"އަމީނަށް ހެދި ގޮތް" ދިފާއުކުރުމުން ކާފަދަރިކަނބަލުން ރައްދު ދެއްވައިފި

ރައީސް ޑރ. މުހައްމަދު މުއިއްޒަށް ރާއްޖޭގެ ފުރަތަމަ ރައީސް މުހައްމަދު އަމީނަށް ހެދި ގޮތް ހަދާފާނެ ކަމަށް ބުނެ އެމްޑީޕީގެ އެކްޓިވިސްޓަކު ދެއްކި ވާހަކައެއް ދިފާއުކޮށް އެމްޑީޕީގެ ޗެއާޕާސަން ފައްޔާޒް އިސްމާއިލް ވާހަކަ ދެއްކެވެމުން އަމީންގެ ކާފަ ދަރިކަނބަލުން ފަރަހަނާޒް ފައިސަލް ރައްދު ދެއްވައިފި އެވެ.

އެމްޑީޕީން މިއަދު ބޭއްވި ނޫސްވެރިންގެ ބައްދަލުވުމެއްގައި ފައްޔާޒް ވަނީ ކުޅުދުއްފުށީގައި އެ ޕާޓީން ބޭއްވި ޖަލްސާއެއްގައި މީހަކު އަމީންގެ ވެރިކަމާއި އަމީންގެ ނިމުން އައި ގޮތާ ގުޅުވައިގެން މިހާރުގެ ސަރުކާރާ ބެހޭ ގޮތުން ވާހަކަ ދައްކައިފަ އެވެ. އެއީ ރައީސް މުއިއްޒު އަވަހާރަކޮށްލާ ވާހަކަ ކަމަށް ބުނެ އެ ވާހަކަތަކަށް ފާޑުކިޔުން އަމާޒުވެފައި އޮއްވައި ފައްޔާޒު ވިދާޅުވީ "ރައްޔިތުންނަށް ދެރަ ދިނީމަ ހަދަން ޖެހޭނީ އަމީނަށް ހެދި ގޮތް" ކަމަށެވެ.

އެކަމަކު ފައްޔާޒު ވިދާޅުވި ގޮތުގައި ޕޯޑިއަމެއްގައި މީހަކު އެގޮތަށް ބުނެފައި ވަނީ މިހާރުގެ ރައީސަށް ނަސޭހަތެއް ދިނުމުގެ ގޮތުންނެވެ.

"ތި ކުރެއްވި ސުވާލުގައި ކުޅުދުއްފުށި ވާހަކަ ފާހަގަކުރި. ރައްޔިތުންނަށް ދެރަ ދިނީމަ ހަމަ މުހައްމަދު އަމީނަށް ހެދިހެން ހަދަންޖެހޭނީ. އެހެން ކޮން ގޮތެއްތޯ ހަދާނީ. އެެއީ ދިވެހިރާއްޖޭގެ ތާރީހު ދައްކާފައި އޮތް ހަގީގަތް. އަޅުގަނޑު ގަބޫލުކުރާ ގޮތުގައި ކުޅުދުއްފުށީ ޕޯޑިއަމްގައި އެ ބޭފުޅަކު އެހެން އެ ވިދާޅުވީ ރައީސުލްޖުމްހޫރިއްޔާއަކަށް މިއަދު ހުންނެވި ޑރ. މުއިއްޒަށް ނަސޭހަތުގެ ގޮތުން. އެހެން ވިޔަ ނުދޭށޭ އެ ބޭފުޅަކު ވިދާޅުވީ،" ފައްޔާޒު ވިދާޅުވި އެވެ.

އެކަމަށް ރައްދު ދެއްވައި އަމީންގެ ކާފަދަރިކަނބަލުން އަދި އެމްޑީޕީގެ ސަރުކާރުގައި، އިނގިރޭސިވިލާތުގައި ހުންނެވި ރާއްޖޭގެ ސަފީރު ފަރަހަނާޒް ވިދާޅުވީ އިސްލާމީ ޝަރުއީ ހަމަތަކުން ބޭރުން މީހަކު މަރާލުމަކީ ދުވަހަކު ވެސް ގަބޫލުކުރެވޭނެ ކަމެއް ނޫން ކަމަށެވެ. އަދި ކޮންމެ ގޮތަކަށް ކަމެއް ކުރިޔަސް ބަޔަކު ނިކުމެ މީހަކު މަރާލުމަކީ އިސްލާމްދީން ހުއްދަކުރާ ކަމެއް ނޫން ކަމަށް ވިދާޅުވި އެވެ.

