ޕީޖީގެ އަމުރާ އެކު ގޯއްޗާއި ފްލެޓްތަކާ ގުޅޭ އަވަސް ތަހުގީގެއް ފަށައިފި

ބިންވެރިޔާ އަދި ގެދޮރުވެރިޔާ ސްކީމާ ގުޅޭ ޖިނާއީ ތަހުގީގެއް ހިންގަން ޕްރޮސިކިއުޓާ ޖެނެރަލް (ޕީޖީ) އައްބާސް ޝަރީފް ފުލުހުންނަށާއި އެންޓި ކޮރަޕްޝަން ކޮމިޝަން (އޭސީސީ) އަށް ކުރެއްވި އަމުރާ އެއްގޮތަށް އެ ތަހުގީގު ފަށައިފި އެވެ.

އޭސީސީން ދެންމެ ބުނި ގޮތުގައި ޕީޖީ ކުރެއްވި އަމުރާ ގުޅިގެން، އެ ކޮމިޝަނުން ދަނީ ފުލުހުންގެ ހިދުމަތާ އެކު މަޝްވަރާކޮށް، އަވަސް ތަހުގީގެއް ކުރަމުންނެވެ.

ޕީޖީ އޮފީހުން މިއަދު ބުނީ ގެދޮރުވެރިޔާގެ ސްކީމްގެ ފޯމު ބަލައިގަތުމާއި ގޯއްޗާއި ފްލެޓް ލިބޭ މީހުން ކަނޑައެޅުމުގައި އަދި ގޯއްޗާއި ފްލެޓް ދޫކުރުމުގައި ކަނޑައެޅިފައިވާ އުސޫލުތަކާއި ގަވާއިދުތަކާ ހިލާފަށް އަމަލުކޮށްފައިވާ ކަމުގެ ޝަކުވާތައް ލިބިފައިވާ ކަމަށެވެ.

އެއީ އާންމު މަސްލަހަތު މަތީ މިންވަރަކަށް އެކުލެވޭ ކަމަކަށް ވާތީ ފުރިހަމަ ޖިނާއީ ތަހުގީގެއް ހިންގަންޖެހޭ ކަމެއް ކަމަށް ޕީޖީ ދެކެވަޑައިގަންނަވާ ކަމަށް އެ އޮފީހުން ބުންޏެވެ.

އެހެންކަމުން، ގާނޫނުއަސާސީގެ 223 ވަނަ މާއްދާގެ (ޅ) ގެ ދަށުން ޕްރޮސިކިއުޓާ ޖެނެރަލަށް ލިބޭ ބާރުގެ ދަށުން، "ބިންވެރިޔާ" އަދި "ގެދޮރުވެރިޔާ" އާ ގުޅޭ ތަހުގީގެއް ހިންގަން ޕީޖީ އަމުރުކުރެއްވި އެވެ. މިކަމުގައި އެއްވެސް މީހެއްގެ މައްޗަށް ޖިނާއީ ތުހުމަތެއް ކުރެވޭ ނަމަ އެކަން ތަހުގީގު ކުރުމަށް ފަހު، ދައުވާކުރަން ފޮނުވަން ވެސް ޕީޖީ އައްބާސް އަމުރު ކުރެއްވި އެވެ.

ޕީޖީން ވަނީ ތަހުގީގު ހިނގަމުންދާ ގޮތް، ކޮންމެ ހަފުތާއަކު އެއް ފަހަރު ޕްރޮސިކިއުޓާ ޖެނެރަލާ ހިއްސާކޮށް، މި މައްސަލައިގެ އަވަސް ތަހުގީގެއް ހިންގަން ވެސް އަމުރު ކުރައްވައިފަ އެވެ.

މާލޭގެ ރައްޔިތުންނަށް ފްލެޓް ދިނުމަށް ހިންގި ގެދޮރުވެރިޔާ ސްކީމާ ގުޅޭ ތަހުގީގެއް މީގެ ކުރިން ވެސް އޭސީސީން ހިންގި އެވެ. އެ ތަހުގީގަށް ފަހު އޭސީސީން ބުނެފައިވަނީ ފްލެޓް ލިސްޓްގައި ހިމެނޭ މީހުންގެ ތެރެއިން ޝަރުތު ހަމަވަނީ 20 ޕަސެންޓް މީހުންގެ ކަމަށެވެ.

އެހެންވެ، އެ ލިސްޓް ރިވިއު ކުރަން އެ ކޮމިޝަނުން އަންގާފައިވެ އެވެ. އެ މަސައްކަތް ސޯޝަލް ހައުސިންއާ ގުޅޭ ކޮމިޓީން ދަނީ ކުރަމުންނެވެ.

ގެދޮރުވެރިޔާ ސްކީމްއާ ގުޅޭ މައްސަލަތަކެއް ތަހުގީގުކޮށްފައިވީ ނަމަވެސް، މާލޭ ރައްޔިތުންނަށް ގޯތި ދޫކުރި ބިންވެރިޔާ ސްކީމްއާ ގުޅޭ މައްސަލައެއް އޭސީސީން ބަލާފައެއް ނުވެ އެވެ. އެކަމަކު، ޕީޖީގެ އަމުރެއް މި އައީ އެޗްޑީސީގެ މެނޭޖިން ޑިރެކްޓަރު ފަޒުލް ރަޝީދުގެ ބޭބެ މުހައްމަދު ފަޒީލް ރަޝީދުގެ ގޯތީގެ ރަޖިސްޓްރީގައި ނެތި އޭނާއަށް ގޯއްޗެއްގެ ހުއްދަ ދޫކޮށްފައިވާ މައްސަލައެއް ފެންމަތިވެ، ގޯތިތަކުގެ މައްސަލަ ވަރަށް ބޮޑުވުމުންނެވެ.

އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރުގެ މަގާމު ވެސް ފުރުއްވާ ފަޒީލަކީ ހުޅުމާލެ އިން ގޯތި ލިބޭ މީހުންގެ ލިސްޓުގައި ކުރިން ހިމެނިފައި ނެތް އަދި ގޯއްޗަށް ޝަރުތު ހަމަވާ މީހެއް ނޫން ކަމަށް އޮތީ ކަނޑައަޅައިފަ އެވެ. އެކަމަކު އޭނާ އަށް ގޯތި ލިބިފައިވާ ކަމަށް ބުނާ ރަޖިސްޓްރީއާ އެކު، އެ ބިމުގެ ވަށާފާރު ރޭނުމުގެ ހުއްދައަކަށް އެޗްޑީސީގައި އޭނާ އެދުނީ އެވެ.

ފަޒީލް އެ ހުއްދަ އަށް އެދުނީ ޖޫން 30، 2024 ގަ އެވެ. އެހެންވެ، އެޗްޑީސީން އަމަލުކުރާ އުސޫލުން އެ ގޯތީގެ ރެޖިސްޓްރީ ވެރިފައި ކުރުމަށް ހައުސިން މިނިސްޓްރީ އަށް ފޮނުވި އެވެ. އިތުރު މީހަކު ވެސް ގޯތީގެ ވަށާފާރު ރޭނުމުގެ ހުއްދައަށް އެދިފައި އޮތުމުން އެ ވެސް ހައުސިން މިނިސްޓްރީ މެދުވެރިކޮށް އެކަން ސާފުކުރަން ފޮނުވި އެވެ.

ފަޒީލްގެ އިތުރުން ދެން ހުއްދައަށް އެދިފައި އޮތީ އަބްދުލްމަޖީދު މާހިރު ކިޔާ މީހެކެވެ. ބިންވެރިޔާ ސްކީމުން ގޯތި ލިބެނީ މާލޭ މީހުންނަށް ކަމަށް ވިޔަސް އެއީ ހއ. ދިއްދޫގައި ރަޖިސްޓަރީ އޮތް މީހެކެވެ.

ހައުސިން މިނިސްޓްރީން މި އަހަރުގެ އޯގަސްޓް 15 ގައި އެޗްޑީސީގެ ސިޓީއަށް ދިން ޖަވާބުގައި އޮތީ އެއީ ބިންވެރިޔާ ލިސްޓުގައި ހިމެނޭ ބައެއް ނޫން ކަމަށާއި އެ ދެ ގޯއްޗަކީ އެއްވެސް މީހަކަށް ދީފައި އޮތް ދެ ގޯތި ނޫން ކަމަށެވެ.

ހައުސިން މިނިސްޓްރީން އެ ޖަވާބު ދިންތާ ފަސް މަސް ފަހުން އިއްޔެ އެ ލިޔުންތައް ސޯޝަލް މީޑިއާގައި އާންމުވެ، ޝަކުވާ ބޮޑުވުމުން ފުލުހުން ވަނީ އެ މައްސަލަ ތަހުގީގު ކުރަން ފަށައިފަ އެވެ. ތަހުގީގާ ގުޅިގެން އެޗްޑީސީގެ މެނޭޖިން ޑިރެކްޓަރު ފަޒުލް އާއި ބޯޑު އެއްކޮށް މިއަދު ވަނީ ސަސްޕެންޑް ވެސް ކޮށްފަ އެވެ. ބޯޑުން ސަސްޕެންޑް ނުކުރަނީ މިދިޔަ މަހުގެ ހަ ވަނަ ދުވަހު އެޗްޑީސީގެ ޗެއާމަނަކަށް ހަމަޖެއްސި އަހުމަދު ނާސިފް (ޑީޑީ) އެކަންޏެވެ.

ފަޒުލްގެ ބޭބެ ފަޒީލް ވެސް މިއަދުން ފެށިގެން ވަނީ އެމްޑަބްލިއުއެސްސީގެ ޑީއެމްޑީގެ މަގާމުން ސަސްޕެންޑުކޮށްފަ އެވެ. އެއީ އޭނާ އަށް ތުހުމަތުވާ ފޯޖަރީގެ މައްސަލަ ތަހުގީގު ކުރާތީ އެޅި ފިޔަވަޅެކެވެ.

އެ ތަހުގީގު ފެށިއިރު، މައްސަލަ ބޮޑުވެފައިވާ ގޯތީގެ ވަށާފާރު ހުރީ ރާނަން ފަށައިފަ އެވެ. ގާތްގަނޑަކަށް ހަތަރު ފޫޓެއްހާ އުސްމިނަށް ވަނީ ވަށައިގެން ފާރު ރާނައިފަ އެވެ. އެ މަސައްކަތް ކޮށްފައި ވަނީ ވަރަށް ފަހުންކަން އެނގެ އެވެ. ރޭނުމަށް ބޭނުންވާ ބައެއް ސާމާނު ވެސް ގޯތިތެރޭގައި އެބަހުއްޓެވެ.