ނިހާދުގެ ތުހުމަތު ދޮގުކޮށް ޓޫރިސްޓުންގެ ރައްކާތެރިކަމުގެ ޔަގީންކަން ޕީއެންސީން ދީފި

އިދިކޮޅު ސިޔާސީ ޕާޓީތަކުން މާލެ އަތޮޅުގެ ރިސޯޓުތަކުގައި މުޒާހަރާ ކުރަން ރާވަމުންދާ ކަމަށް، ޓޫރިޒަމް މިނިސްޓްރީގެ ސްޓޭޓް މިނިސްޓަރު މުހައްމަދު ނިހާދު ކުރެއްވި ތުހުމަތުތައް ދޮގުކޮށް، ރާއްޖެއަށް އަންނަ ޓޫރިސްޓުންގެ ސަލާމަތާއި ރައްކާތެރިކަން ކަށަވަރުކޮށްދޭނެ ކަމުގެ ޔަގީން ވެރިކަން ކުރާ ޕާޓީ ޕީއެންސީން މިއަދު ދީފި އެވެ.

މާލޭގައި ޕީއެންސީން ރޭ ބޭއްވި ޖަލްސާގައި އައްޑޫ ފޭދޫ ދާއިރާގެ ކުރީގެ މެމްބަރު ނިހާދު ވަނީ ރާއްޖެ އަށް ދެ މިލިއަން ޓޫރިސްޓުން އައުން ފާހަގަކުރަން ތައްޔާރު ވަމުން އަންނަ މި ދަނޑިވަޅުގައި އިދިކޮޅު އެމްޑީޕީން އިސްނަގައިގެން ޓެރަރިސްޓް ހަމަލައެއް ދޭން އުޅޭ ކަމަށް ވިދާޅުވެ ވާހަކަ ދައްކަވައިފަ އެވެ.

އެ މައްސަލާގައި ޓޫރިޒަމް މިނިސްޓްރީގެ ސްޓޭޓް މިނިސްޓަރުކަމުން ނިހާދު ވަނީ މިއަދުން ފެށިގެން ސަސްޕެންޑް ވެސް ކޮށްފަ އެވެ.

ނިހާދުގެ ތުހުމަތުތައް ދޮގުކޮށް، ޕީއެންސީން މިއަދު ނެރުނު ބަޔާނެއްގައި ބުނީ، ރާއްޖޭގެ ޓޫރިޒަމަށާއި އިގުތިސާދަށް ގެއްލުންވާ ފަދަ އެއްވެސް ކަމެއް ސިޔާސީ ޕާޓީއަކުން ވެސް އަދި މަދަނީ ޖަމިއްޔާއަކުން ވެސް ކުރާނެ ކަމަށް ގަބޫލު ނުކުރާ ކަމަށެވެ.

ނަމަވެސް، ގާނޫނު ހިލާފު އެއްވެސް ކަމެއް ކުރާ ފަރާތަކާ މެދު ފިޔަވަޅު އަޅާނެ ކަމަށް ބަޔާނުގައި ބުންޏެވެ.

"ރާއްޖެ އަށް އަންނަ ޓޫރިސްޓުންގެ ސަލާމަތާއި ރައްކާތެރިކަން ކަށަވަރު ކުރުމަށްޓަކައި ސަރުކާރުން ހުއްޓުމެއް ނެތި މަސައްކަތް ކުރަމުންދާނެ ކަމުގެ ޔަގީންކަން އަރުވަން. އަދި ރާއްޖޭގެ ޓޫރިޒަމްގެ ހުރިހާ ފަރާތްތަކާއި އިންވެސްޓްމަންޓުތައް ހިމާޔަތްކޮށް، ރާއްޖެއަކީ ދުނިޔޭގެ އެންމެ މަގުބޫލު އެއް ޓޫރިސްޓު މަންޒިލްގެ ގޮތުގައި ދެމިއޮތުމަކީ ސަރުކާރުން އެންމެ އިސްކަމެއް ދޭ އެއް ކަންތައް،" ޕީއެންސީން ބުންޏެވެ.

ރާއްޖެއަކީ ޓޫރިސްޓުންނަށް އަމާން އަދި ރައްކާތެރި މަންޒިލެއްގެ ގޮތުގައި ސިޔާސީ ޕާޓީތައް ހިމެނޭ ގޮތަށް ހުރިހާ ފަރާތްތަކުން ދެމުންދާ އެއްބާރުލުން ފާހަގަކޮށް، ޕީއެންސީން ވަނީ ރާއްޖޭގެ ހަމަޖެހުމާއި އިގުތިސާދީ ކުރިއެރުމަށް ހުރަސްއެޅޭނެ ކަމެއް އެއްވެސް ފަރާތަކުން ނުކުރުމަށް އިލްތިމާސްކޮށްފަ އެވެ.

ނިހާދު ދެއްކެވި ވާހަކަތަކާ ގުޅިގެން އެމްޑީޕީން ވެސް ވަނީ ކަންބޮޑުވުން ފާޅުކޮށް މިއަދު ބަޔާނެއް ނެރެފަ އެވެ. އޭނާގެ އެ ވާހަކަތަކާ ގުޅިގެން، ޓޫރިސްޓުންނަށް ހިދުމަތް ދޭ ހުރިހާ ވިޔަފާރިއެއްގެ ސަަލާމަތާއި ރައްކާތެރިކަން ކަށަވަރު ކޮށްދިނުމަށް ކަމާ ގުޅޭ އިދާރާތަކަށް އެމްޑީޕީން ގޮވައިލި އެވެ.