ފައްޔާޒު ވަނީ ޓެރަރިޒަމަށް ހިތްވަރުދީފައި، ސީރިއަސްކޮށް މައްސަލަ ބަލަންޖެހޭ: އަބްދުއްރަހީމް

ރައީސް ޑރ. މުހައްމަދު މުއިއްޒަށް ރާއްޖޭގެ ފުރަތަމަ ރައީސް މުހައްމަދު އަމީނަށް ހެދި ގޮތް ހަދާފާނެ ކަމަށް ބުނެ އެމްޑީޕީގެ އެކްޓިވިސްޓަކު ދެއްކި ވާހަކައެއް ދިފާއުކޮށް އެމްޑީޕީގެ ޗެއާޕާސަން ފައްޔާޒް އިސްމާއިލް ވާހަކަ ދެއްކެވުމަކީ ޓެރަރިޒަމަށް ހިތްވަރު ދިނުން ކަމަށް ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވެއްޖެ އެވެ.

އެކްސްގައި ކުރެއްވި ޕޯސްޓެއްގައި އަބްދުއްރަހީމް ވިދާޅުވީ ފައްޔާޒު ދެއްކެވި ވާހަކައަކީ ކަނޑައެޅިގެން ޓެރަރިޒަމަށް ހިތްވަރުދިނުން ކަމަށާއި ކަމާގުޅޭ މުއައްސަސާތަކުން ވަރަށް ސީރިއަސްކަމާ އެކު ވަގުތުން އެކަން ބަލަންޖެހޭ ކަމަށެވެ.

"އަމުދުން އިދިކޮޅު ސިޔާސީ ޕާޓީގެ އެންމެ އިސް މަގާމުގައި ހުންނެވި ބޭފުޅަކު މިފަދަ ވާހަކައެއް ދެއްކުމަކީ އާދައިގެ ކަމެއް ކަމަށް ބަލައިގެންނުވާނެ،" މަޖިލީހުގެ ރައީސް ވިދާޅުވި އެވެ.

ފައްޔާޒުގެ ވާހަކަތަކާ ގުޅިގެން ހޯމް މިނިސްޓަރު އަލީ އިހުސާން ވިދާޅުވީ ރާއްޖެއަކީ ހިޔާލުފާޅުކުރުމުގެ މިނިވަންކަން ނުހަނު ފުޅާކޮށް ކަށަވަރުކޮށްދޭ ގައުމެއް ކަމަށާއި ނަމަވެސް އެ ހައްގުގެ ބޭނުންކުރަން ވާނީ ޒިންމާދާރުކަމާ އެކު ކަމަށެވެ. ވަކިން ހާއްސަކޮށް ދައުލަތުގެ އިސް މަގާމުތައް ފުރުއްވާފައިވާ ބޭފުޅުން އަދި ސިޔާސީ ޕާޓީތަކުގެ ވެރިންނަކީ މިކަންކަމުގައި ނަމޫނާ ދައްކަވަންޖެހޭ ބޭފުޅުން ކަމަށް މިނިސްޓަރު ވިދާޅުވި އެވެ.

"ގާނޫންތަކާ ހިލާފަށް މީހުން މެރުމަށާއި އަނިޔާވެރިވުމަށް ގޮވާލުމަކީ ވަރަށް ޒިއްމާދާރުކަން ކުޑަ އަމަލެއް،" މިނިސްޓަރު ވިދާޅުވި އެވެ.

"ގާނޫނުއަސާސީގެ ދިފާއުގައި" ޖަލްސާއަށް ތައްޔާރުވާން ކުޅުދުއްފުށީގައި އެމްޑީޕީން ބޭއްވި ޖަލްސާގައި ކުރިން ޕީޕީއެމްގައި ވަރަށް ހަރަކާތްތެރިކޮށް އުޅުނު އެކްޓިވިސްޓަކު ވަނީ ކުރީގެ ރައީސް އަމީންގެ ވެރިކަމާއި އަމީންގެ ނިމުން އައި ގޮތާ ގުޅުވައިގެން މިހާރުގެ ސަރުކާރާ ބެހޭ ގޮތުން ވާހަކަ ދައްކައިފަ އެވެ.

އެއީ ރައީސް މުއިއްޒު އަވަހާރަކޮށްލާ ވާހަކަ ކަމަށް ބުނެ އެ ވާހަކަތަކަށް ފާޑުކިޔުން އަމާޒުވެފައި އޮއްވައި އިއްޔެ ބޭއްވި ނޫސްވެރިންގެ ބައްދަލުވުމުގައި ފައްޔާޒު ވިދާޅުވީ "ރައްޔިތުންނަށް ދެރަ ދިނީމަ ހަދަން ޖެހޭނީ އަމީނަށް ހެދި ގޮތް" ކަމަށެވެ.

