"ސީރިއާގެ ޖަމާއަތްތަކުން ހަތިޔާރު ބަހައްޓަން އެއްބަސްވެއްޖެ"

ސީރިއާގައި ބައްޝާރުލް އަސަދުގެ ސަރުކާރާ ދެކޮޅަށް ހަތިޔާރު ނަގައި ހަނގުރާމަކުރި ޖަމާއަތްތަކުން އާ ސަރުކާރާ ހަތިޔާރު ހަވާލުކޮށް ޖަމާއަތްތައް އުވާލައި ޑިފެންސް މިނިސްޓްރީގެ ދަށަށް ގެންދިއުމުގެ ޕްލޭނަށް އެއްބަސްވެފައިވާ ކަމަށް އެ ގައުމުގެ އާ ވެރިން ބުނެފި އެވެ.

މިކަމާ ބެހޭ ބައްދަލުވުމުގައި، ސީރިއާގެ އިރުއުތުރުގެ ސަރަހައްދުތައް ކޮންޓްރޯލްކުރާ އެމެރިކާގެ ތާއީދު ލިބިފައިވާ ކުރުދީ ހަނގުރާމަވެރިންގެ މަންދޫބުން ބައިވެރިއެއް ނުވެ އެވެ.

ހަނގުރާމަވެރި ޖަމާއަތްތަކާއި ސީރިއާގެ އާ ލީޑަރު އަހުމަދު އަލް ޝަރާއާ ދެމެދު ބޭއްވި ބައްދަލުވުން ނިމުމަކަށް އައީ "ހުރިހާ ޖަމާއަތްތަކެއް އުވާލައި ޑިފެންސް މިނިސްޓްރީގެ ބެލުމުގެ ދަށުން އެ ޖަމާއަތްތައް ބެލެހެއްޓުމަށް" ކަމަށް ސަނާ ނިއުސް އެޖެންސީ އާއި ކަމާ ބެހޭ އިދާރާތަކުގެ ޓެލެގްރާމް އެކައުންޓުން ނެރުނު ބަޔާނެއްގައި ބުނެފައިވެ އެވެ.

މިކަން ހާމަކޮށްފައި މިވަނީ ޝަރާގެ ހަޔާތު ތަހްރީރު އަލް ޝާމް (އެޗްޓީއެސް) ޖަމާއަތުން އިސްނަގައިގެން ސީރިއާގެ ރައީސް ބައްޝާރުލް އަސަދުގެ ވެރިކަން ވައްޓާލުމުގެ ކާމިޔާބު އޮޕަރޭޝަނަށް ދެ ހަފްތާއެއްހާ ދުވަސް ފަހުންނެވެ.

އަބޫ މުހައްމަދު އަލް ޖީލާނީގެ ނަމުގައި މަޝްހޫރު ވެފައިވާ ޝަރާ އާދީއްތަ ދުވަހު ވިދާޅުވެފައި ވަނީ އާ އިދާރާތަކުން "ދައުލަތުގެ ކޮންޓްރޯލްގެ ބޭރުން އެ ގައުމުގައި ހަތިޔާރު ހުރުމުގެ ފުރުސަތު ނުދޭނެ" ކަމަށެވެ. މި އުސޫލު ކުރުދީ ހަނގުރާމަވެރިންނަށް ވެސް ހިނގާނެ ކަމަށް ޝަރާ ވިދާޅުވި އެވެ.

މިދިޔަ ހަފުތާގައި އެޗްޓީއެސްގެ އަސްކަރީ ވެރިޔާ އޭއެފްޕީއަށް ވިދާޅުވީ އާ ލީޑާޝިޕްގެ ދަށުން، ކުރުދީންގެ ބާރުގެ ދަށުގައި ވާ ސަރަހައްދުތައް ވެސް އެއްބައިކުރުވާނެ ކަމަށާއި "ސީރިއާ ބައިބައި ނުވާނެ" ކަމަށެވެ.

ސީރިއާގައި 13 އަހަރު ވަންދެން ހިނގި ދާޚިލީ ހަނގުރާމައިގެ ސަބަބުން ބައި މިލިއަނަށްވުރެ ގިނަ މީހުން މަރުވެ، ސަރަހައްދީ އަދި ބައިނަލްއަގުވާމީ ބާރުތަކުގެ ތާއީދާ އެކު އެކި ޖަމާއަތްތަކުން ހަތިޔާރުގެ ބޭނުންކޮށް އެކި ސަރަހައްދުތަކުގައި ވަނީ އެ ބައެއްގެ ނުފޫޒު ގަދަކޮށްފަ އެވެ.