ނައީމާ މަރާލީ ސިހުރު ހަދާ ކަމަށް ތުހުމަތުކޮށް ކަން ސާބިތުކުރަން ހެކި ހުށަހަޅައިފި

ނ. މަނަދޫގައި މިދިޔަ އަހަރު އަނިޔާވެރި ގޮތަކަށް މަރާލާފައި އޮއްވާ ފެނުނު ނައީމާ މޫސާގެ މަރާލީ އޭނާއަކީ ސިހުރު ހަދާ މީހެއް ކަމަށް ތުހުމަތުކޮށްގެން ކަން ސާބިތުކުރަން ދައުލަތުން މިއަދު ހެކި ހުށަހަޅައިފި އެވެ.

ނައީމާ ދިރިއުޅުނު ގޭގައި މިދިޔަ އަހަރުގެ އޭޕްރީލް މަހު އޭނާއަށް ތޫނު އެއްޗެހިން ހަމަލާދީ މަރާލާފައި އޮއްވާ ފެނުނު މައްސަލާގައި ދައުލަތުން ދައުވާކުރަނީ އެރަށު ފިނިފެންމާގޭ އަބްދުލްވާހިދު ރިފާސް އާއި އެރަށު ފެހިވިލާގޭ އަހުޒަމް އަބްދުއްޝުކޫރާއި އެރަށު ވިނަރެސް ހަސަން ފަވާޒުގެ މައްޗަށެވެ.

އެ މައްސަލާގައި، ތޫނު އެއްޗެއް ބޭނުން ކޮށްގެން ގަސްދުގައި މީހަކު މެރުމުގެ ދައުވާ އާއި އަދުލު އިންސާފު ގާއިމްކުރަން ހުރަސް އެޅުމުގެ ދައުވާ އާއި މައްޔިތާގެ ބޭނުން ނަހަމަ ގޮތުގައި ހިފުމުގެ ދައުވާއެއް ވެސް ދައުލަތުން ދައުވާއެއް ކުރެ އެވެ.

ކްރިމިނަލް ކޯޓުގައި މިއަދު ބޭއްވި އަޑުއެހުމުގައި ދައުލަތުން ވަނީ ފަވާޒުގެ މައްޗަށް ކުރާ ދައުވާތައް ސާބިތު ކުރަން ހުށަހަޅާ ހެކިތައް ހާމަކޮށްފަ އެވެ. އޭގެ ތެރޭގައި ފަވާޒަކީ ނައީމާ މަރާލުމުގައި އެންމެ އިސްކޮށް ހަރަކާތްތެރިވި މީހާ ކަމާއި އޭނާ އެކަން ކޮށްފައިވަނީ ނައީމާއަކީ ސިހުރު ހަދާ މީހެއް ކަމަށް ބުނެކަން ސާބިތު ކުރަން ވަނީ ހެކި ހުށަހަޅައިފަ އެވެ.

އެގޮތުން ނައީމާ އަކީ ސިހުރު ހަދާ މީހެއް ކަމަށް ބުނެ ދައްކަމުންދިޔަ ވާހަކަތައް ނ. މަނަދޫގައި ވަރަށް ގިނަ ބަޔަކު ގަބޫލުކޮށް، އެ ވާހަކަތައް ދައްކަމުން ދިޔަކަން ސާބިތު ކުރަން ވެސް ދައުލަތުން ހެކި ހުށަހެޅި އެވެ.

މި މައްސަލާގައި ދެން ދައުވާލިބޭ ދެ މީހުން ނައީމާ މަރާލުމުގައި އަމަލީ ގޮތުން ބައިވެރިވެފައިވާ ކަމަށް ދައުލަތުން ތުހުމަތު ކުރާއިރު ފަވާޒަކީ ނައީމާ މަރާލަން ރާވައި، އެކަން ހިންގި މީހާ ކަމަށް ދައުލަތުން ބުނެ އެވެ. މި މައްސަލާގެ ތަހުގީގު މަރުހަލާގައި ރިފާސް އާއި އަހުޒަމް ކުށަށް އިއުތިރާފުވެ، ކަން ހިނގި ގޮތް ކިޔައިދީފައިވެ އެވެ.

މާލެއިން ފަވާޒު ހައްޔަރުކުރީ އެ ދެ މީހުން ކިޔައިދިން ކަންކަމުގެ މައްޗަށް ބަލައިގެންނެވެ. ނަމަވެސް ކޯޓުގައި އެ ދެ މީހުން ވެސް ވަނީ އިއުތިރާފު އަނބުރާ ގެންގޮސް، ދައުވާތަކަށް އިންކާރުކޮށްފަ އެވެ. އަދި ފަވާޒު ވެސް ވަނީ ދައުވާތަކަށް އިންކާރުކޮށްފަ އެވެ.

