އަރުހަމްގެ މަރަށް 12 އަހަރު: ޝަރީއަތް އަލުން ފަށައިފި

މީގެ 12 އަހަރު ކުރިން ލޮރެންޒޯ ޕާކް ތެރޭގައި ތޫނު އެއްޗެހިން ހަމަލާދީ އަހުމަދު އަރުހަމް މަރާލި މައްސަލައިގައި ކުށް ސާބިތުނުވެ ސަލާމަތްވި މީހުންގެ ޝަރީއަތް ކްރިމިނަލް ކޯޓުން އަލުން ފަށައިފި އެވެ.

މެއި، 2012 ގައި ލޮރެންޒޯ ޕާކް ތެރޭގައި އަރުހަމް މަރާލާފައި އޮއްވައި ފެނުނު މައްސަލައިގައި ދައުލަތުން ދައުވާކުރީ ލ. މާވަށު އެވާބްލޫގޭ މުހައްމަދު ވިސާމާއި އެރަށު އަސަރީގޭ މަންސޫރު ޔޫސުފާއި ގދ. ގައްދޫ ގުންޒަރު، މުހައްމަދު ސުފްޔާންގެ އިތުރުން މއ. ސީނަރީވިއު އާތިފް ރަޝީދުގެ މައްޗަށެވެ.

އޭގެ ތެރެއިން ވިސާމްގެ މައްޗަށް ކުށް ސާބިތުވެ، އޭނާގެ މައްޗަށް ކްރިމިނަލް ކޯޓުން 2016 ވަނަ އަހަރު މަރުގެ ހުކުމް އިއްވިޔަސް، ދެން ތިބި މީހުންގެ މައްޗަށް ކުށް ސާބިތުނުވާ ކަމަށް އޮތީ ހުކުމްކޮށްފަ އެވެ.

އެ މައްސަލަ ދައުލަތުން އިސްތިއުނާފް ކުރުމުން ހައި ކޯޓުން މިދިޔަ އަހަރު ފަހުކޮޅު ކުރި ހުކުމުގައި ވަނީ އެ ތިން މީހުންގެ މައްޗަށް އަލުން ޝަރީއަތް ހިންގަން ކްރިމިނަލް ކޯޓަށް އަންގައިފަ އެވެ.

އެ އެންގުމަށް ގާތްގަނޑަކަށް އަހަރެއްވީ ފަހުން މިއަދު ކްރިމިނަލް ކޯޓުގައި މައްސަލައިގެ ފުރަތަމަ އަޑުއެހުން ވަނީ ބާއްވައިފަ އެވެ. އެ އަޑުއެހުމުގައި ބައިވެރިވެފައިވަނީ ދައުވާ ލިބޭ އާތިފް ރަޝީދު އެކަންޏެވެ. އަނެއް ދެ މީހުންނަށް އެކި ސަބަބުތަކާ ހުރެ އަޑުއެހުމަށް ހާޒިރެއް ނުވެވުނެވެ.

މި މައްސަލަ ބައްލަވާ ގާޒީ އިބްރާހިމް ޒިހުނީ ވަނީ ވަކީލަކު ހޯދަން އާތިފަށް ފުރުސަތު ދެއްވައިފަ އެވެ. އަދި ދެން ތިބި ދެ މީހުންނަށް ވެސް ފުރުސަތު އިދާރީ ގޮތުން ދިނުމަށް ނިންމައިފަ އެވެ.

ތިން މީހުންނާ ގުޅޭ ގޮތުން ހައި ކޯޓުން ކުރި ހުކުމްގައި ބުނެފައިވަނީ ކުށް ސާބިތުނުވާ ކަމަށް ކްރިމިނަލް ކޯޓުން ނިންމި ނިންމުމުގައި އެކަށީގެންވާ ސަބަބުތަކެއް ބަޔާން ކޮށްފައިނުވާ ކަމަށެވެ. އެގޮތުން އެ މީހުންނާ ދެކޮޅަށް ގިނަ ހެކިތަކެއް ހުށަހަޅާފައި ވިޔަސް، އެ މީހުންނާ ދެކޮޅަށް ހެކި ނެތް ކަމަށް ބުނެ ދަށު ކޯޓުގެ ހުކުމުގައި ބަޔާން ކޮށްފައި އޮތީ އެންމެ ތިން ފޮޅުވަތް ކަމަށް ހައި ކޯޓުގެ ހުކުމުގައިވެ އެވެ.

ހުކުމުގައި ވަނީ ހައި ކޯޓަކީ ދަށު ކޯޓުތަކެކޭ އެއްފަދައިން މައްސަލައިގައި ކަން ހިނގި ގޮތް ބަލައި، ހެކި ވަޒަންކުރަން ޖެހޭ ކޯޓެއް ނޫން ކަމަށެވެ. އަދި ދަށު ކޯޓުން ބަލަންޖެހޭ ކަންކަން އެކަށީގެންވާ މިންވަރަށް ބަލާފައިނުވާ ނަމަ އެ މައްސަލައެއް އަލުން ބެލުމަށް ދަށު ކޯޓަށް ފޮނުވުމުގެ ބާރު ހައި ކޯޓަށް އޮންނަކަން ހުކުމުގައި ފާހަގަކޮށްފައިވެ އެވެ.

ދަރުމަވަންތަ ސްކޫލުގައި ކިޔަވަމުންދިޔަ، އުމުރުން 14 އަހަރުގެ އަރުހަމް މަރާލާފައިވަނީ ލޮރެންޒޯ ޕާކް ތެރޭގައި ދަންވަރު އޭނާ ނިދާފައި އޮއްވައި ގްރޫޕަކުން ގޮސް ހަމަލާ ދީގެންނެވެ. އޭނާގެ ހަށިގަނޑު ފެނުނީ ޖެހިގެން އައި ދުވަހުގެ ހެނދުނު އެވެ. ފުލުހުން ބުނެފައިވާ ގޮތުން އަރުހަމް މަރާލީ ދެ ގްރޫޕެއްގެ ދެމެދުގައި އޮތް ހަމަނުޖެހުމެއްގެ ބަދަލު ހިފުމުގެ ގޮތުންނެވެ.

އަރުހަމްގެ މަރާ ގުޅިގެން ދައުވާކުރި މީހުންގެ އިތުރުން ވެސް ދެ މީހެއްގެ މައްޗަށް ދައުވާކޮށްދޭން އެދި ޕްރޮސެކިއުޓާ ޖެނެރަލްގެ އޮފީހަށް ފުލުހުން ފޮނުވި އެވެ. އެކަމަކު، ހެކި ނެތުމުގެ ސަބަބުން އެ ދެ މީހުންނާ ދެކޮޅަށް ދައުވާއެއް ނުކުރެ އެވެ.