ފުޓްސަލް ދަނޑުތަކުން ލިބޭ އާމްދަނީ ކުޅިވަރު ފަންޑަށް ނަގަނީ

މާލޭގައި ހިންގާ ފުޓްސަލް ދަނޑުތަކުން ލިބޭ އާމްދަނީ ސަރުކާރުގެ ކުޅިވަރު ފަންޑަށް ވަންނާނެ ގޮތަކަށް ކަންކަން ތަރުތީބު ކުރައްވަމުން އަންނަ ކަމަށް ސްޕޯޓްސް މިނިސްޓަރު އަބްދުﷲ ރާފިއު މިއަދު ރައްޔިތުންގެ މަޖިލީހުގައި ވިދާޅުވެއްޖެ އެވެ.

މަޖިލީހުގެ އިޖުތިމާއީ ކޮމިޓީން މިއަދު ސްޕޯޓްސް މިނިސްޓްރީއާ އެކު ބޭއްވި ބައްދަލުވުމުގައި، މާފަންނު ހުޅަނގު ދާއިރާގެ މެމްބަރު މުހައްމަދު މުސްތަފާ ވަނީ އެ ދަނޑުތައް ގްރޫޕްތަކުން ކޮންޓްރޯލްކޮށް، އެތަންތަން ކުއްޔަށް ދީގެން އާމްދަނީ ހޯދާތީ އެ މައްސަލަ ނަންގަވައިފަ އެވެ. އޭނާ ވަނީ އަމުދުން ރާއްޖޭގެ ފުރަތަމަ ޑިވިޝަނުގެ ފުޓްބޯޅަ ކްލަބްތަކަށް އާމްދަނީ ބޭނުންވާއިރު އެ ކްލަބްތަކަށް ނުލިބޭ ފުރުސަތެއް އެހެން ބަޔަކަށް ލިބުމަކީ އިންސާފުވެރި ގޮތެއްތޯ ސުވާލުކުރައްވައިފަ އެވެ.

ޖަވާބުގައި މިނިސްޓަރު ރާފިއު ވިދާޅުވީ އެއްވެސް އުސޫލެއް ނެތި އެގޮތަށް ދަނޑުތައް ދޫކުރުމަކީ ކުރީ ސަރުކާރުތަކުން މި ސަރުކާރަށް ވާރުވެފައި އޮތް މައްސަލައެއް ކަމަށާއި އެއީ ވަރަށް ބޮޑަށް ކަންބޮޑުވާ ކަމެއް ކަމަށެވެ.

"އަޅުގަނޑަކަށް ނުފެނޭ (ކުރީ ސަރުކާރުތަކުން) ދަނޑުތައް ދިނުމުގައި އެއްވެސް ކަހަލަ ކޮންސިސްޓެންސީއެއް ގެންގުޅެފައި އޮތް ކަމަކަށް. ސިޓީއެއްގެ ޒަރިއްޔާ އިން ނުވަތަ އަންޑަސްޓޭންޑިންއެއްގެ ދަށުން އެބަހުރި ދަނޑުތައް ދޫކޮށްފައި،" ރާފިއު ވިދާޅުވި އެވެ.

"އެއީ މިކަމުގައި އަޅުގަނޑު އެންމެ ބޮޑަށް ކޮންސާންވާ ކަމަކީ. ވަކި ސިސްޓަމެއް ނެތި އެގޮތަށް ތަންތަން ދީފައި ހުރުމުން."

އެކަމަކު ރާފިއު ވިދާޅުވީ އެ ދަނޑުތައް މިހާރު ހިންގާ މީހުންގެ ބެލުމުގެ ދަށުގައި ހުންނަތާ ވަރަށް ގިނަ ދުވަސްވެފައިވާތީ މިއީ ހަމަތިބެފައި ހައްލުކުރެވޭނެ ކަމެއް ނޫން ކަމަށާއި މިކަމުގައި ސަރުކާރުން މަސައްކަތްކުރަނީ ވާހަކަ ދައްކައިގެން އެއްބަސްވުމަކަށް އައިސް ދެ ފަރާތަށް އެންމެ ފައިދާހުރި ގޮތަކަށް މައްސަލަ ހައްލުކުރަން ކަމަށެވެ.

އެގޮތުން ސަރުކާރުގެ ވިސްނުމަކީ، ރާފިއު ވިދާޅުވި ގޮތުގައި އެ ދަނޑުތައް މިހާރު ހިންގާ މީހުންނަށް ވެސް އެތަންތަން ބޭނުންކުރެވޭ ގޮތަށް އަދި އާއްމުންނަށް ފަސޭހައިން ލިބޭ ގޮތަށް ހަދައި ހަދައި، އެތަންތަން ކުއްޔަށް ދޫކޮށްގެން ލިބޭ ފައިސާ ސަރުކާރުން އަލަށް ގާއިމްކުރާ ކުޅިވަރު ފަންޑަށް ވެއްދުން ކަމަށެވެ.

"އެ ތަންތަން ބޭނުންކުރައްވާ ބޭފުޅުން ވެސް ބޭނުންވާނެ ކަންނޭގެ އެ ފައިސާ ކުޅިވަރު ކުރިއެރުވުމަށް ހޭދަކުރަން،" ރާފިއު ވިދާޅުވި އެވެ.

"އަލަށް ފާސްކުރާ ކުޅިވަރު ގާނޫނާ އެކު މިކަންކަން އެގޮތަށް ތަރުތީބުވެގެން އަންނާނެ."

މުސްތަފާ ވަނީ އޭނާގެ ދާއިރާ އަށް ނިސްބަތްވާ ފުޓްބޯޅަ ކްލަބްތަކުން ވެސް ކުޅޭނެ އެކަށީގެންވާ ވަސީލަތެއް ނެތުމުގެ ކަންބޮޑުވުން ފާޅުކުރާތީ އެކަން ވެސް މިނިސްޓަރާ ހިއްސާކު ރައްވައިފަ އެވެ. އަދި އެ ކްލަބްތައް ތިބީ ބިމެއް ދީފި ނަމަ އަމިއްލަ ހަރަދުގައި ވެސް ދަނޑު އަޅާ ގޮތަށް ކަމަށް އޭނާ ވިދާޅުވި އެވެ.

އެކަމަކު ރާފިއު ވިދާޅުވީ ސަރުކާރަށް ވެސް މައްސަލައަކީ ބިން ކަމަށާއި ބިމެއް ލިބިއްޖެ ނަމަ ސަރުކާރުން ވެސް ތިބީ ދަނޑުތައް އަޅައިދޭން ތައްޔާރުގައި ކަމަށެވެ. އެކަމަކު އެ މައްސަލަ އަށް ވަށައިޖެހޭ ހައްލެއް ހޯދައިދެއްވަން މަސައްކަތްކުރައްވާނެ ކަމުގެ ޔަގީންކަން ރާފިއު ދެއްވި އެވެ.