ސީރިއާ ކޮންޓްރޯލްކުރާ އެޗްޓީއެސް އާ ޔޫކޭއިން ވެސް ވާހަކަ ދައްކަނީ

ސީރިއާގެ ވެރިކަމުން ބައްޝާރުލް އަސަދު ދުރުކުރުމަށް ދިން ހަމަލާތަކުގައި އިސްކޮށް ހަރަކާތްތެރިވި ހަޔާތު ތަހްރީރު އަލް ޝާމް (އެޗްޓީއެސް) ޖަމާއަތާ އިނގިރޭސި ވިލާތުން "ޑިޕްލޮމެޓިކް ކޮންޓެކްޓް" ފަށާފައިވާ ކަމަށް ފޮރިން ސެކްރެޓަރީ ޑޭވިޑް ލެމީ އިއްޔެ ވިދާޅުވެއްޖެ އެވެ.

ލެމީ ވިދާޅުވީ އެ ޖަމާއަތްތަކަކީ މަނާ ޓެރަރިސްޓް ޖަމާއަތެއްގެ ގޮތުގައި ދެމިއޮންނާނެ ކަމަށާއި ނަމަވެސް ޑިޕްލޮމެޓިކް ކޮންޓެކްޓް ކުރެވިދާނެ ކަމަށެވެ. އެހެންވެ ޑިޕްލޮމެޓިކް ކޮންޓެކްޓް މިހާރު ގާއިމުކޮށްފައިވާ ކަމަށް ވިދާޅުވި އެވެ.

"އަޅުގަނޑުމެން ދެކެން ބޭނުންވަނީ އެންމެން ތަމްސީލުކުރާ ސަރުކާރެއް. ކެމިކަލް ހަތިޔާރުގެ ބޭނުން ނުކޮށް އޭގެ ސްޓޮކްތައް ރައްކާތެރިކޮށް ބަލަހައްޓާ މަންޒަރު. ހަމަނުޖެހުންތައް ދެން އަލުން ކުރިއަށް ނުދާ މަންޒަރު،" އޭނާ ވިދާޅުވި އެވެ.

"އެހެންވީމާ، އެ ހުރިހާ ސަބަބުތަކަކަށްޓަކައި، އަޅުގަނޑުމެންނަށް ލިބެންހުރި ހުރިހާ ޗެނަލްތަކެއް ބޭނުންކޮށްގެން، ޑިޕްލޮމެޓިކް އަދި އިންޓެލިޖެންސުގެ ތެރެއިން ލިބެން ހުރި ޗެނަލްތަކެއް ބޭނުންކޮށްގެން ވެސް ބޭނުންވަނީ އެޗްޓީއެސްއާ ވާހަކަ ދައްކަން."

އެޗްޓީއެސްއާ ގުޅިފައިވާ ކަމަށާއި އެ މީހުންނާ މިހާރު ސީދާ ގޮތުގައި ވާހަކަ ދެކެވޭ ކަމަށް އެމެރިކާގެ ސެކްރެޓަރީ އޮފް ސްޓޭޓް އެންޓަނީ ބްލިންކެން ވެސް ވަނީ ވިދާޅުވެފަ އެވެ.