އެޗްޑީސީގެ ބޯޑުގެ ސަސްޕެންޝަން އުވާލައިފި

ބިންވެރިޔާ ސްކީމްގައި ނުހިމެނޭ ބަޔަކަށް ގޯތިތަކެއް ދީފައިވާ މައްސަލަ ފެންމަތިވުމާ އެކު، ފެށި ތަހުގީގާ ގުޅިގެން ސަސްޕެންޑްކުރި އެޗްޑީސީގެ ބޯޑުގެ މެންބަރުންގެ ސަސްޕެންޝަން މިއަދު އުވާލައިފި އެވެ. ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން ބުނިގޮތުގައި އެޗްޑީސީގެ ބޯޑު މެންބަރުންގެ ސަސްޕެންޝަން އުވައިލީ އެ ކުންފުންޏަށް އާ މެނޭޖިން ޑިރެކްޓަރަކު މިދިޔަ އާދިއްތަ ދުވަހު އައްޔަން ކޮށްފައިވާތީ ކަމަށެވެ.

އެޗްޑީސީގެ އާ މެނޭޖިން ޑިރެކްޓަރަކަށް އައްޔަން ކުރީ ހުޅުމާލެ ހިއްކުމާ ހިސާބުން ފެށިގެން އެ ތަން ތަރައްގީ ކުރުމުގައި ގިނަ ދުވަސްތަކެއް ވަންދެން އެންމެ އިސްކޮށް އުޅުއްވި ބޭފުޅުންގެ ތެރޭގައި ހިމެނިވަޑައިގެންނެވި ކުރީގެ ކޮންސްޓްރަކްޝަން މިނިސްޓަރު މައުރޫފް ޖަމީލެވެ.

އެޗްޑީސީގެ ބޯޑުގެ ޗެއާމަން އަހުމަދު ނާސިފް (ޑީޑ) ފިޔަވައި ހުރިހާ މެންބަރުން މިދިޔަ ބުރާސްފަތި ދުވަހު ސަސްޕެންޑް ކުރީ ގޯތިތަކުގެ މައްސަލައިގައި ފުލުހުން ފަށާފައިވާ ތަހުގީގަށް ޖާގަ ދިނުމުގެ ގޮތުން ކަމަށް ޕީސީބީ އިން ބުނެފައިވެ އެވެ.

އެޗްޑީސީގެ ބޯޑުން އޭރުގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު ވެސް ސަސްޕެންޑްކުރި އެވެ. އެކަމަކު، އޭނާ ވަނީ މިދިޔަ ހޮނިހިރު ދުވަހުގެ ރޭ އެ މަގާމުން އިސްތިއުފާ ދެއްވައިފަ އެވެ.

ބޯޑުން ސަސްޕެންޑް ނުކުރާ ހަމައެކަނި މެންބަރު ނާސިފް އައްޔަންކުރީ މިދިޔަ މަހުގެ ހަ ވަނަ ދުވަހު އެވެ. އޭނާގެ އިތުރުން ދެން ބޯޑުގައި ތިއްބަވަނީ؛

▪️ އަޒްހާރު އަބްދުﷲ ސައީދު

▪️ އިބްރާހިމް ޔޫސުފް ފުޅު

▪️ މުހައްމަދު ވިޝާމް

▪️ އުލާ މުހައްމަދު ރަޝީދު

▪️ އާރިފް އަބްދުއްސަމަދު

▪️ މުހައްމަދު ނާޖިލް ▪️ މުހައްމަދު ވަހީދު

▪️ ފާތިމަތު މިޒްނާ އަލީ ▪️ ޔޫސުފް ވަހީދު

ތަހުގީގާ ގުޅިގެން ކުރި ސަސްޕެންޝަން އުވާލި ނަމަވެސް، ބޯޑު މެންބަރުންގެ ޕާސްޕޯޓް އަދިވެސް ވަނީ ހިފަހައްޓައިފަ އެވެ. އެޗްޑީސީއާ ގުޅޭ ގޮތުން ހިންގާ ތަހުގީގާ ގުޅިގެން 20 މީހެއްގެ ޕާސްޕޯޓް ފުލުހުން އެދިގެން ހިފަހައްޓާފައިވެ އެވެ. އަދި ފަޒުލްގެ މެނޭޖުމަންޓުގައި އިސްކޮށް އުޅުނު 15 މީހަކު ވަނީ މިދިޔަ އާދިއްތަ ދުވަހު މަގާމުން ވަކިކޮށްފަ އެވެ.

ބިންވެރިޔާ ސްކީމަށް ޝަރުތު ހަމަނުވާ ލިސްޓުގައި، އެޗްޑީސީގެ ކުރީގެ އެމްޑީ ފަޒުލްގެ ބޭބެ، އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދުގެ ނަން އޮއްވައި އޭނާ އަށް ވަނީ ގޯތީގެ ރެޖިސްޓްރީއެއް ހަދައިފަ އެވެ. އޭނާގެ އިތުރުން އެހެން ބަޔަކަށް ވެސް އެގޮތަށް ރަޖިސްޓްރީ ހަދާފައިވާކަން ވަނީ ފަޅާއަރައިފަ އެވެ. ފަޒުލް ވެސް ވަނީ އެ މަގާމުން ސަސްޕެންޑް ކޮށްފަ އެވެ.