މި މަހު ރާއްޖޭން 5،700 އަށްވުރެ ގިނަ މީހުން އުމްރާއަށް؛ މިއީ ރެކޯޑެއް

ފަހުގެ ތާރީހެއްގައި އުމްރާގެ އަޅުކަމަށް ރާއްޖޭން އެންމެ ގިނަ މީހުން ފުރާ އެއް މަހަށް މި ޑިސެމްބަރު ވެއްޖެ އެވެ.

"މިހާރު" އަށް ލިބިފައިވާ ތަފާސްހިސާބުތަކަށް ބަލާއިރު، މި މަހުގެ 13 ވަނަ ދުވަހުން ފެށިގެން 27 ވަނަ ދުވަހާ ހަމައަށް ރާއްޖޭން 5،796 މީހުން އުމްރާއަށް ފުރާނެ އެވެ.

ޑިސެމްބަރު މަހުގެ ޗުއްޓީއާ ދިމާކޮށް ކޮންމެ އަހަރަކު ވެސް ގިނަ ބަޔަކު އުމްރާއަށް ދެ އެވެ. މީގެ ކުރިން ބައެއް މަސްމަހު 4،000 އަށް ވުރެ ގިނަ މީހުން ވެސް އުމްރާއަށް ގޮސްފައިވެ އެވެ. އެކަމަކު މި މަހުގެ އަދަދު އާންމުކޮށް ދާ އަދަދަށް ވުރެ ގިނަ އެވެ. އެހެންވެ މިއީ ރެކޯޑް އަދަދެކެވެ.

ވެލާނާ އެއާޕޯޓުން އުމްރާވެރިން ފުރުމުގެ ތާވަލުން ދައްކާ ގޮތުގައި އެންމެ ގިނަ މީހުން ފުރާނީ އަންނަ ހޯމަ ދުވަހު އެވެ. އެ ދުވަހު ހަތް ފްލައިޓުން 1،243 މީހުން ފުރާ ގޮތަށް ވަނީ ހަމަޖެހިފަ އެވެ.

ރާއްޖޭން މީހުން އުމްރާއަށް ގެންދަން ގިނަ ގްރޫޕްތަކަކުން ހިދުމަތް ދެމުންދާއިރު، ދިވެހި ޒުވާނުން އުމްރާއަށް ދާ މިންވަރު މި ފަހުން ވަނީ ވަރަށް ބޮޑަށް އިތުރުވެފަ އެވެ.

އުމްރާގެ ދަތުރުތަކުގެ އަގު މިހާރު ނިސްބަތުން ބޮޑެއް ނޫނެވެ. ގިނަ ކުންފުނިތަކުން ޑިސެމްބަރުމަހު 15 ދުވަހުގެ އުމުރާ ދަތުރަކަށް މީހަކަށް އެވްރެޖުކޮށް 29،500ރ. ނަގާއިރު މި އަގު ރޯދަ މަހު ބޮޑުވެ އެވެ.

ކުޑަކުދިންނަށް ހާއްސަ އަގުތައް ވެސް އެކި ގްރޫޕްތަކުން ހަމަޖައްސާފައި ހުރެ އެވެ.