ވައިޓަލް ރަޖިސްޓްރޭޝަންގެ ހިދުމަތް މާލޭގައި އަލުން ފަށަނީ

ޓިނު ބިލްޑިންގް ނުވަތަ ގްރީން ބިލްޑިންގްގައި މިދިޔަ ބުރާސްފަތި ދުވަހު ހިނގި އަލިފާނުގެ ބޮޑު ހާދިސާ އަށް ފަހު، މާލެ ސިޓީ ކައުންސިލްގެ ވައިޓަލް ރަޖިސްޓްރޭޝަން އޮފީހުގެ ހިދުމަތްތައް މިވަގުތަށް މެދުކެނޑިފައިވީ ނަމަވެސް އަންނަ ހަފުތާގައި އަލުން މާލޭގައި އެ ހިދުމަތް ފަށާނެ ކަމަށް ކައުންސިލުން މިއަދު ބުނެފި އެވެ.

މާލޭގެ ރައްޔިތުންގެ އުފަންދުވަހުގެ ސެޓްފިކެޓް ފަދަ މުހިންމު ލިޔުންތައް ބެލެހެއްޓުމާއި ހިދުމަތްތައް ދެމުން އައީ ރޯވި އިމާރާތުގެ ބައެއްގަ އެވެ. ހައުސިން މިނިސްޓްރީ އާއި ކޮންސްޓްރަކްޝަން މިނިސްޓްރީ އާއި އެންވަޔަރުމަންޓް މިނިސްޓްރީ ވެސް ހިންގާ އެ އިމާރާތުގެ އެއްބައިގައި ސިޓީ ކައުންސިލްގެ އެއްބައި ހިންގަމުން އަންނައިރު އެ އޮފީސް ވެސް ވަނީ ބޭނުން ނުކުރެވޭ ވަރަށް އަނދައިފަ އެވެ.

އެހެންވެ، ކައުންސިލުން މިދިޔަ ބުރާސްފަތި ދުވަހު ވަނީ އެ ތަނުން ދެމުން އައި ހުރިހާ ހިދުމަތެއް ހުޅުމާލޭ އަމިން އެވެނިއުގެ ފުރަތަމަ ފަންގިފިލާގައި ހުންނަ ސިޓީ ކައުންސިލްގެ އޮފީހަށް ބަދަލު ކޮށްފަ އެވެ.

ނަމަވެސް ކައުންސިލުން މިއަދު ބުނީ، ވައިޓަލް ރަޖިސްޓްރޭޝަންގެ މަސައްކަތްތައް މާލޭގައި އަލުން މި ހަފުތާގައި ފެށުމުގެ މަސައްކަތް ކުރަމުން އަންނަ ކަމަށެވެ. އެކަމަކު، އެ ހިދުމަތް އަލުން ފަށަނީ ކޮން އިމާރާތެއްގައި ކަމެއް އަދި ނުބުނެ އެވެ.

ސިޓީ ކައުންސިލްގެ ވައިޓަލް ރެޖިސްޓްރޭޝަން އޮފީހަކީ އުފަންދުވަހުގެ ސެޓްފިކެޓާއި މަރުވާ މީހުންގެ ރެކޯޑުތަކުގެ އިތުރުން ރަށްވެހިކަމާއި ގޯތިތަކުގެ ރެޖިސްޓްރޭޝަން ވެސް ބަލަހައްޓަމުން އަންނަ ތަނެވެ.

އެ އިމާރާތުގައި ރޯވުމުން ބައެއް ލިޔެކިޔުންތައް ގެއްލި, އަނެއްބައި ލިޔެ ކިޔުމަށް ބޮޑެތި ގެއްލުންތަކެއް ވަނީ ލިބިފަ އެވެ. ކައުންސިލް މުވައްޒަފުން އެ ތަނުގައި ހުރި ލިޔެކިޔުންތައް ސަލާމަތް ކުރަން އަންނަނީ މަސައްކަތް ކުރަމުންނެވެ.

ކައުންސިލްގެ ދެ ސެކްޝަނެއް ހިންގަމުން އައި އިމާރާތުން ސަލާމަތް ކުރެވުނު ތަކެތި ރައްކާތެރި ތަނެއްގައި އަލުން ގުދަންކުރަން ފަަށައިފައިވާ ކަމަށާއި ތެމިފައި ހުރި ލިޔުންތައް ހިއްކުމުގެ މަަސައްކަތް ވެސް ކުރަމުން އަންނަ ކަމަށް ކައުންސިލުން ބުންޏެވެ.

ބުރާސްފަތި ދުވަހުގެ ހެނދުނު 6:30 ހާއިރު ޓިނު ބިލްޑިންގުގައި ރޯވި އަލިފާންގަނޑު ހަތަރު ގަޑިއެއްހާއިރު ފަހުން ނިއްވައިލެވުނުއިރު މުޅި އެ އިމާރާތް ވަނީ އަނދައިފަ އެވެ. އެންމެ ބޮޑު ގެއްލުމެއް ލިބުނު އެއްބަޔަކޫ މާލެ ސިޓީ ކައުންސިލަށް ކަމަށް ވާއިރު، އަނދައިގެން ދިޔަ ލިޔުންތަކުގެ އަދަދެއް އަދި ސާފެއް ނުވެ އެވެ.

އެ އިމާރާތުގައި ހިންގާ ތިން މިނިސްޓްރީ ވަގުތީ ގޮތުން މިއަދުން ފެށިގެން ހިންގަނީ ދަރުބާރުގޭގަ އެވެ.