ލައިވްގައި ގުރުއާނުން ތަންކޮޅެއް އުނިވީ ކޮންޓްރޯލްގެ އިހުމާލުން، ބަޔަކު ސަސްޕެންޑްކޮށްފިން: ޕީއެސްއެމް

ޖަލްސާއެއް ލައިވްކޮށް ދެއްކި އިރު ގުރުއާނުގެ އާޔަތަކުން ތަންކޮޅެއް އުނިވާ ގޮތަށް ދެއްކުނީ އެ ވަގުތު ކޮންޓްރޯލް ރޫމްގައި ތިބި މުވައްޒަފުންގެ އިހުމާލުން ކަމަށާއި އެހެންވެ އެ މުވައްޒަފުން މަސައްކަތުން އެކަހެރި ކޮށްފައިވާ ކަމަށް ޕަބްލިކް ސާވިސް މީޑިއާ (ޕީއެސްއެމް) އިން މިއަދު ބުނެފި އެވެ.

މައްސަލަ ދިމާވީ މިދިޔަ ހަފުތާގައި ރައީސް ޑރ. މުހައްމަދު މުއިއްޒު ކ. އަދި އއ. އަތޮޅުގެ ބައެއް ރަށްރަށަށް ކުރެއްވި ދަތުރުުޅުފުގައި ރަސްދޫގައި ބޭއްވި ޖަލްސާ ލައިވްކުރި އިރު އެވެ. ޖަލްސާ ފެށުމުގެ ގޮތުން ގުރުއާން ކިޔެވިތަން ޕީއެސްއެމުން ދެއްކި އިރު އެއް ކަލިމައިގެ އަޑު ވަނީ ކެނޑިފަ އެވެ.

އެ މައްސަލަ ސަމާލުކަމަށް އައިސް ފާޑުކިޔުން އަމާޒުވި ފަހުން ޕީއެސްއެމުން ވަނީ އެ ލައިވް ސްޓްރީމް ހިމެނޭ ސޯޝަލް މީޑިއާ ޕޯސްޓުތައް ޑިލީޓުކޮށްފަ އެވެ. އަދި މިއަދު ވަނީ އެކަން ހިނގައިދިޔަ ގޮތް ސާފުކޮށްދީ ބަޔާނެއް ނެރެފަ އެވެ.

އެ ބަޔާނުގައި ބުނީ އެއީ ސީރިއަސް މައްސަލައެއްގެ ގޮތުގައި އެ ކުންފުނީގެ އިސް މުވައްޒަފުންތަކެއް ހިމެނޭ ކޮމިޓީއަކުން މައްސަލަ ބަލާފައިވާ ކަމަށެވެ.

ގުރުއާނުން ތަންކޮޅެއް އުނިވާ ގޮތަށް ލައިވް ދެއްކި މައްސަލައިގައި މާފަށް އެދެމުން ބަޔާނުގައި ބުނެފައިވަނީ އެކަން އެހެން ދިމާވީ ކޮންޓްރޯލް ރޫމްގައި ތިބި މުވައްޒަފުންގެ އިހުމާލުން ކަމަށެވެ. އެއީ މީހުން ތުހުމަތުކުރާ ގޮތަށް، ޕީއެސްއެމް އިން އެ ކޮންޓެންޓް އެޑިޓްކުރުމުން ދިމާވި ކަމެއް ނޫން ކަމަށް ޕީއެސްއެމް އިން ބުންޏެވެ.

އެ އިވެންޓް ލައިވް ކުރަން ފަށާފައި ވަނީ ހަބަރު ކޮންޓްރޯލް ރޫމުން ކަމަށާއި މައި ކޮންޓްރޯލް ރޫމަށް ފަހުން ސިގްނަލް ބަދަލުކުރި ކަމަށް ބަޔާނުގައިވެ އެވެ. އެއް ކޮންޓްރޯލް ރޫމުން އަނެއް ކޮންޓްރޯލް ރޫމަށް ބަދަލު ކުރުމަކީ އާންމުކޮށް ކުރާ ކަމެއް ނަމަވެސް ސިގްނަލް ބަދަލު ކުރާއިރު، "މީހަކު ވާހަކަ ދައްކަމުންދާ ވަގުތު ސިގްނަލް ބަދަލެއް ނުކުރާނެ" ކަމަށް ޕީއެސްއެމް އިން ބުންޏެވެ.

ނަމަވެސް އެ ލައިވް ކުރިއަށް ގެންދިޔަ ވަގުތު އެއް ކޮންޓްރޯލް ރޫމުން އަނެއް ކޮންޓްރޯލް ރޫމަށް ސިގްނަލް ބަދަލުކޮށްފައި ވަނީ ގުރުއާން ކިޔަވަމުން ދަނިކޮށް ކަމަށާއި އެއީ އާންމުކޮށް ކުރާ ކަމެއް ނޫން ކަމަށް ވެސް އެ ކުންފުނިން ބުންޏެވެ.

ޕީއެސްއެމް އިން ބުނީ މިކަމުގައި އިހުމާލުވި މުވައްޒަފުން މާފަށް އެދިފައިވާ ކަމަށެވެ.

ބަޔާނުގައި ބުނެދިފައިވާ ގޮތުން، ލައިވްގައި އަޑު ކެނޑިފައިވަނީ އެއް ކޮންޓްރޯލް ރޫމުން އަނެއް ކޮންޓްރޯލް ރޫމަށް ސިގްނަލް ބަދަލުކުރި ވަގުތު އެވެ.

މި މައްސަލައިގައި، ހަބަރު ކޮންޓްރޯލް ރޫމާއި މައި ކޮންޓްރޯލް ރޫމުގައި އެވަގުތު ޑިއުޓީގައި ތިބި މުވައްޒަފުން މަސައްކަތުން އެކަހެރި ކޮށްފައިވާ ކަމަށް ވަނީ ބުނެފަ އެވެ.

"މި ކުންފުނީގެ ފަރާތުން ލައިވްކޮށް ގެނެސްދިން ކޮންޓެންޓެއްގެ ޓެކްނިކަލް މައްސަލައެއްގައި ކީރިތި ގުރުއާންގެ ބައެއް އުުނިވެފައި ވާތީ އެފަދަ ކަމެއް ތަކުރާރު ނުވާނެ ގޮތެއްގެ މަތިން ކަންކަން އިންތިޒާމްކުރަމުން ގެންދާ ވާހަކަ ދެންނެވީމެވެ." ބަޔާނުގައިވެ އެވެ.

މި ލައިވްގެ މައްސަލަ މިއަދު ވަނީ ކެންދޫ ދާއިރާގެ މެންބަރު މައުރޫފު ޒާކިރު ރައްޔިތުންގެ މަޖިލީހަށް ކުއްލި މައްސަލައެއްގެ ގޮތުގައި ވެސް ހުށަހަޅުއްވައިފަ އެވެ. އަދި އެ މައްސަލައިގެ ބަހުސް ވެސް ކުރިއަށް ގެންދިޔަ އެވެ.