ޗާގޯސް މޮރިޝަސްއާ ހަވާލުކުރާނެ ކަމާ މެދު އަނެއްކާ ސުވާލު އުފެދިއްޖެ

ސްޓްރެޓެޖިކް ގޮތުން މުހިންމު ޗާގޯސްގެ ރަށްތައް އިސްތިއުމާރުކުރި އިނގިރޭސި ވިލާތުން އެ ރަށްތައް މޮރިޝަސްއާ ހަވާލުކުރަން ނިންމިކަން އިއުލާނުކޮށްފައި ވަނިކޮށް މޮރިޝަސްގެ ވެރިކަން ބަދަލުވެ އާ ބޮޑުވަޒީރަކު ވަޑައިގެން ފަހު ވަގުތު އާ ޝަރުތުތަކެއް ހުށަހަޅުއްވައިފި އެވެ.

ރަށްތައް ހަވާލުކުރުމުގެ ތާރީހީ ނިންމުމާ މެދު މިކަމުގެ ސަބަބުން ވަނީ ސުވާލު އުފެދިފަ އެވެ.

އެތައް ޒަމާނެއް ވަންދެން ކުރި މަޝްވަރާތަކަށްފަހު އިނގިރޭސިވިލާތުން މިދިޔަ އޮކްޓޫބަރު މަހު އެއްބަސްވީ ޗާގޯސްގެ ރަށްތައް ކުރީގެ ކޮލޮނީއެއް ކަމަށްވާ މޮރިޝަސްއާ ހަވާލުކުރާށެވެ. އަދި އެ އަތޮޅުގެ އެންމެ ބޮޑު ރަށް ކަމަށްވާ ޑިއޭގޯ ގާސިއާގައި ހިންގާ އެމެރިކާގެ އަސްކަރީ މަރުކަޒު ބެހެއްޓޭނެ ކަމަށް އޮތީ އިގުރާރު ވެފަ އެވެ.

ނަމަވެސް މޮރިޝަސްގެ ބޮޑުވަޒީރު ނަވީން ރަމްގޫލަމް މިދިޔަ މަހު ވެރިކަމާ ހަވާލުވެވަޑައިގަތުމަށް ފަހު، އެ އެއްބަސްވުމާ މެދު ޝައްކު އުފެދޭ ކަމަށާއި އެއްބަސްވުން އަދިވެސް ފައިނަލް ނުވާ ކަމަށް ވަނީ ވިދާޅުވެފަ އެވެ.

މޮރިޝަސް އިން "އިނގިރޭސިވިލާތާ އެކު އެއްބަސްވުމެއް ހަދަން ތައްޔާރަށް އޮތް އިރު، އާންމު އިންތިހާބަށް ފަހު އަޅުގަނޑުމެންނަށް ދެއްކި ޑްރާފްޓް އެގްރީމެންޓަކީ، އަޅުގަނޑުމެންގެ ނަޒަރުގައި، މިފަދަ އެއްބަސްވުމަކުން އުއްމީދު ކުރެވޭނެ މަންފާއެއް ގައުމަށް ނުލިބޭނެ އެއްބަސްވުމެއް،" ގާނޫނު ހަދާ މަޖިލީހުގައި ރަމްގޫލަމް ވިދާޅުވި އެވެ.

ކައުންޓަ ހުށަހެޅުންތަކުގެ ތަފްސީލު ނުދިން ނަމަވެސް އިނގިރޭސިވިލާތުން މި ހަފުތާގެ ކުރީކޮޅު ވެސް ޖަވާބެއް ދީފައިވާ ކަމަށްވެ އެވެ.

އިނގިރޭސި ބޮޑުވަޒީރުގެ ތަރުޖަމާނު ވިދާޅުވީ އެއްބަސްވުމަކީ ދެ ފަރާތުގެ މަސްލަހަތު ހިމެނޭ އެއްބަސްވުމެއްކަން ސަރުކާރަށް ޔަގީންވާ ކަމަށާއި އާ ސަރުކާރާ އެކު އެކަން ފައިނަލް ކުރުމުގެ މަސައްކަތް ކުރަމުން އަންނަ ކަމަށެވެ.

އަދި އިނގިރޭސިވިލާތުގެ ޚާރިޖީ ވުޒާރާގެ ވަޒީރު ސްޓެފަން ޑޯޓީ ވަނީ މި އެއްބަސްވުމާ ގުޅިގެން ވޮޝިންޓަނުން ވަރަށް ބޮޑަށް ނުތަނަވަސްކަން އުފެދިފައިވާ ކަމަށް އިނގިރޭސިވިލާތުގެ ރިފޯމް ލީޑަރު ނައިޖެލް ފަރާޖް ދެއްކެވި ވާހަކަތައް ދޮގުކުރައްވާފައެވެ.

ޗާގޯސްގެ ރަށްތައް މޮރިޝަސްއާ ވަކިކޮށް، އަސްކަރީ މަރުކަޒެއް ގާއިމުކުރުމަށް އިނގިރޭސިވިލާތުން ނިންމީ 1965 ވަނަ އަހަރުއެވެ.