"އަމީނަށް ހެދި ގޮތް" ހަދަންޖެހޭ ބުނުން ދިފާއުކުރުމަކީ ނުރައްކާތެރި އަމަލެއް: ޕީއެންސީ

ރައީސް ޑރ. މުހައްމަދު މުއިއްޒަށް ރާއްޖޭގެ ފުރަތަމަ ރައީސް މުހައްމަދު އަމީނަށް ހެދި ގޮތް ހަދާފާނެ ކަމަށް ބުނެ އެމްޑީޕީގެ އެކްޓިވިސްޓަކު ދެއްކި ވާހަކައެއް ދިފާއުކޮށް އެ ޕާޓީގެ ޗެއާޕާސަން ފައްޔާޒް އިސްމާއިލް ވާހަކަ ދެއްކެވުމަކީ ނުރައްކާތެރި އަމަލެއް ކަމަށް ސަރުކާރު ހިންގާ ޕީއެންސީން މިރޭ ބުނެފި އެވެ.

ޕީއެންސީން ނެރުުނު ބަޔާނެއްގައި ބުނީ ރައީސް އަމީނާ މެދު ކަން ހިނގައިދިޔަ ގޮތަކީ ރާއްޖޭގެ ތާރީހުގެ އަނދިރި ސަފުހާއެއް ކަމަށެވެ.

އަދި، މިއަދު ގާއިމްކުރެވިފައިވާ ދުސްތޫރީ ނިޒާމުގެ އެންމެ ބޮޑު ބޭނުމަކީ ސިޔާސީ ކަންކަމުގެ ތެރެއަށް އަނިޔާވެރިކަމާއި ހަމަނުޖެހުން ނުވައްދައި، ޑިމޮކްރެޓިކް ހަމަތަކުގެ މަތިން ކަންކަން ކުރިއަށް ގެންދިއުން ކަމަށް ޕީއެންސީން ބުންޏެވެ.

އެއާ ހިލާފަށް އާންމުންގެ މެދުގައި ނަފްރަތު އުފެދޭ ގޮތަށް އެމްޑީޕީގެ އެކްޓިވިސްޓަކު ދެއްކި ވާހަކަ، އެ ޕާޓީގެ ޗެއާޕާސަން ފައްޔާޒް ކުށްވެރި ނުކުރައްވައި، ދިފާއު ކުރައްވައި ހިތްވަރު ދިނުމަކީ ނުރައްކާތެރި އަމަލެއްގެ ގޮތުގައި ވެސް ޕީއެންސީން ސިފަ ކުރި އެވެ.

ޕީއެންސީން ވަނީ މިއީ ޓެރަރިޒަމްގެ އަމަލެއްގެ ގޮތުގައި ސިފަކޮށް، އެ މައްސަލަ ބަލަން ގޮވާލައިފަ އެވެ.

"ގާނޫނުއަސާސީގެ ދިފާއުގައި" ޖަލްސާއަށް ތައްޔާރުވާން ކުޅުދުއްފުށީގައި އެމްޑީޕީން ބޭއްވި ޖަލްސާގައި ކުރިން ޕީޕީއެމްގައި ވަރަށް ހަރަކާތްތެރިކޮށް އުޅުނު އެކްޓިވިސްޓަކު ވަނީ ކުރީގެ ރައީސް އަމީންގެ ވެރިކަމާއި އަމީންގެ ނިމުން އައި ގޮތާ ގުޅުވައިގެން މިހާރުގެ ސަރުކާރާ ބެހޭ ގޮތުން ވާހަކަ ދައްކައިފަ އެވެ.

އެއީ ރައީސް މުއިއްޒު އަވަހާރަކޮށްލާ ވާހަކަ ކަމަށް ބުނެ އެ ވާހަކަތަކަށް ފާޑުކިޔުން އަމާޒުވެފައި އޮއްވައި އިއްޔެ ބޭއްވި ނޫސްވެރިންގެ ބައްދަލުވުމުގައި ފައްޔާޒު ވިދާޅުވީ "ރައްޔިތުންނަށް ދެރަ ދިނީމަ ހަދަން ޖެހޭނީ އަމީނަށް ހެދި ގޮތް" ކަމަށެވެ.

އެކަމަކު ފައްޔާޒު ވިދާޅުވި ގޮތުގައި ޕޯޑިއަމެއްގައި މީހަކު އެގޮތަށް ބުނެފައި ވަނީ މިހާރުގެ ރައީސަށް ނަސޭހަތެއް ދިނުމުގެ ގޮތުންނެވެ.