އޭސީސީން އެދުނު ހުރިހާ ލިޔުމެއް ހިއްސާކޮށްފިން: ހީނާ

"އެމްއެމް ޓީވީ" ގެ ނަމުގައި ޗެނަލް ހިންގާ ކުންފުނިން ކުއްޔަށް ދޫކުރާ ފްލޯތަކެއްގައި ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) ހިންގަން އެވޯޑްކުރި މައްސަލާގައި އެންޓި ކޮރަޕްޝަން ކޮމިޝަން (އޭސީސީ) އިން އެ އެޖެންސީ އަށް ވަދެފި އެވެ.

އެންސްޕާގެ ސީއީއޯ އަދި ރައީސް އޮފީހުގެ ތަރުޖަމާނު ހީނާ ވަލީދު "މިހާރު" އަށް ވިދާޅުވި ގޮތުގައި އެ މައްސަލާގައި އޭސީސީން އެ އެޖްންސީ އަށް ވަނީ އިއްޔެ އެވެ.

އެ ފަރާތުން އެދުނު ހުރިހާ ލިޔެކިޔުންތައް ހިއްސާ ކޮށްފައިވާ ކަމަށް ހީނާ ވިދާޅުވި އެވެ.

އެންސްޕާ ހިންގަން ނެޝަނަލް ޓެންޑަ ބޯޑުގެ އުސޫލުތަކުގެ ތެރެއިން އިއުލާން ކޮށްގެން ތިން ފްލޯ ނަގާފައި ވަނީ ކުރީގެ މިނިސްޓަރު އަހުމަދު ތަސްމީން އަލީގެ އާއިލީގެ މއ. ސީރާޒީ ގެއިންނެވެ.

އެނގިފައިވާ ގޮތުގައި އެއީ އެމްއެމްޓީވީ ހިންގާ މޯލްޑިވްސް މީޑިއާ ހައުސް އިން ދިގު މުއްދަތަކަށް ނަގާފައިވާ ފްލޯތަކުގެ ތެރެއިން ތިން ފްލޯ އެވެ. އެމްއެމްޓީވީ ހިންގަނީ އޭގެ ތެރެއިން އެއް ފްލޯގަ އެވެ. ބާކީ ފްލޯތައް ވަނީ އެ ކުންފުނިން އެކި ފަރާތްތަކަށް ކުއްޔަށް ދޫކޮށްފަ އެވެ.

އެ މައްސަލާގައި ކޮރަޕްޝަންގެ އަމަލުތައް ހިމެނޭ ކަމަށް ބުނެ ސޯޝަލް މީޑިއާގައި އަޑު ފެތުރުމުން އެ މައްސަލަ މިދިޔަ ހުކުރު ދުވަހު އޭސީސީ އަށް ހުށަހެޅީ ވެސް އެންސްޕާ އިންނެވެ.

އެ އެޖެންސީން އޭސީސީގެ ރައީސް އާދަމް ޝާމިލަށް ފޮނުވި ސިޓީއެއްގައި ވަނީ އެ ކަމާ ގުޅޭ ފުރިހަމަ ތަހުގީގެއް ކުރުމަށް ފަހު، އެ ރިޕޯޓް ވީ އެންމެ އަވަހަކަށް އެ އެޖެންސީއާ ހިއްސާ ކުރުމަށް އެދޭ ކަމަށެވެ.

ނަމަވެސް އެންސްޕާ އިން އިއްޔެ ވަނީ އެމްއެމްޓީވީއާ އެކު ހެދި އެއްބަސްވުން ބާތިލް ކުރަން ނިންމިކަން އިއުލާންކޮށްފަ އެވެ.

"މި މުއާމަލާތާ ގުޅިގެން އެ ކުންފުނީގެ އަގު ވައްޓާލައި ބަދުނާމު ކުރުމަށް ހަގީގަތާ ހިލާފު އެތައް ވާހަކަތަކެއް ދައްކައި، މީޑިއާގެ އެކި ވަސީލަތްތައް ބޭނުންކޮށްގެން އެއްވެސް އަސްލެއް ނެތް ދޮގު ވާހަކަތައް ފަތުރަމުން ދިއުމުގެ ސަބަބުން އެ ކުންފުންޏަަށް މާއްދީ ގޮތުންނާއި މައުނަވީ ގޮތުން ފޫނުބެއްދޭ ވަރުގެ ބޮޑު ގެއްލުމާ ކުރިމަތިވެފައި ވާތީ، މި އެއްބަސްވުން ނިމުމަކަށް ގެނައުމަށް އެ ކުންފުނިން ވަނީ ހުށަހަޅައިފަ އެވެ،" އެންސްޕާ އިން އިއްޔެ ނެރުނު ބަޔާނުގައި ވެ އެވެ.