އޮސްކާއަށް ކުރި އުއްމީދު "ލާޕަތާ ލޭޑީސް"އަށް ނާކާމިޔާބުވެއްޖެ

އިންޑިއާ އިން އަންނަ އަހަރުގެ އޮސްކާ އެވޯޑަށް ރަސްމީކޮށް ހުށަހެޅި ފިލްމު "ލާޕަތާ ލޭޑީސް"އަށް އެ އެވޯޑުގައި ވާދަކުރުމުގެ ފުރުސަތު ގެއްލިއްޖެ އެވެ.

އަންނަ އަހަރު ބާއްވާ 97 ވަނަ އޮސްކާ އެވޯޑަށް ޝޯޓްލޮސްޓުވި ފިލްމުތަކުގެ ނަންތައް އޮސްކާ އެކެޑަމީން އިއްޔެ ވަނީ އިއުލާންކޮށްފަ އެވެ.

އިންޑިއާގެ ފަރާތުން އަންނަ އަހަރުގެ އޮސްކާގައި ވާދަކުރާނެ ފިލްމަކީ "ލާޕަތާ ލޭޑީސް" ކަމަށް ނިންމައި، ފިލްމް ފެޑަރޭޝަން އޮފް އިންޑިއާ އިން އެކަން އިއުލާންކުރީ މިދިޔަ ސެޕްޓެމްބަރު މަހު އެވެ. އެ ފިލްމު އޮސްކާއަށް ހުށަހަޅަން ނިންމީ ފިލްމް ފެޑަރޭޝަންގެ 13 ޖަޖުންގެ ޕެނަލަކުންނެވެ.

ނަމަވެސް، އޮސްކާއަށް ޝޯޓްލިސްޓުވި ފިލްމުތަކުގެ ލިސްޓުގައި، އިންޓަނޭޝަނަލް ފީޗާ ފިލްމުގެ ކެޓަގަރީން ޝޯޓްލިސްޓުވި ފިލްމުތަކުގެ ތެރޭގައި "ލާޕަތާ ލޭޑީސް" ނުހިމެނެ އެވެ. އެހެންވެ، އޮސްކާއަށް ކުރި އުއްމީދު އެ ފިލްމަށް ވަނީ ނާކާމިޔާބުވެފަ އެވެ.

އިންޓަނޭޝަނަލް ފީޗާ ފިލްމުގެ ކެޓަގަރީން އެކި ގައުމުތަކުން 15 ފިލްމެއް ޝޯޓްލިސްޓުވި އެވެ.

އިންޓަނޭޝަނަލް ފީޗާ ފިލްމުގެ ކެޓަގަރީއަށް އިންޑިއާގެ ފިލްމެއް ޝޯޓްލިސްޓު ނުވި ނަމަވެސް، އިންޑިއާގެ ފަންނާނުން އިނގިރޭސިވިލާތުގައި އުފައްދާފައިވާ ކްރައިމް ފިލްމެއް ކަމަށްވާ "ސަންތޯޝް" ވަނީ އެ ކެޓަގަރީން ޝޯޓްލިސްޓުވެފަ އެވެ. އަދި އޮސްކާގެ ބެސްޓް ލައިވް އެކްޝަން ޝޯޓް ފިލްމުގެ ކެޓަގަރީން ވަނީ އިންޑިއާގެ ކުރު ފިލްމެއް ވެސް އޮސްކާއަށް ޝޯޓްލިސްޓުވެފަ އެވެ.

އޮސްކާއަށް ޝޯޓްލިސްޓުވި ކުރު ފިލްމަކީ "އަނޫޖާ" އެވެ. އެ ފިލްމަކީ ޑޮކިއުމެންޓްރީ ފިލްމު ކެޓަގަރީން މިދިޔަ އަހަރު އޮސްކާ އެވޯޑު ކާމިޔާބުކުރި "ދަ އެލިފެންޓް ވިސްޕާސް" އާއި 2019 ވަނަ އަހަރު އޮސްކާ އެވޯޑު ކާމިޔާބުކުރި "ޕީރިއަޑް. އެންޑް އޮފް ސެންޓެންސް"ގެ ޕްރޮޑިއުސަރު ގުނީތު މޮންގާގެ ފިލްމެކެވެ.

އާމިރް ހާންގެ ކުރީގެ އަންހެނުން ކިިރަން ރާއޯ ޑައިރެކްޓުކޮށްފައިވާ "ލާޕަތާ ލޭޑީސް" އަކީ އާމިރް އާއި ޖިޔޮތީ ދޭޝްޕާންޑޭ ޕްރޮޑިއުސްކުރި ފިލްމެކެވެ. އޮސްކާ ކާމިޔާބުކުރުމަށް އެ ފިލްމުގެ ޕްރޮމޯޝަނަށް އާމިރު އާއި ކިރަން ވަނީ ބޮޑު ކެމްޕެއިނެއް ވެސް ހިންގައިފަ އެވެ.

"ލާޕަތާ ލޭޑީސް"އަކީ އަލަތު ކައިވެނިކޮށްގެން އުޅޭ ދެ އަންހެނަކު، ފިރިމީހާއާ އެކު ގެއަށް ދިއުމުގެ މަގުމަތީގައި އެމީހުންގެ ފިރިން އޮޅޭ ހިސާބުން ހިނގާ ތަފާތު ކަންތައްތަކެއް ދައްކާ އަސަރުގަދަ ފިލްމެކެވެ. އެއީ އިންޑިއާގެ ރަށްފުށު ހިސާބަކަށް ނިސްބަތްވާ ފަގީރު ބައެކެވެ.

އޮސްކާގެ ނޮމިނޭޝަންތައް އިއުލާންކުރާނީ އަންނަ މަހު އެވެ. އޮސްކާ އެވޯޑު ބާއްވަނީ އަންނަ އަހަރު މާޗު މަހުގެ ތިނެއްގަ އެވެ.