ދައުލަތުން ވަނީ ރިފާސް އާއި އަހުޒަމްގެ އިއުތިރާފު ބަޔާން ވެސް ފަވާޒާ ދެކޮޅަށް ހެކީގެ ގޮތުގައި ހުށަހަޅައިފަ އެވެ. އަދި އެ އިއުތިރާފަކީ ކަން ހިނގި ގޮތް ކަން ސާބިތުކުރުމަށާއި އެކަމާ ގުޅުން ހުރި އެހެން ހެކި ވެސް ދައުލަތުން ހުށަހެޅި އެވެ.

މިކަމަށް ފަވާޒުގެ ވަކީލް ވަނީ އިއުތިރާޒުކޮށްފަ އެވެ. ވަކީލް ވިދާޅުވާ ގޮތުގައި މަރުގެ މައްސަލަތަކުގައި އަމަލު ކުރާ ގޮތަކީ ތަހުގީގު އިއުތިރާފުވީ ނަމަވެސް، އެ އިއުރިރާފު އަނބުރާ ގެންދާ ހާލަތުގައި ވެސް ދައުވާ ސާބިތު ކުރަން ދައުވާކުރާއިރު ހެކި ހުށަހެޅުމެވެ.

ނަމަވެސް، ދައުލަތުން މި މައްސަލާގައި އެގޮތަށް ހެކި ހުށަހަޅާފައެއް ނުވެ އެވެ. ދައުލަތުން ހެކި ހާމަ ކުރުމުގެ މަރުހަލާގައި އިއުތިރާފާ ގުޅޭ ބައެއް ހެކިތައް ހާމަކޮށްފައިވެ އެވެ. ދައުލަތުގެ ވަކީލް ވިދާޅުވީ އެއީ އާ ހެއްކެއް ހުށަހެޅުން ނޫން ކަމަށާއި އެ ހެކިތަކަކީ ކުރިން ވެސް ހުށަހަޅާފައިވާ ހެކިތައް ކަމަށެވެ.

ދައުލަތުން ބުނާ ގޮތުގައި ނައީމާ ދިރިއުޅޭ ގެއަށް އޭނާ މަރާލުމަށް ރިފާސް އާއި އަހުޒަމް އެތަނަށް ކާރެއްގައި ގެންދިޔައީ ފަވާޒެވެ. އަދި ނައީމާ މަރާލުމަށް ފަހު އެ ދެ މީހުން އެ ސަރަހައްދުން ގެންދިޔައީ ވެސް ފަވާޒުގެ ކާރުގަ އެވެ. އޭގެ ފަހުން އެ އަމަލު ހިންގަން ގެންގުޅުނު ބައެއް ތަކެތި ވަޅުލައި ނައްތާލަން މަސައްކަތް ކޮށްފައިވާ ކަމަށް ދައުލަތުން ބުންޏެވެ.

ހަމަލާދޭން ބޭނުންކުރި ތަކެތި ވެސް ރިފާސް އާއި އަހުޒަމް ތަހުގީގުގައި ކިޔައިދިނުމުން، އެ ތަކެތި ފުލުހުން ހޯދާފައިވާއިރު އެ މަންޒަރުތައް ފުލުހުން ވަނީ ވީޑިއޯކޮށްފަ އެވެ. އަދި އެ ވީޑިއޯ ވެސް ހެކީގެ ގޮތުގައި ހުށަހެޅި އެވެ. އެ ތަކެތިން ނައީމާގެ ޑީއެންއޭ ފެނިފައިވެ އެވެ.

ފަވާޒުގެ ފަރާތުން ދިފާއުގައި ވެސް ގިނަ ހެކިތަކެއް ހުށަހަޅާފައިވެ އެވެ.

ޝަރީއަތް ފެށުމުގެ ކުރިން ހުށަހަޅާ ހުށަހެޅުންތައް ހުށަހަޅަން ބޭނުންވާ ކަމަށް ދެ ފަރާތުން ވެސް ބުނެފައިވާއިރު، އެކަމަށް ވަނީ ފުރުސަތު ދީފަ އެވެ. އަދި ރިފާސްއަށް ކުރާ ދައުވާތަކުގައި މީގެ ދެ ދުވަސް ކުރިން ބޭއްވި އަޑުއެހުމުގައި ވެސް އެ ފުރުސަތު ދީފައިވެ އެވެ.

ނައީމާ މަރާލީ އޭނާއަކީ ސިހުރު ހަދާ މީހެއް ކަމަށް ތުހުމަތުކޮށް ކަމަށް ރިފާސް އާއި އަހުޒަމް ތަހުގީގުގައި ބުނެފައިވީ ނަމަވެސް އޭނާއަކީ އެފަދަ ކަމެއް ކުރާ މީހެއް ކަމުގެ ހެއްކެއް ނެތް ކަމަށް ފުލުހުން ކުރިން ވަނީ ބުނެފަ އެވެ.