ހެކް ކުރުމާއި ސައިބާ ކްރައިމް ކުށަކަށް ހެދުމުގެ ބިލް ފާސްކޮށްފި

ހުއްދަ ނެތި ކޮމްޕިއުޓަަރާއި ޑޭޓާއަށް އެކްސެސްވުމާއި ސައިބާ ކްރައިމްގެ ކުށްތަކަށް އަދަބު ދެވޭ ގޮތަށް ގާނޫނުލް އުގޫބާތު އިސްލާހުކުރަން ހުށަހެޅި ބިލް ރައްޔިތުންގެ މަޖިލީހުން މިއަދު ފާސްކޮށްފި އެވެ.

ގާނޫނުލް އުގޫބާތަށް އިތުރު ކުރާ ކުށްތަކުގެ އިސްލާހަކީ ކުރީގެ ސަރުކާރުން ތައްޔާރުކޮށް 19 ވަނަ ރައްޔިތުންގެ މަޖިލީހަށް ހުށަހެޅި އިސްލާހެކެވެ. ނަމަވެސް، މިދިޔަ އަހަރު ހުށަހެޅި ބިލާ މެދު އެ މަޖިލީހުގައި ދައުރުގެ ތެރޭގައި ގޮތެއް ނުނިންމަ އެވެ.

އެހެންވެ، މި އިސްލާހު ސަރުކާރުގެ ފަރާތުން މިފަހަރު މަޖިލީހަށް ހުށަހެޅުއްވީ މާފުށީ ދާއިރާގެ ޕީއެންސީ މެންބަރު ހުސެއިން ރިޒާ އެވެ. މަޖިލީހުގެ މިއަދު ޖަލްސާގައި އެ އިސްލާހު ފާސްކުރީ 58 މެންބަރުންގެ ވޯޓުންނެވެ.

އާ ބިލާ އެކު ގާނޫނުލްއުގޫބާތަށް އިތުރުކުރާ ކުށްތައް:

1. ހުއްދަ ނެތި ކޮމްޕިއުޓާ ސިސްޓަމަކަށް އެކްސެސްވުން

2. ކުށެއް ކުރުމަށް މަގުފަހި ކުރުމުގެ ނިޔަތުގައި ހުއްދަ ނެތި ކޮމްޕިއުޓާ ސިސްޓަމަކަށް އެކްސެސްވުން

3. ހުއްދަ ނެތި ކޮމްޕިއުޓާ ޑޭޓާ އިންޓަސެޕްޓް ކުރުން

4. ހުއްދަ ނެތި ކޮމްޕިއުޓާ ސިސްޓަމަކަށް އިންޓަފިއާ ކުރުން

5. ނަހަމަ ގޮތެއްގައި ޑިވައިސްތައް ބޭނުން ކުރުން

6. ސައިބާ ވަޔަލަންސްގެ އަމަލުތައް

7. ކޮމްޕިއުޓަރާ ގުޅުން ހުރި ފޯޖަރީގެ އަމަލުތައް 8. ކޮމްޕިއުޓަރާ ގުޅުން ހުރި އޮޅުވާލުމުގެ އަމަލުތައް

9. ކޮޕީރައިޓާއި އެއާ ގުޅޭ އެހެނިހެން ހައްގުތަކަށް އަރައިގަތުމުގެ އަމަލުތައް

އެ އަމަލުތަކަކީ ކުށެއް ކަމުގައި ކަނޑައެޅި ނަމަވެސް ކޯޓު އަމުރެއްގެ ދަށުން ނުވަަތަ ގާނޫނަކުން ބާރު ލިބިގެން ދޭ ހުއްދައެއްގެ ދަށުން އެކްސެސް ކުރުމަކީ ކުށެއް ކަމުގައި ނުބެލެވޭނެ ކަމަށް އެ އިސްލާހުގައި ބުނެފައިވެ އެވެ.

އެފަދަ ކުށަކަށް އަރައިގެންފި ނަމަ އެއް އަހަރަށް ވުރެ ގިނަ ދުވަހަށް ޖަލަށްލެވޭނެ ކަމަށް އެ އިސްލާހުގައިވެ އެވެ.

ސައިބާ ކްރައިމްގެ ކުށްތައް ރާއްޖޭގައި ގިނަވަމުންދާއިރު، އެފަދަ ކުށްތަކުގައި އެކަށީގެންވާ ފިޔަވަޅު ނޭޅި ކުށްތައް ތަކުރާރުވަމުންދާ ކަމުގެ ޝަކުވާ ބޮޑެވެ.