ޓެކުހަށް މަކަރު ހެދުމުގެ ތުހުމަތުގައި ކާނި ހޮޓެލްސް އަށް ދަައުވާ ކުރަން ފޮނުވައިފި

ރާއްޖޭގައި އެންމެ ފުޅާ ދާއިރާއެއްގައި ގެސްޓްހައުސް ވިޔަފާރި ކުރަމުން އަންނަ ކާނި ހޮޓެލްސްގެ ވެރިންނަށް ދައުވާކުރަން ޓެކްސް އިދާރާ، މީރާ އިން ޕްރޮސެކިއުޓާ ޖެނެރަލް އޮފީހަށް ފޮނުވައިފި އެވެ.

މާފުށީގައި ހިންގާ ހަތަރު ގެސްޓްހައުސްގެ ވެރިންނަށް ކުރަނީ ގަސްދުގައި ޓެކުހަށް މަކަރު ހެދުމުގެ ދައުވާ އެވެ.

ޓެކްސް ދެއްކުމުގައި އޮޅުވާލީ ޖެނުއަރީ 2019 އިން ސެޕްޓެމްބަރު 2022، އާ ދެމެދު، ކާނި ހޮޓެލްސް އިން ހިންގާ "ކާނި ޕާމް ބީޗް" އާއި "ކާނި ގްރޭންޑް ސީވިއު" އާއި "ކާނި ވިލެޖް" އާއި "ކާނި ބީޗް" އިން ދައްކަން ޖެހޭ ޓެކްސްތަކަށް ކަމަށް މީރާ އިން ބުންޏެވެ.

އެ މައްސަލައިގައި، ކާނި ހޮޓެލްސް ވިޔަފާރީގައި ހިމެނޭ ދެ ކުންފުނި ކަމަށްވާ ކާނި ހޮޓެލްސް އެންޑް ޓުއާސް ޕްރައިވެޓް ލިމިޓެޑާއި އަސްނާ އިންވެސްޓްމަންޓްސް ޕްރައިވެޓް ލިމިޓެޑާއި ކުންފުނިތަކުގެ ދެ ޑިރެކްޓަރުން ކަމަށްވާ އަބްދުﷲ ނަޝީދު އާއި އާމިނަތު އާސިމާ ސަލީމްގެ އިތުރުން ވިޔަފާރީގެ އެކައުންޓްސް މަސައްކަތުގައި އިސްކޮށް ހުންނެވި އައިޝަތު ރަޒުނާގެ މައްޗަށް ވެސް ދައުވާކޮށްދޭން އެދި ޕީޖީ އޮފީހަށް ފޮނުވާފައިވެ އެވެ.

މީރާ އިން ބުނެފައިވަނީ އަށްލައްކަ ޑޮލަރު (13.3 މިލިއަން ރުފިޔާ) ކާނި ހޮޓެލްސް އިން އިތުރަށް ދައްކަން ޖެހޭ ކަމަށް ޓެކްސް އޮޑިޓުތަކުން ފާހަގަކުރެވިފައިވެ އެވެ.

ކާނި ހޮޓެލްސް އަކީ ގެސްޓްހައުސް ވިޔަފާރިކުރާ ކުންފުނިތަކުގެ ތެރެއިން އެންމެ ގިނަ ޓެކްސް ދައްކާ ކުންފުންޏެވެ. މިއަހަރުގެ ފުރަތަމަ ހަތަރު މަހު އެ ކުންފުނިން ވަނީ 4.1 މިލިއަން ޑޮލަރު (64 މިލިއަން ރުފިޔާ) ގެ އާމްދަނީއެއް ހޯދައިފަ އެވެ.

ކާނި ކުންފުނީގެ ވެރިޔާ އަބްދުﷲ ނަޝީދަކީ، ނެޝަނަލް ހޮޓެލްސް އެންޑް ގެސްޓްހައުސް އެސޯސިއޭޝަން (އެންއެޗްޖީއޭ) ގެ ރައީސް އެވެ. އެންމެ ފުޅާ ދާއިރާއެއްގައި ގެސްޓްހައުސް ވިޔަފާރި ކުރާ އެ ކުންފުނީގެ ހަތަރު ހޮޓަލުގައި 490 އެނދު ހުންނަ އިރު އެ ހޮޓަލުގެ ދަށުން އއ. އުކުޅަހުގައި އަންނަނީ 350 އެނދުގެ ހޮޓަލެއް އެޅުމުގެ މަސައްކަތް ކުރަމުންނެވެ. އަދި ކުންފުނިން މިހާރު ވަނީ ރިސޯޓު ވިޔަފާރިއަށް ވެސް ވަދެފަ އެވެ. ޓޫރިޒަމް މިނިސްޓްރީން ވަނީ ރިސޯޓެއް ހެދުމަށް އެ ކުންފުންޏަށް ވ. އަތޮޅުގެ އެންމެ ބޮޑު ސޭންޑްބޭންކް "ބޮޑުފިނޮޅު" ހަވާލުކޮށްފަ އެވެ.

މީރާ އިން ބުނީ، ގްރީން ޓެކްސް އާއި ޖީއެސްޓީ އާއި ބީޕީޓީ އާއި އިންކަމް ޓެކްސް ބަޔާނަށް ދޮގު މައުލޫމާތު ހިމަނާފައިވާ ކަމަށް ތުހުމަތު ކުރެވިގެން އެކަން ބެލުމުން ގަސްދުގައި ޓެކްސް ދެއްކުމުން އެއް ކިބާވުމުގެ ނިޔަތުގައި އެކަން ކޮށްފައިވާ ކަމަށް ތަހުގީގަށް ފެނުނު ކަމަށެވެ.

މީރާއިން ބުނީ، ކާނި ހޮޓެލްސްއާ ގުޅޭ ވިޔަފާރިން މީރާއަށް ހުށަހަޅައިފައިވާ ޓެކްސް ބަޔާންތަކުގައި އެ ވިޔަފާރިއަށް އަންނަ އެންމެހައި ގެސްޓުންގެ މައުލޫމާތު ހިމަނައިފައެއް ނުވެ އެވެ. އެގޮތުން ބޭރުގެ ޓުއަ އޮޕަރޭޓަރުން މެދުވެރިކޮށް އަދި ފްރީ އިންޑިޕެންޑެންޓް ޓްރެވެލާސް (އެފްއައިޓީ)ގެ ގޮތުގައި އަންނަ ގެސްޓުންގެ މައުލޫމާތާއި އާމްދަނީ ރިޕޯޓުކޮށްފައި ނުވާކަން ތަހުގީގަށް އެނގޭ ކަމަށެވެ.