ފުލުހުންގެ ޕްރޮމޯޝަންގެ މައްސަލާގައި ޕީޖީގެ ލަފާ ހޯދޭނެ، އެކަން ދިފާއު ނުކުރާތީ ކަންބޮޑުވޭ: ހަމީދު

ފުލުހުންގެ ޕްރޮމޯޝަންތައް މަޑުޖައްސާލަން އެންޓި ކޮރަޕްޝަން ކޮމިޝަން (އޭސީސީ) އިން އެންގި އެންގުމަށް އަމަލު ނުކުރަން ފުލުހުން ނިންމުމުގައި ޕްރޮސެކިއުޓާ ޖެނެރަލް (ޕީޖީ) އޮފީހުގެ ލަފާ ހޯދޭނެ ކަމަށާއި އަދި އެކަން ދައުލަތުން ހައި ކޯޓުގައި ތަފްސީލްކޮށް ނުދިނުމުން ކުރީގެ ކޮމިޝަނާ އޮފް ޕޮލިސް މުހައްމަދު ހަމީދު މިއަދު ކަންބޮޑުވުން ފާޅު ކުރައްވައިފި އެވެ.

ފުލުހުންނަށް ޕްރޮމޯޝަން ދިނުން މަޑުޖައްސާލަން މިދިޔަ އަހަރުގެ ނޮވެމްބަރު މަހު އެންޓި ކޮރަޕްޝަން ކޮމިޝަން (އޭސީސީ) އިން އެންގި އެންގުމަށް ފުލުހުން ތަބާނުވުމުން އެ މައްސަލަ އެ ކޮމިޝަނުން އޮތީ ސިވިލް ކޯޓަށް ހުށަހަޅައިފަ އެވެ. އަދި އެ މައްސަލަ ނިމެންދެން ޕްރޮމޯޝަންތައް މަޑުޖައްސާލުމުގެ އަމުރަކަށް އޭސީސީން އެދުމުން ސިވިލް ކޯޓުން ނިންމީ އެފަދަ އަމުރެއް ނެރެދެވެން ނެތް ކަމަށެވެ. އެހެންވެ، އެ މައްސަލަ އޭސީސީން އޮތީ ހައި ކޯޓުގައި އިސްތިއުނާފްކޮށްފަ އެވެ.

ހައި ކޯޓުގައި ބުދަ ދުވަހު ބޭއްވި އަޑުއެހުމުގައި އެޓާނީ ޖެނެރަލްގެ އޮފީހުގެ ވަކީލް ވިދާޅުވީ އޭސީސީގެ އެންގުމަށް ތަބާނުވާން ފުލުހުން ނިންމީ ޕްރޮސެކިއުޓާ ޖެނެރަލްގެ އޮފީހުން ދިން ލަފައަކަށް ބިނާކޮށް ކަމަށެވެ.

ފުލުހުންގެ އިދާރީ ކަންކަމުގައި ގާނޫނީ ލަފާ ދިނުމާއި ކޯޓުތަކުގައި ފުލުހުން ތަމްސީލު ކުރުމުގެ ބާރު އޮންނަނީ އޭޖީ އޮފީހުން ކަމަށް ވާއިރު، ޕްރޮސެކިއުޓާ ޖެނެރަލްގެ އޮފީހުގެ ގާނޫނީ ލަފާ ހޯދީ ކީއްވެގެންތޯ ފަނޑިޔާރުން ބެންޗުން ސުވާލު ކުރެއްވި އެވެ. ޖަވާބުގައި ވަކީލް ވިދާޅުވީ އޭގެ ސަބަބެއް މިވަގުތު ސާފުނުވާ ކަމަށެވެ.

އެކަމާ ގުޅޭގޮތުން އޭރުގެ ޕޮލިސް ކޮމިޝަނަރު ހަމީދު އެކްސްގައި މިއަދު ކުރެއްވި ޕޯސްޓެއްގައި ވިދާޅުވީ އެ މައްސަލާގައި ޕްރޮސެކިއުޓާ ޖެނެރަލްގެ ގާނޫނީ ލަފާ ފުލުހުން ހޯދި ސަބަބު ދައުލަތުން ކޯޓުގައި ދިފާއުކޮށްދޭން ޖެހޭނެ ކަމަށެވެ. އާންމު ގޮތެއްގައި ފުލުހުން މިފަދަ ކަންކަމުގައި ގާނޫނީ ލަފައަކަށް އެދެނީ އެޓާނީ ޖެނެރަލްގެ ފަރާތުން ކަމަށް ވިޔަސް، މި މައްސަލާގައި އޭސީސީގެ އެންގުމުގެ ގާނޫނީ ހައިސިއްޔަތާ ގުޅޭގޮތުން ޕްރޮސެކިއުޓާ ޖެނެރަލްގެ ލަފާ ހޯއްދަވާފައިވާނެ ކަމަށް އޭނާ ވިދާޅުވި އެވެ.

