދައުވާ ކުރަން ޖެހޭނީ 45 ދުވަހުގެ މުއްދަތުގެ ތެރޭގައި ކަމަށެވެ.

އެ މައްސަލަ ދައުލަތުން ހައި ކޯޓުގައި އިސްތިއުނާފްކުރީ އެ ދެ މީހުން ފުލުހުން އަމިއްލަ އަށް ދޫކޮށްލާފައިވާތީ ދައުވާ ކުރުމުގެ މުއްދަތަކީ 60 ދުވަސް ކަމަށް ބުނެ އެވެ. އެ މައްސަލަ ބެއްލެވި ފަނޑިޔާރުންގެ ބެންޗުގައި ހިމެނިވަޑައިގަތް ފަނޑިޔާރު މުހައްމަދު ނިޔާޒްގެ ރައުޔުގައި ވަނީ ގާނޫނު މާނަކުރަން ޖެހޭނީ ކުށުގެ ތުހުމަތު ކުރެވޭ މީހުންގެ މައްޗަށް ޝަރީއަތް ނުކުރެވޭ ގޮތަށް ނޫން ކަމަށެވެ. ދައުވާ ކުރުމުގެ މުއްދަތު ހަމަވާ ގޮތަށް ތަރުޖަމާ ކުރަން ފެށުމުން ކުށްވެރިންގެ ސުވަރުގެއަށް ބަދަލުވަމުންދާ ކަމަށް އެ ރައުޔުގައިވެ އެވެ.

"ތުހުމަތުވާ މީހުންގެ މައްޗަށް ޝަރީއަތް ނުހިންގޭނެ ތަރުޖަމާއެއް ދޭން ފެށުމަކީ މި ގާނޫނު އައުމުގެ ކުރިން އޮތް ހާލަތަށް ވުރެ ގޯސް ހާލަތަކަށް ދިއުމެވެ. ނަތީޖާއަކީ މަޑުމަޑުން ނަމަވެސް ބަލަން ތިއްބާ ކުށްކުރާ މީހުންގެ ސުވަރުގެއަކަށް މި ރާއްޖެ މި ދަނީ ބަދަލުވަމުންނެވެ،" ފަނޑިޔާރު ނިޔާޒް ލިޔުއްވާފައިވެ އެވެ.

ފަނޑިޔާރު ނިޔާޒްގެ ރައުޔުގައިވާ ގޮތުން އޭގެ ތެރެއިން އެއް މައްސަލަ ދަށު ކޯޓުން ބަލައިނުގަތީ މުއްދަތަށް ވުރެ އެއް ދުވަސް ލަސްވި ކަމަށް ބުނެ ކަމަށް ވާއިރު، ވައްކަމުގެ މައްސަލާގައި ގެއްލުނު މުދަލުގެ ވެރިފަރާތުގެ ހައްގުތަކަށް ވެސް ވިސްނުމަކީ ފަނޑިޔާރުން ކުރަން ޖެހޭ ކަމެކެވެ.

އެ މައްސަލާގައި ތުހުމަތުވި ދެ މީހުން ވެސް ބަންދުން ދޫކޮށްލީ ފުލުހުން އަމިއްލައަށް ކަމަށް ވާތީ އެ މީހުންނަށް ދައުވާ ކުރުމަށްޓަކައި 60 ދުވަހުގެ މުއްދަތެއް ލިބޭނެ ކަމަށް ފަނޑިޔާރު ނިޔާޒްގެ ރައުޔުގައިވެ އެވެ. ނަމަވެސް ފަނޑިޔާރު އަބްދުލްމާނިއު ހުސައިންގެ ރައުޔަކީ ދަށު ކޯޓުން ނިންމި ނިންމުން ރަނގަޅު ކަމަށެވެ. އެ މައްސަލާގައި ފަނޑިޔާރު ހަސަން ޝަފީއުގެ ރައުޔަކީ ވެސް އެ މައްސަލާގައި ގާނޫނީ ބަހުސެއް ދައުލަތުން ހުށަހަޅާފައި ނުވާތީ އެ މައްސަލަ ބަލަންޖެހޭ ސަބަބެއް ނެތް ކަމަށެވެ.

އެހެންވެ، ދެ ފަނޑިޔާރުންގެ އަޣުލަބިއްޔަތުން ނިންމެވީ ދަށު ކޯޓުގެ ނިންމުން ރަނގަޅު ކަމަށެވެ.