އާސެނަލް އެއްވަރު، ޗެލްސީ ދެ ވަނައިގައި ލީޑު ނަގައިފި

ލަންޑަން (ޑިސެމްބަރު 9) - އިނގިރޭސި ޕްރިމިއާ ލީގުގައި ރޭ އާސެނަލް އާއި ފުލަމް ބައްދަލުކުރި މެޗު 1-1 އިން އެއްވަރު ވުމުން، ޗެލްސީން ފަހަތުން އަރައި 4-3 އިން ޓޮޓެންހަމް ބަލިކޮށް، ލީގު ޓޭބަލްގެ ދެ ވަނައިގައި ދެ ޕޮއިންޓްގެ ލީޑެއް ނަގައިފި އެވެ.

ފުލަމްގެ ދަނޑުގައި ރައުލް ހިމިނޭޒް އެޓީމަށް ލީޑު ނަގައިދީފައި ވަނިކޮށް އާސެނަލް އިން ދެ ވަނަ ހާފުގައި އެއްވަރު ކުރި ގޯލު ޖަހައިދިނީ ޑިފެންޑަރު ވިލިއަމް ސަލީބާ އެވެ.

މި ނަތީޖާއާ އެކު އާސެނަލް އަށް ވަނީ 15 މެޗުން 29 ޕޮއިންޓް ލިބިފަ އެވެ. ޗެލްސީން ވަނީ 15 މެޗުން 31 ޕޮއިންޓް ހޯދައިފަ އެވެ.

ޗެލްސީއާ ދެކޮޅަށް ޓޮޓެންހަމުން ވަނީ ވަރަށް ކުރީކޮޅު ދެ ގޯލުގެ ލީޑެއް ނަގައިފަ އެވެ. ފަސްވަނަ މިނިޓުގައި ފުރަތަމަ ލަނޑު ޖަހައިދިނީ ޑޮމިނިކް ސޮލަންކޭ އެވެ. އޭގެ ހަ މިނިޓު ފަހުން ލީޑު ފުޅާ ކޮށްދިނީ ޑިޔާން ކުލުސެވްސްކީ އެވެ. ޗެލްސީން ވަނީ 17 ވަނަ މިނިޓުގައި ޖޭޑަން ސަންޗޯ ޖަހައިދިން ގޯލުން ފަރަގު ކުޑަކޮށްފަ އެވެ.

ދެ ވަނަ ހާފުގައި ޗެލްސީން އެއްވަރުކުރީ ކޯލް ޕާމާ ކާމިޔާބު ކޮށްދިން ޕެނަލްޓީއަކުންނެވެ. އެއަށް ފަހު އެންޒޯ ފެނާންޑޭޒް ޗެލްސީ އަށް ލީޑު ނަގައިދިން އިރު، ޕާމާ ވަނީ އިތުރު ޕެނަލްޓީއަކުން ހަތަރު ވަނަ ގޯލު ކާމިޔާބު ކޮށްދީފަ އެވެ. ޓޮޓެންހަމްގެ ތިންވަނަ ލަނޑު މެޗުގެ އިތުރު ވަގުތުގައި ޖަހައިދިނީ ސޮން ހެއުން މިން އެވެ.

ޕާމާ އަށް ރެކޯޑެއް

މިއާ އެކު ޕާމާ ވަނީ ލީގުގައި ވިދިވިދިގެން 12 ޕެނަލްޓީ ކާމިޔާބު ކުރި ފުރަތަމަ ކުޅުންތެރިޔާގެ ރެކޯޑް ހަދައިފަ އެވެ. މީގެ ކުރިން އެ ރެކޯޑް އޮންނަނީ 11 ޕެނަލްޓީ ކާމިޔާބު ކުރި ޔާޔާ ޓޫރޭ އަތުގަ އެވެ.

ހަމަ އެއާއެކު ޕާމާ ވަނީ، 2001 ވަނަ އަހަރު ޖިމީ ފްލޮއިޑް ހެސްލްބެންކް، ޕްރިމިއާ ލީގުގައި ޗެލްސީން ޖެހި 36 ގޯލުގައި ހިއްސާވެގެން ހެދި ރެކޯޑް ވެސް މުގުރާލައިފަ އެވެ. ރޭގެ މެޗުގައި ޖެހި ދެ ގޯލާ އެކު ޕާމާ ވަނީ މި 2024 ވަނަ އަހަރު ޕްރިމިއާ ލީގުގައި ޗެލްސީން ޖެހި 38 ގޯލުގައި ހިއްސާ ވެފަ އެވެ. އެއީ 25 ގޯލާއި 13 އެސިސްޓެވެ.

ލީގު ތާވަލްގެ އެއް ވަނައިގައި އޮތީ 14 މެޗުން 35 ޕޮއިންޓް ހޯދާފައިވާ ލިވަޕޫލް އެވެ. ލިވަޕޫލް އާއި އެވަޓަން އާދިއްތަ ދުވަހުގެ ރޭ ބައްދަލުކުރާގޮތަށް ތާވަލް ކުރެވުނު ނަމަވެސް ލިވަޕޫލް ސަރަހައްދަށް ތޫފާނެއްގެ އަސަރު ކޮށްގެން އެ މެޗު ވަނީ ފަސް ކޮށްފަ އެވެ.

އާދިއްތަ ދުވަހުގެ ރޭ މެންޗެސްޓާ ޔުނައިޓެޑް ވަނީ އަމިއްލަ ދަނޑުގައި 3-2 އިން ނޮޓިންހަމް ފޮރެސްޓް އަތުން ބަލިވެފަ އެވެ. އަދި އެ ރޭ މެންޗެސްޓާ ސިޓީ އާއި ކްރިސްޓަލް ޕެލަސް ބައްދަލުކުރި މެޗު ނިމުނީ 2-2 އިން އެއްވަރު ވެގެންނެވެ.

ސިޓީ އޮތީ 27 ޕޮއިންޓާ އެކު ތާވަލްގެ ހަތަރު ވަނައިގަ އެވެ. ފަސް ވަނައިގައި އޮތް ފޮރެސްޓާއި ހަ ވަނައިގައި އޮތް އެސްޓަން ވިލާ އަށް ވެސް 25 ޕޮއިންޓް ލިބިފައި ވާއިރު، ޔުނައިޓެޑް އޮތީ 19 ޕޮއިންޓާ އެކު 13 ވަނައިގަ އެވެ.