ބްރޯޑްކޮމަށް ސިޔާސީ އެކްޓިވިސްޓުން އައްޔަން ކުރާތީ އެމްޑީޕީ ކަންބޮޑުވެއްޖެ

މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް)ގެ މެންބަރުކަމުގެ މަގާމަށް ސިޔާސީ އެކްޓިވިސްޓުން އައްޔަން ކުރާތީ އިދިކޮޅު އެމްޑީޕީން މިއަދު ކަންބޮޑުވުން ފާޅުކޮށްފި އެވެ.

ބްރޯޑްކޮމުން ހުސްވެފައިވާ ދެ މެންބަރުންގެ މަގާމަށް ހުޅުވައިލުމުން ކުރިމަތިލެއްވި ބޭފުޅުންގެ ނަންތަކުގެ ތެރެއިން ރައީސް ޑރ. މުހައްމަދު މުއިއްޒު އިސްކަން ދެއްވާ ބޭފުޅުންގެ ތަރުތީބުގެ އެންމެ ކުރީގައި އޮތީ އިހަވަންދޫ ދާއިރާގެ ކުރީގެ މެންބަރު މުހައްމަދު އަބްދުﷲ (މުހަންމާ) އައި ކުރީގެ ރައީސް އަބްދުﷲ ޔާމީންގެ ސަރުކާރުގައި ރައީސް އޮފީހުގެ ތަރުޖަމާނު މުއާޒު އަލީ (ޓީވީ މުއާ) ގެ ނަމެވެ.

މުހައްމަދު އަބްދުﷲ އާއި މުއާއަކީ ވެސް ސިޔާސީ އެކްޓިވިސްޓުންގެ ގޮތުގައި މަސައްކަތް ކުރައްވާ ދެ ބޭފުޅުންނެވެ.

އެމްޑީޕީން މިއަދު ބޭއްވި ނޫސްވެރިންގެ ބައްދަލުވުމުގައި ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް (ކުޑޫ) ވިދާޅުވީ ކުރިން ސިޔާސީ މަގާމުތަކުގައި ތިއްބެވި ބޭފުޅުންތަކެއް ބްރޯޑްކޮމަށް އައްޔަން ކުރުމަކީ އެއްވެސް ގޮތަކުން ބަލައިގަނެވޭނެ ކަމެއް ނޫން ކަމަށެވެ.

"މިއީ ކިޔަވައިގެން ތިބި ޒުވާނުންނަށް ދޭ ވަރަށް ނުބައި މެސެޖެއް،" އޭނާ ވިދާޅުވި އެވެ.

އެކަމަށް ފާޑުވިދާޅުވެ، ގަލޮޅު ދެކުނު ދާއިރާގެ މެންބަރު މީކައިލް ނަސީމް ވެސް ވިދާޅުވީ އެ މުހަންމާ އާއި މުއާގެ ނަން މަޖިލިހަށް ފޮނުވުމުން އެނގުނީ މި ސަރުކާރުގައި ދިވެހި ޒުވާނުން ތައުލީމް ހާސިލް ކުރުމާއި ތަޖުރިބާ ހޯދުމުގެ އެއްވެސް މާނައެއް ނެތް ކަން ކަމަށެވެ. މަތީ މަގާމަކަށް ވާސިލްވުމަށް ހަމައެކަނި ކުރަން ޖެހޭ ކަމަކީ އޭރަކު އެ އޮންނަ ސަރުކާރަކާ ގާތް ގުޅުން ބޭއްވުން ކަން މިއަދު ސިފަވެއްޖެ ކަމަށް އޭނާ ވިދާޅުވި އެވެ.

ބްރޯޑްކޮމަށް އައްޔަން ކުރަން ފޮނުވި ލިސްޓްގައި 12 ބޭފުޅެއްގެ ނަން ހިމެނޭއިރު ތަޖުރިބާކާރު ނޫސްވެރިޔާ އަދި ޕްރެޒެންޓާ ޝިފްޒާ މުސްތަފާގެ ނަން ހިމަނާފައި އޮތީ 10 ވަނައިގަ އެވެ. ޝަރުއީ އަދި ގާނޫނީ ދާއިރާއިން ޑިގްރީ ހާސިލް ކުރައްވާފައިވާ ޝިފްޒާގެ ނަން ލިސްޓްގެ ފަހަތުގައި އޮތުމުން ސޯޝަލް މީޑިއާގައި ފާޑުކިޔުން ވަނީ އަމާޒުވެފަ އެވެ.

ރައީސް މަޖިލިހަށް ފޮނުއްވި ލިސްޓުގެ ތަރުތީބު:

- މުހައްމަދު އަބްދުﷲ (މުހަންމާ) ހުސްއަކުރުގެ ހއ. އިހަވަންދޫ

- އިބްރާހިމް މުއާޒު އަލީ، ހަޒާރުމާގެ ނ. ފޮއްދޫ

- އިބްރާހިމް އަޝްރަފު، ވ. މަށިވެލި

- ލެފްޓިނެންޓް ކާނަލް ރިޓަޔާޑް ޒުބައިރު އަހުމަދު މަނިކު، ގ. މަލްވިނަ

- އަބްދުﷲ ހުމައިދު، ފަޒާ ޅ. ހިންނަވަރު - އައިޝަތު ދިޔާނާ ތޯހިރު، ސެވަންސްޓާ، ސ. ހިތަދޫ

- އައިމިނަތު ސަރާހަތު އިއްޒަތު، ގ. ގޮފި - ޝިމްލާ އަމްހަދު، އާސްޓްރަލްގެ، ސ. ހިތަދޫ

- އިސްމާއިލް ޝަފީގް، މ. ސްލީޓް

- ޝިފްޒާ މުސްތަފާ، މާދަޑު، އާސާން، ފުވައްމުލައް

- އަލީ ނިޝާން، ގ. ކޫލްގްރާސް

- މުހައްމަދު ޝަމީމް، ހ. ޕްރިޓީވިލާ

މުހަންމާއަކީ ކުރިން ފިލްމީ ދާއިރާގައި މަސައްކަތް ކުރުމަށް ފަހު، ޕީޕީއެމްގެ ޓިކެޓްގައި މަޖިލީހަށް އިންތިހާބުވި ބޭފުޅެކެވެ. އޭގެ ފަހުން އެ ޕާޓީން ވަކިވެ ސަރުކާރާ ދެކޮޅާ މަސައްކަތް ކުރެއްވި އެވެ. ނަމަވެސް، ފަހުން އަނެއްކާވެސް ވަނީ ޕީޕީއެމް/ޕީއެންސީއާ އެކު މަސައްކަތް ކުރައްވަން ފައްޓަވައިފަ އެވެ.

ޕީޕީއެމްގެ ސަރުކާރު ބަދަލުވުމާ އެކު މުއާޒު ވެސް އެ ޕާޓީއާ ދުރަށް ޖެހުނެވެ. އެކަމަކު، މި ފަހުން އަނެއްކާވެސް ސަރުކާރަށް ތާއީދުކޮށް ސޯޝަލް މީޑިއާގައި ވާހަކަ ދައްކަވަ އެވެ.