ބްރޯޑްކޮމަށް މުހަންމާ އާއި މުއާ އައްޔަންކުރަން ރައީސް ނަން ފޮނުއްވައިފި

މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް) ގެ ހުސްވެފައިވާ މެންބަރުންގެ މަގާމަށް ރައްޔިތުންގެ މަޖިލިހުގެ ކުރީގެ މެންބަރު މުހައްމަދު އަބްދުﷲ (މުހަންމާ) އާއި ރައީސް އޮފީހުގެ ކުރީގެ ތަރުޖަމާނު އިބްރާހިމް މުއާޒު އަލީ (ޓީވީ މުއާ) އައްޔަން ކުރަން ރައީސް ޑރ. މުހައްމަދު މުއިއްޒު ރައްޔިތުންގެ މަޖިލީހަށް ނަން ފޮނުއްވައިފި އެވެ.

ބްރޯޑްކޮމްގެ ދެ މެންބަރެއްގެ ދައުރު މި މަސް ތެރޭޭގައި ވަނީ ހަމަވެފަ އެވެ. އެއީ ކޮމިޝަންގެ ރައީސްގެ މަގާމުގައި ހުންނެވި މަރިޔަމް ވަހީދާ އާއި ކޮމިޝަންގެ މެންބަރު އަލީ ޔޫސުފްގެ ދައުރެވެ.

އެ ދެ މަގާމަށް މެންބަރުން ހޯދަން ރައީސް އޮފީހުން ކުރި އިއުލާނަށް ޝަރުތު ހަމަވާ 12 ބޭފުޅަކު ކުރިމަތިލައްވައިފައިވެ އެވެ. ރައީސް މުއިއްޒު ވަނީ އެ މަނިކުފާނު އިސްކަން ދެއްވާ ތަރުތީބު ބަޔާން ކުރައްވައި، އެ ލިސްޓް މަޖިލީހަށް ފޮނުއްވައިފަ އެވެ.

އޭގެ ތެރޭގައި ލިސްޓްގެ އެންމެ ކުރީގައި ހިމެނުއްވީ އިހަވަންދޫ ދާއިރާގެ ކުރީގެ މެންބަރު މުހައްމަދު އަބްދުﷲ އަދި ކުރީގެ ރައީސް އަބްދުﷲ ޔާމީންގެ ސަރުކާރުގައި ރައީސް އޮފީހުގެ ތަރުޖަމާނު މުއާޒުގެ ނަމެވެ.

ރައީސް މަޖިލިހަށް ފޮނުއްވި ލިސްޓުގެ ތަރުތީބު:

- މުހައްމަދު އަބްދުﷲ (މުހަންމާ)، ހުސްއަކުރުގެ ހއ. އިހަވަންދޫ

- އިބްރާހިމް މުއާޒު އަލީ، ހަޒާރުމާގެ ނ. ފޮއްދޫ

- އިބްރާހިމް އަޝްރަފު، ވ. މަށިވެލި

- ލެފްޓިނެންޓް ކާނަލް ރިޓަޔާޑް ޒުބައިރު އަހުމަދު މަނިކު، ގ. މަލްވިނަ

- އަބްދުﷲ ހުމައިދު، ފަޒާ ޅ. ހިންނަވަރު

- އައިޝަތު ދިޔާނާ ތޯހިރު، ސެވަންސްޓާ، ސ. ހިތަދޫ

- އައިމިނަތު ސަރާހަތު އިއްޒަތު، ގ. ގޮފި

- ޝިމްލާ އަމްހަދު، އާސްޓްރަލްގެ ސ. ހިތަދޫ

- އިސްމާއިލް ޝަފީގް، މ.ސްލީޓް

- ޝިފްޒާ މުސްތަފާ، މާދަޑު، އާސާން، ފުވައްމުލައް

- އަލީ ނިޝާން، ގ ކޫލްގްރާސް

- މުހައްމަދު ޝަމީމް، ހ ޕްރިޓީވިލާ

ބްރޯޑްކޮމަށް އައްޔަން ކުރާނެ ބޭފުޅަކު ކަނޑައަޅަން ނަންތައް ދިރާސާކުރަން މިނިވަން މުއައްސަސާތަކުގެ ކޮމިޓީ އަށް ވަނީ ފޮނުވައިފަ އެވެ.

މެންބަރު ކަމަށް އައްޔަން ކުރަން ރައީސް އިސްކަން ދެއްވީ ދެ ބޭފުޅުންނަކީ ވެސް ސިޔާސީ އެކްޓިވިސްޓުންގެ ގޮތުގައި މަސައްކަތް ކުރައްވާ ދެ ބޭފުޅުންނެވެ.

މުހަންމާއަކީ ކުރިން ފިލްމީ ދާއިރާގައި މަސައްކަތް ކުރުމަށް ފަހު، ޕީޕީއެމްގެ ޓިކެޓްގައި މަޖިލީހަށް އިންތިހާބުވި ބޭފުޅެކެވެ. އޭގެ ފަހުން އެ ޕާޓީން ވަކިވެ ސަރުކާރާ ދެކޮޅާ މަސައްކަތް ކުރެއްވި އެވެ. ނަމަވެސް، ފަހުން އަނެއްކާވެސް ވަނީ ޕީޕީއެމް/ޕީއެންސީއާ އެކު މަސައްކަތް ކުރައްވަން ފައްޓަވައިފަ އެވެ.

ޕީޕީއެމްގެ ސަރުކާރު ބަދަލުވުމާ އެކު މުއާޒު ވެސް އެ ޕާޓީއާ ދުރަށް ޖެހުނެވެ. އެކަމަކު، މި ފަހުން އަނެއްކާވެސް ސަރުކާރަށް ތާއީދުކޮށް ސޯޝަލް މީޑިއާގައި ވާހަކަ ދައްކަވަ އެވެ.