އެކަމަކު ފައްޔާޒު ވިދާޅުވި ގޮތުގައި ޕޯޑިއަމެއްގައި މީހަކު އެގޮތަށް ބުނެފައި ވަނީ މިހާރުގެ ރައީސަށް ނަސޭހަތެއް ދިނުމުގެ ގޮތުންނެވެ.

އެކަމަށް ރައްދު ދެއްވައި އަމީންގެ ކާފަދަރިކަނބަލުން އަދި އެމްޑީޕީގެ ސަރުކާރުގައި، އިނގިރޭސިވިލާތުގައި ހުންނެވި ރާއްޖޭގެ ސަފީރު ފަރަހަނާޒް ވިދާޅުވީ އިސްލާމީ ޝަރުއީ ހަމަތަކުން ބޭރުން މީހަކު މަރާލުމަކީ ދުވަހަކު ވެސް ގަބޫލުކުރެވޭނެ ކަމެއް ނޫން ކަމަށެވެ. އަދި ކޮންމެ ގޮތަކަށް ކަމެއް ކުރިޔަސް ބަޔަކު ނިކުމެ މީހަކު މަރާލުމަކީ އިސްލާމްދީން ހުއްދަކުރާ ކަމެއް ނޫން ކަމަށް ވިދާޅުވި އެވެ.

ރާއްޖޭގެ ފުރަތަމަ ޖުމްހޫރިއްޔާގެ ފުރަތަމަ ރައީސް އަމީންގެ ވެރިކަން ނިމުމަކަށް ގެނައީ އޯގަސްޓް 30، 1953 ގައި އެ މަނިކުފާނު ސްރީ ލަންކާއިން އެނބުރި ވަޑައިގަތުމާ އެކު އޭރު ސިޔާސީ ކަންކަމުގައި އިސްކޮށް ތިއްބެވި ބައެއް ބޭފުޅުންނާ އެކު ރައްޔިތުން ނުކުމެ އެވެ. އަމީން މާލެ އަރައިވަޑައިގަތަނުދީ ދޫނިދޫގައި ބަންދުކޮށް ވެރިކަން ބަދަލުކޮށްލީ އެވެ.

އޭގެ ހަތަރު މަސް ފަހުން އަމީން އަވަހާރަވީ ދޫނިދޫގައި ބަންދުކޮށްފައި ހުއްޓާ މާލެ ވަޑައިގެން ބަޣާވާތްކުރައްވަން އުޅުއްވި ކަމަށް ތުހުމަތުކޮށް ހަވަރު އެއްކޮށް، އަމީނަށް ދިން ލާއިންސާނީ ބޮޑެތި އަނިޔާތަކަށް ފަހުގަ އެވެ. ސިފައިންގެ ތެރޭގައި އަމީން ހުންނަވަނިކޮށް ހަވަރު އެންމެން ވަދެ އަމީނަށް ހަމަލާދޭން ފަށައި ދަމާފައި ގެންގޮސް ގުޅަކުޅޭ ފަސްގަނޑަށް ނެރެ އެތައް އިރަކު، ރަހުމުކުޑަ އެތައް އަނިޔާއެއް ދިނެވެ.

އަމީން ދީދީ ކުރައްވަން އުޅުއްވީ ބަޣާވާތެއް ކަމަށް ބަލައި، އެ ހާލުކޮޅުގައި އޮންނަވަނިކޮށް ހަމަ އެ ދުވަހު، ފަށްޖެހި އެނދެއްގައި ބޮޑު ބަނޑޭރިގެއަށް އަމީން ދީދީ ގެންދަވައި، ހިނދުން ހިނދަށް ތަހުގީގު ނިންމައި، އަމީން ކުށަށް "އިއުތިރާފުވެ" ވަޑައިގަތް ކަމަށް ނިންމައި ހަވީރު 4:00 ގައި އަމީނަށް އުމުރު ދުވަހަށް އަރުވާލުމުގެ ހުކުމެއް އިއްވެވި އެވެ.

އެ ހާލުކޮޅުގައި އޮންނަވަނިކޮށް ވެސް ހުކުމް ތަންފީޒުކުރަން ކ. ގާފަރަށް އަމީން އަރުވާލި އެވެ. އެކަމަކު ހާލުކޮޅު ގޯސްވެ ފަހުން ކ. ވިހަމަނާފުށި [މިހާރުގެ ކުރުނބާ މޯލްޑިވްސް] އަށް އަމީން ބަދަލުކުރި އެވެ. އޭގެ ދުވަސްކޮޅެއް ފަހުން، ޖެނުއަރީ 19، 1954 ގައި އަމީން އަވަހާރަވީ އެވެ.