"މި ނިންމުމަކީ ގާނޫނުއަސާސީގެ 223 ވަނަ މާއްދާއާ އެއްގޮތްވާ ގޮތުގެ މަތިން ނިންމާފައިވާ ނިންމުމެއް. އެ މާއްދާގައި ވަނީ ޖިނާއީ ތަހުގީގުތަކާ ގުޅޭ ގޮތުން ތަހުގީގީ އިދާރާތަކުގެ މަސައްކަތްތައް ބެލުމާއި ވިލަރެސް ކުރުމުގެ ބާރު ޕްރޮސެކިއުޓާ ޖެނެރަލަށް ލިބިދީފައިވޭ. ގާނޫނުއަސާސީގެ މި މެންޑޭޓަށް ބަލާއިރު، ޕްރޮސެކިއުޓާ ޖެނެރަލްގެ އޮފީހުން މި މައްސަލައިގައި ލަފާ ދިނުމަކީ އެ އޮފީހުގެ ބާރުގެ ތެރޭގައި ހިމެނޭ ކަމެއް،" ހަމީދު ވިދާޅުވި އެވެ.

ހަމީދު ވިދާޅުވީ އެ ލަފާގެ ސާފު ރެކޯޑެއް އޮންނަންވާނެ ކަމަށާއި އަދި ދައުލަތުގެ ފަރާތުން މި ރެކޯޑު ކޯޓަށް ހުށަހެޅިދާނެ ކަމަށެވެ.

ޝަރީއަތުގެ މަރުހަލާގައި ދައުލަތުން މި ނުކުތާތައް އެކަށީގެންވާ ގޮތެއްގައި ސާފުކޮށް ބަޔާންކޮށްދީފައި ނުވާތީ ކންބޮޑުވާ ކަމަށާއި އަދިއެކަމުން ދައުލަތުގެ ދިފާއުގެ ސާފުކަމާ މެދު ސުވާލު އުފެދޭ ކަމަށް ހަމީދު ވިދާޅުވި އެވެ.

"މި މައްސަލާގެ ފެކްސްތައް ވަރަށް ސާފު. އަދި މި ފެކްސްތައް ކޯޓަށް ހުށަހެޅުމުގައި ހާމަކަން ބޮޑު ގޮތެއްގައި އަމަލުކުރުމަކީ ވަރަށް މުހިންމު ކަމެއް،" ހަމީދު ވިދާޅުވި އެވެ.

ދައުލަތުން ކޯޓުގައި ބުނިގޮތުގައި ކަންކަން ހުއްޓުވުމުގެ ބާރު އޭސީސީގެ ގާނޫނުގައި އެ ކޮމިޝަނަށް ދީފައި ނެތެވެ. އަދި ބޯޑާ ކޮންޓްރޯލް ސިސްޓަމްގެ މައްސަލާގައި 2012 ވަނަ އަހަރު ސުޕްރީމް ކޯޓުން ނިންމި މައްސަލާގައި ވެސް އެގޮތަށް ކަނޑައަޅާފައިވާތީ އެ ބާރު އެ ކޮމިޝަނަށް ނެތްކަން ސާފުވާ ކަމަށް ދައުލަތުން ބުންޏެވެ.

ރައްދުގައި އޭސީސީގެ ވަކީލުން ބުނެފައިވަނީ ތަހުގީގުތަކާ ގުޅިގެން އަޅަންޖެހޭ ފިޔަވަޅުތައް އެޅުމުގެ އެހެނިހެން ބާރުތައް އެ ކޮމިޝަނަށް ލިބިގެންވާ ކަމަށް އެ ކޮމިޝަންގެ ގާނޫނުގައި ބުނެފައިވާތީ ކަންކަން ހުއްޓުވުމުގެ ބާރު އެ ކޮމިޝަނަށް ލިބޭ ކަމަށް ބަލަންޖެހޭ ކަމަށެވެ.

އެހެންވެ، ޕްރޮމޯޝަންތައް މަޑުޖައްސާލައިފިނަމަ ފުލުހުންނަށް ލިބޭނެ ގެއްލުމަށް ވުރެ ޕްރޮމޯޝަންތައް ދިނުމުން ދައުލަތަށް ލިބޭނެ މާލީ ގެއްލުން މާ ބޮޑު ކަމަށް ބުންޏެވެ. އަދި އެކަން ހުއްޓުވަން އަމުރެއް ނެރެ ނުދީފިނަމަ އޭސީސީގެ ނިންމުންތަކަށް ތަބާނުވުމަކީ އާންމު ކަމަކަށް ވެގެން ދާނެ ކަމަށް ވެސް އޭސީސީން ބުންޏެވެ.