އެއާ އެކު ފަރަހަނާޒް ކުރެއްވީ ސުވާލެކެވެ.

"...މިއީ އެމްޑީޕީގެ ރަސްމީ ސްޓޭންޑްތޯޯޯ؟ އެހެން ނަމަ މިއީ ދިރިހުރުމުގެ ހައްގު ހިމެނޭ ގޮތަށް މީހުންގެ އަސާސީ ހައްގުތަކަށް ތެދުވި އެމްޑީޕީއެއް ނޫން،" ފައްޔާޒް ދެއްކެވި ވާހަކައިގެ ވީޑިއޯއާ އެކު ފަރަހަނާޒް އެކްސްގައި ލިޔުއްވާފައިވެ އެވެ.

ރާއްޖޭގެ ފުރަތަމަ ޖުމްހޫރިއްޔާގެ ފުރަތަމަ ރައީސް އަމީންގެ ވެރިކަން ނިމުމަކަށް ގެނައީ އޯގަސްޓް 30، 1953 ގައި އެ މަނިކުފާނު ސްރީ ލަންކާއިން އެނބުރި ވަޑައިގަތުމާ އެކު އޭރު ސިޔާސީ ކަންކަމުގައި އިސްކޮށް ތިއްބެވި ބައެއް ބޭފުޅުންނާ އެކު ރައްޔިތުން ނުކުމެ އެވެ. އަމީން މާލެ އަރައިވަޑައިގަތަނުދީ ދޫނިދޫގައި ބަންދުކޮށް ވެރިކަން ބަދަލުކޮށްލީ އެވެ.

އޭގެ ހަތަރު މަސް ފަހުން އަމީން އަވަހާރަވީ ދޫނިދޫގައި ބަންދުކޮށްފައި ހުއްޓާ މާލެ ވަޑައިގެން ބަޣާވާތްކުރައްވަން އުޅުއްވި ކަމަށް ތުހުމަތުކޮށް ހަވަރު އެއްކޮށް، އަމީނަށް ދިން ލާއިންސާނީ ބޮޑެތި އަނިޔާތަކަށް ފަހުގަ އެވެ. ސިފައިންގެ ތެރޭގައި އަމީން ހުންނަވަނިކޮށް ހަވަރު އެންމެން ވަދެ އަމީނަށް ހަމަލާދޭން ފަށައި ދަމާފައި ގެންގޮސް ގުޅަކުޅޭ ފަސްގަނޑަށް ނެރެ އެތައް އިރަކު، ރަހުމުކުޑަ އެތައް އަނިޔާއެއް ދިނެވެ.

އަމީން ދީދީ ކުރައްވަން އުޅުއްވީ ބަޣާވާތެއް ކަމަށް ބަލައި، އެ ހާލުކޮޅުގައި އޮންނަވަނިކޮށް ހަމަ އެ ދުވަހު، ފަށްޖެހި އެނދެއްގައި ބޮޑު ބަނޑޭރިގެއަށް އަމީން ދީދީ ގެންދަވައި، ހިނދުން ހިނދަށް ތަހުގީގު ނިންމައި، އަމީން ކުށަށް "އިއުތިރާފުވެ" ވަޑައިގަތް ކަމަށް ނިންމައި ހަވީރު 4:00 ގައި އަމީނަށް އުމުރު ދުވަހަށް އަރުވާލުމުގެ ހުކުމެއް އިއްވެވި އެވެ.

އެ ހާލުކޮޅުގައި އޮންނަވަނިކޮށް ވެސް ހުކުމް ތަންފީޒުކުރަން ކ. ގާފަރަށް އަމީން އަރުވާލި އެވެ. އެކަމަކު ހާލުކޮޅު ގޯސްވެ ފަހުން ކ. ވިހަމަނާފުށި [މިހާރުގެ ކުރުނބާ މޯލްޑިވްސް] އަށް އަމީން ބަދަލުކުރި އެވެ. އޭގެ ދުވަސްކޮޅެއް ފަހުން، ޖެނުއަރީ 19، 1954 ގައި އަމީން އަވަހާރަވީ އެވެ