ސިޔާސީ ދެބަސްވުމެއްގައި ޖޯޖް އާއި އާމާލް ވަރިފަށަށް އަރައިފި: ރިޕޯޓް

ސިޔާސީ ގޮތުން ދެބަސްވުމާއި އަދިވެސް އިތުރު މައްސަލަތަކެއް ޖެހިގެން ހޮލީވުޑްގެ އެކްޓަރު ޖޯޖް ކްލޫނީ އާއި އޭނާގެ އަންހެނުން، އިނގިރޭސިވިލާތުގެ މަޝްހޫރު ގާނޫނީ ވަކީލު އާމާލް ކްލޫނީ ވަރިވާން އުޅޭ ކަމަށް ރިޕޯޓްތައް ބުނެފި އެވެ.

ބައެއް ރިޕޯޓްތައް ބުނި ގޮތުގައި، ޖޯޖްގެ އަމިއްލަ ދިރިއުޅުމުގެ ކަންކަން މި ދުވަސްވަރު ވަރަށް ގޯހެވެ. އެންމެ ބޮޑު މައްސަލައެއް އުފެދުނީ އެންމެފަހުން ބޭއްވި އެމެރިކާގެ ރިޔާސީ އިންތިހާބުގައި ޖޯޖް ތާއީދުކުރި ކެނޑިޑޭޓު ކަމަށްވާ ކަމަލާ ހޭރިސްގެ ބޮޑު ނާކާމިޔާބީ އެވެ. އެ ނާކާމިޔާބީގެ ސަބަބުން ސިޔާސީ ދާއިރާއިން އޭނާ ހާސިލްކުރަން ބޭނުންވި އެެއްވެސް ކަމެއް ނުވި ކަމަށް ރިޕޯޓްތައް ބުންޏެވެ.

ރިޔާސީ އިންތިހާބުގެ ދުވަސްވަރު އެމެރިކާގެ ރައީސް ޖޯ ބައިޑެން އެ އިންތިހާބަށް ކުރިމަތިނުލައި ޒުވާން ކެނޑިޑޭޓަކަށް ފުރުސަތު ދޭން ގޮވާލައި އޭނާ ލިޔުނު އޯ-ޕެޑެއްގެ ސަބަބުން ވެސް ގިނަ ބައެއްގެ ފާޑުކިޔުންތައް އަމާޒުވި އެވެ.

ރިޕޯޓްތައް ބުނި ގޮތުގައި، ސިޔާސީ ގޮތުން ޖޯޖްއަށް ލިބުނު މި ނާކާމިޔާބީގެ ސަބަބުން އާމާލް އާއި އޭނާއާ ދެމެދުގައި މައްސަލަތައް ވަނީ ޖެހިފަ އެވެ. އަދި، ސިޔާސީ ގޮތުން ނާކާމިޔާބުވުމުން ނިއު ޔޯކުގެ ބްރޯޑްވޭގައި ތަމްސީލު ކުޅެން ދާން އޭނާ ނިންމުމުން ވެސް އާމާލް އެކަމާ މެދުގައި ވަނީ ހިތްހަމަނުޖެހިފަ އެވެ. އެއީ، އާމާލް އަށާއި އެ ދެމަފިރިންގެ ތިބޭ އެއްމާބަނޑު ދެކުދިންނަށް ވަގުތު ނުދީ އެހެން ކަންކަމުގައި ޖޯޖް އުޅޭތީ އެވެ.

ޖޯޖް އާއި އާމާލް އަދި އެ ދެމަފިރިންގެ ހަތް އަހަރުގެ ދެ ކުދިން މިހާރު ދިރިއުޅެނީ ޔޫރަޕުގަ އެވެ. ނަމަވެސް، ޖޯޖް ބްރޯޑްވޭއަށް ދިއުމަށް އެ އާއިލާގެ ދިރިއުޅުން ނިއު ޔޯކަށް ބަދަލުކުރަން ބުނުމުން އާމާލް އެކަމާ ދެކޮޅު ހަދާފައިވާ ކަމަށާއި އެކަމުގެ ސަބަބުން ދެމަފިރިންގެ މެދުގައި މިހާރު މައްސަލަތައް ޖެހި، އެ ގުޅުން ރޫޅަލަން އުޅޭ ހިސާބަށް ކަންކަން ގޮސްފައިވާ ކަމަށް ވެސް ރިޕޯޓްތައް ބުންޏެވެ.

ޖޯޖް އާއި އާމާލް ކައިވެނިކުރީ ސެޕްޓެމްބަރު 27، 2014 ގަ އެވެ.