ދުނިޔޭގެ އެންމެ މޮޅު އެއް ފުޓްސަލް ކުޅުންތެރިޔާ އެޗްޑީސީ އަށް

ކުރިއަށް އޮތް ކްލަބް މޯލްޑިވްސް ފުޓްސަލް މުބާރާތުގައި ވާދަކުރާ ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގެ ޓީމަށް، ދުނިޔޭގައި އުފެދުނު އެންމެ މޮޅު އެއް ފުޓްސަލް ކުޅުންތެރިޔާ ޕޯޗުގަލްގެ ރިކާޑީނިއޯ ގެނެސްފި އެވެ.

ދުނިޔޭގެ މޮޅު ކުޅުންތެރިޔާގެ މަގާމް ހަ ފަހަރު ހޯދާފައިވާ ރިކާޑީނިއޯ ވެގެންދާނީ، އެއްވެސް ކުޅިވަރެއްގައި ރާއްޖޭގައި މިހާތަނަށް ކުޅޭ އެންމެ މަތީ ފެންވަރުގެ ކުޅުންތެރިޔާ އަށެވެ.

ރިކާޑީނިއޯގެ ސޮއި ހޯދަން އެޗްޑީސީން ވަރަށް ބޮޑު އަގެއް ދޭން ޖެހޭނެ އެވެ. އެކަމަކު އޭގެ އެއްވެސް ތަފްސީލެއް އެޗްޑީސީން ހާމައެއް ނުކުރެ އެވެ.

ރިކާޑީނިއޯ މިހާރު ވަނީ ރާއްޖެ އައިސް އެޗްޑީސީގެ ޓީމާ ގުޅިފަ އެވެ. އަދި ރޭ ބޭއްވި ރަސްމިއްޔާތެއްގައި އެ ކްލަބުން ވަނީ އޭނާ ތައާރަފް ވެސް ކޮށްފަ އެވެ. ރިކާޑީނިއޯއާ ކްލަބުގެ ޖާޒީ ހަވާލުކޮށްދެއްވީ އެޗްޑީސީގެ މެނޭޖިން ޑިރެކްޓަރު ބްރިގޭޑިއާ ޖެނެރަލް ރިޓަޔާޑް އަލީ ޒުހައިރެވެ.

ރާއްޖޭގައި ބާއްވާ އެންމެ ޝަރަފްވެރި އެއް ފުޓްސަލް މުބާރާތް ކަމަށްވާ ކްލަބް މޯލްޑިވްސް ކަޕަކީ އޮފީސް/ކުންފުނިތަކަށް ހުޅުވާލައިގެން ބާއްވާ މުބާރާތެކެވެ. މީގެ ފޯރި އާއި ވާދަވެރިކަން ބޮޑުވެ ފަހަކަށް އައިސް ބޭރުން މޮޅު ކުޅުންތެރިން ގެނެ އެވެ. އެކަމަކު ރިކާޑީނިއޯ އަކީ މިހާތަނަށް ގެނެސްފައިނުވާ ވަރުގެ ކުޅުންތެރިއެކެވެ.

އުމުރުން 39 އަހަރުގެ ރިކާޑީނިއޯ ވަނީ ޕޯޗުގަލްގެ ގައުމީ ފުޓްސަލް ޓީމަށް 188 މެޗު ކުޅެދީ 142 ގޯލް ޖަހައިދީފަ އެވެ. އޭނާ ވަނީ ޕޯޗުގަލްއާ އެކު ދުނިޔެ އާއި ޔޫރަޕުގެ ޗެމްޕިއަންކަން ވެސް ހޯދައިފަ އެވެ. އިންޑިވިޖުއަލް އެވޯޑްތަކަށް ބަލާއިރު ދުނިޔޭގެ މޮޅު ކުޅުންތެރިޔާގެ މަގާމް ހަ ފަހަރު ހޯދުމުގެ އިތުރުން އޭނާ ވަނީ ފީފާ ފުޓްސަލް ވޯލްޑްކަޕާއި، ޔުއެފާ ފުޓްސަލް ޗެމްޕިއަންޝިޕުގެ މޮޅު ކުޅުންތެރިޔާގެ މަގާމް ވެސް ހޯދައިފަ އެވެ.