ހާލަތު ބަދަލުނުކުރެވިއްޖެ ނަމަ އިސްތިއުފާ ދޭނަން: ގާޑިއޯލާ

މެންޗެސްޓާ ސިޓީގެ ހާލަތު ބަދަލުކުރަން ކްލަބުގެ ވެރިން ގާތު ފުރުސަތަކަށް އެދިފައިވާ ކަމަށާއި، އެކަން ނުކުރެވިއްޖެ ނަމަ އިސްތިއުފާ ދޭނެ ކަމަށް ކޯޗު ޕެޕް ގާޑިއޯލާ ބުނެފި އެވެ.

އިނގިރޭސި ޕްރިމިއާ ލީގު ފަހަކަށް އައިސް ޑޮމިނޭޓްކުރަމުން އަންނަ ސިޓީ މި ސީޒަނުގައި ވަނީ ފޯމުން ކަޓައިފަ އެވެ. ޖެހިޖެހިގެން ފަސް މެޗުން ބަލިވެފައިވާއިރު ޗެމްޕިއަންސް ލީގުގައި އެންމެ ފަހުން ކުޅުނު މެޗުގައި އެ ޓީމު ތިން ގޯލު ޖަހާފައި އޮއްވާ ފެޔަނޫޑުން ފަހަތުން އަރައި 3-3 އިން އެއްވަރުކުރީ އެވެ.

ގާޑިއޯލާ ވަނީ 2016 ވަނަ އަހަރު ސިޓީއާ ހަވާލުވި ފަހުން ޕްރިމިއާ ލީގު ހަ ފަހަރު ކާމިޔާބުކޮށްދީ ޖުމްލަ 18 ތަށި ހޯދައިފީފަ އެވެ. ދާދި ފަހުން ކޮންޓްރެކްޓް އިތުރު ދެ އަހަރަށް އާކުރި ނަމަވެސް ގާޑިއޯލާ ބުނީ ދަށް ނަތީޖާތަކާ އެކު އޭނާ އަށް މަގާމުގައި ދެމި ނުހުރެވިދާނެ ކަމަށެވެ.

"އަހަންނަކީ މައްސަލަ ކަމަށް އިހުސާސްކުރެވޭ ނަމަ އަހަރެން ބޭނުމެއް ނޫން އެތަނެއްގައި ހުންނާކަށް. ކޮންޓްރެކްޓެއް އޮތަސް ބޭނުމެއް ނޫން ހުންނާކަށް ނަތީޖާ ނުނެރެވެންޏާ،" ގާޑިއޯލާ ބުންޏެވެ.

ގާޑިއޯލާ އަށް ދިމާވެފައިވާ އެންމެ ބޮޑު މައްސަލައަކީ އަނިޔާ އެވެ. ޓީމުގެ އެންމެ މުހިއްމު އެއް ކުޅުންތެރިޔާ ރޮޑްރީ އަށް މި ސީޒަނުގައި ދެން ނުކުޅެވޭނެ އެވެ.

"އަހަރެން ޗެއާމަން ގާތު ބުނިން އަހަންނަށް ފުރުސަތެއް ދޭށޭ މިކަން ބަދަލުކުރަން ހާއްސަކޮށް އަނިޔާގައި ތިބި އެންމެން އައީމާ. އޭގެ ފަހުން އަހަންނަށް ނަތީޖާއެއް ނުނެރެވިއްޖެ ނަމަ ޖެހޭނީ ގެޔަށް ދާން."

ޕްރިމިއާ ލީގުގައި ސިޓީން މިރޭ 9 ޖަހާއިރު ނުކުންނާނީ ލީގުގެ އެއް ވަނައިގައި އޮތް ލިވަޕޫލާ ދެކޮޅަށެވެ. އާން ސްލޮޓްގެ ލިވަޕޫލުން 31 ޕޮއިންޓް ހޯދާފައިވާއިރު ސިޓީ އޮތީ 23 ޕޮއިންޓާ އެކު ހަތަރު ވަނައިގަ އެވެ. މިރޭގެ މެޗުން ބަލިވެއްޖެ ނަމަ ސިޓީ ލީގު ޗެމްޕިއަންކަން ހޯދުމުގެ ރޭހުން ބޭރުވާނެ ކަމަށް ބައެއް ފަރާތްތަކުން ބުނެ އެވެ. އެކަމަކު ގާޑިއޯލާ މުޅިއަކުން އެއްބަހެއް ނުވެ އެވެ.

"މިއީ ނޮވެމްބަރު. ސީޒަން ނިމެންދެން ބަލަމާ. މި ޓީމުގައި އެބަތިބި ހާލަތު ބަދަލުކުރެވޭނެ ކުޅުންތެރިން. އިތުބާރު އެބައޮތް،"