އައްލޫ އަރްޖުން ހައްޔަރުކުރުން؛ މަރުވި މީހާގެ އާއިލާއިން ދެކޮޅު!

"ޕުޝްޕާ 2" ޕްރިމިއާކުރުމަށް ހައިދަރުއާބާދުގެ ސިނަމާއެއްގައި ބޭއްވި އިވެންޓުގައި ފިތިބާރުވެގެން މީހަކު މަރުވި މައްސަލާގައި އެ ފިލްމުގެ ލީޑު އެކްޓަރު އައްލޫ އަރްޖުން މިއަދު ހައްޔަރުކޮށްފި އެވެ.

ރިޕޯޓްތައް ބުނި ގޮތުގައި، އެ މައްސަލާގައި ހައިދަރުއާބާދުގެ ފުލުހުން ވަނީ މިއަދު މެންދުރުގެ ވަގުތެއްގައި އަރްޖުން ހައްޔަރުކޮށްފަ އެވެ. އަރްޖުން ހައްޔަރުކޮށް، އެ ސްޓޭޓުގެ ދަށު ކޯޓަކުން ވަނީ އޭނާ 14 ދުވަހަށް ޖަލުގައި ބަންދުކުރުމަށް ވެސް އަމުރުކޮށްފަ އެވެ.

ނަމަވެސް، އަރްޖުންގެ ވަކީލުން ވަނީ ޓެލަންގާނާ ހައި ކޯޓުގައި އެ މައްސަލަ އިސްތިއުނާފު ކޮށްފަ އެވެ. އަދި ދަށު ކޯޓުގެ ނިންމުން ބަދަލުކޮށް، ހައި ކޯޓުން ވަނީ ކަފާލާތުގެ ދަށުން އޭނާ ހަތަރު ހަފުތާއަށް ގެއަށް ދޫކޮށްލުމަށް ވެސް އަމުރުކޮށްފަ އެވެ.

އަރްޖުން ހައްޔަރުކުރުމުން ގިނަ ބަޔަކު ދަނީ ފުލުހުންނަށް ވަރަށް ބޮޑަށް ފާޑުކިޔަމުންނެވެ. ގިނަ ބަޔަކު ދެކޭ ގޮތުގައި، އެ މީހާ މަރުވީ ސިނަމާ ހިންގާ ފަރާތުގެ އިހުމާލުންނެވެ. އެކަމަކު، މިހާތަނަށް ވެސް ސިނަމާގެ ވެރިފަރާތަށް އެއްވެސް ފިޔަވަޅެއް އަޅާފައި ނުވާތީ ފާޑުކިޔުން ވަނީ ބޮޑުވެފަ އެވެ.

އަރްޖުން ވެސް ބައިވެރިވި އެ އިވެންޓު ބޭއްވީ މި މަހުގެ ހަތަރު ވަނަ ދުވަހުގެ ރޭ ހައިދަރުއާބާދުގެ ސަންދިޔާ ތިއޭޓަރުގަ އެވެ. އެ ފިލްމު ބަލަން ދިޔަ މީހުންނާއި އަރްޖުން ދެކިލަން ސިމަނާ ކައިރިއަށް އެއްވި މީހުންނާ އެކު، އެ ސަރަހައްދު އޮތީ ފުރި ބާރުވެފަ އެވެ. އެ ހާދިސާގައި މަރުވީ ކުޑަކުއްޖަކު ގޮވައިގެން އެ ފިލްމު ބަލަން ދިޔަ އަންހެނެކެވެ. އޭނާގެ ދަރިފުޅަށް ވެސް އަނިޔާވި އެވެ.

އަރްޖުން ހައްޔަރުކުރުމުން އެ އަންހެން މީހާގެ ފިރިމީހާ ވެސް ވަނީ ފުލުހުންގެ ނިންމުން ކުށްވެރިކޮށްފަ އެވެ. އޭނާ ވެސް ބުނީ އަންހެން މީހާ މަރުވުމުގައި އަރްޖުންގެ އެއްވެސް ކުށެއް ނެތް ކަމަށާއި އިހުމާލުވެފައި ވަނީ ސިނަމާ ހިންގާ ފަރާތުން ކަމަށެވެ. އަދި، އަންހެން މީހާގެ އާއިލާގެ ފަރާތުން ފުލުހުންނަށް ހުށަހެޅި މައްސަލާގައި ވެސް އަރްޖުންއާ ދެކޮޅަށް އެއްވެސް ވާހަކައެއް ދައްކާފައި ނުވާނެ ކަމަށް އޭނާ ބުންޏެވެ.

އޭނާ ވެސް ވަނީ އަރްޖުން ދޫކޮށްލަން ފުލުހުންނަށް ގޮވާލައިފަ އެވެ. އަދި، ފުލުހުންނަށް ހުށަހެޅި މައްސަލަ އަނބުރާ ގެންދާނެ ކަމަށް ވެސް އޭނާ ބުންޏެވެ.

މަރުވި މީހާގެ އާއިލާގެ ކިބައިން އަރްޖުން ވަނީ މީގެ ކުރިން މާފަށް ވެސް އެދިފަ އެވެ.

ހައިދަރުއާބާދުގެ ފުލުހުން ކުރިން ނެރުނު ބަޔާނެއްގައި ބުނީ އެ ހާދިސާ ހިނގަން މެދުވެރިވި މައިގަނޑު ސަބަބަކީ، އެތަނަށް ގިނަ ބަޔަކު އެއްވާނެ ކަން އެނގިހުރެ، އެ ސަރަހައްދުގެ ސެކިއުރިޓީ ރަނގަޅަށް ބަލަހައްޓަން ސިނަމާ ހިންގާ ފަރާތުން އެއްވެސް ފިޔަވަޅެއް އަޅާފައި ނުވާތީ ކަމަށެވެ. އަދި ސިނަމާއަށް ވަދެ، ނުކުތުމުގެ އިންތިޒާމު ވެސް އެންމެ ރަނގަޅަށް ހަމަޖައްސާފައި ނުވާ ކަމަށް ފުލުހުން އޭރު ބުންޏެވެ.