ލިވަޕޫލް ސަޕޯޓަރުންނަށް ގާޑިއޯލާ ރައްދުދިނީ ނަމްބަރުން

އިނގިރޭސި ޕްރިމިއާ ލީގުގައި ރޭ ލިވަޕޫލް އަތުން 2-0 އިން މެންޗެސްޓާ ސިޓީ ބަލިވުމުން ލިވަޕޫލް ސަޕޯޓަރުން އެކަމަށް ހަޖޫޖެހުމުން ސިޓީގެ ކޯޗު ޕެޕް ގާޑިއޯލާ، ލީގުގައި އޭނާ ހޯދާފައިވާ ކާމިޔާބީތައް އެ ޓީމުގެ ސަޕޯޓަރުންނަށް ހަނދާން އާކޮށްދީފި އެވެ.

އެންމެ ފަހުން ކުޅުނު ހަތް މެޗުގެ ތެރެއިން ހަ ވަނަ މެޗުން ރޭ ބަލިވެ ސިޓީ ވަނީ އެއް ވަނައިގައި އޮތް ލިވަޕޫލާ 11 ޕޮއިންޓް ފެޔަށް ޖެހިފަ އެވެ. މެޗަށް ފަހު ލިވަޕޫލުގެ ސަޕޯޓަރުން ވަނީ މާދަމާ (މިއަދު) ހެނދުނު ގާޑިއޯލާ މަގާމުން ވަކިކުރާނެ ކަމަށް ގޮވައި އޭނާއާ ދިމާކޮށްފަ އެވެ.

ގާޑިއޯލާ އެކަމަށް ޖަވާބުދިނީ އަތުގެ އިޝާރާތުން ހައެއް ދައްކައިފަ އެވެ. އެއީ މިދިޔަ ހަތް ސީޒަނުގައި އޭނާ ޕްރިމިއާ ލީގު ކާމިޔާބުކުރި އަދަދެވެ.

"އަހަރެން ހިޔެއް ނުކުރަން ލިވަޕޫލް ސަޕޯޓަރުން އެހެން ގޮވާނެ ކަމަކަށް. އެކަމަކު މައްސަލައެއް ނެތް. އެއީ ވެސް ފުޓްބޯޅައިގެ ބައެއް. އަހަންނަށް އެކަން ގަބޫލުކުރެވޭ. އަހަރެންގެ އިހުތިރާމު ލިވަޕޫލަށް އެބައޮތް،" ގާޑިއޯލާ ބުންޏެވެ.

ރޭގެ މެޗުގައި ލިވަޕޫލުގެ ފުރަތަމަ ގޯލް 12 ވަނަ މިނެޓުގައި ޖެހީ ކޯޑީ ގަކްޕޯ އެވެ. ފުރަތަމަ ހާފުގައި ސިޓީ އަށް ގޯލަށް އަމާޒުކޮށް ފޮނުވާލެވުނީ ވެސް އެންމެ ހަމަލާ އެކެވެ. ލިވަޕޫލް ވަނީ ހުރިހާ ގޮތަކުން މެޗު ޑޮމިނޭޓްކޮށްފަ އެވެ. އެ ޓީމުގެ ދެ ވަނަ ގޯލް 78 ވަނަ މިނެޓުގައި ޕެނަލްޓީއަކުން ޖެހީ މުހައްމަދު ސަލާހެވެ.

މި މޮޅާ އެކު ލިވަޕޫލް އެއް ވަނައިގައި އޮތީ 34 ޕޮއިންޓާ އެކު އެވެ. ސިޓީ އޮތީ 23 ޕޮއިންޓާ އެކު ފަސް ވަނައިގަ އެވެ. ތާވަލުގެ ދެ ވަނައިގައި 25 ޕޮއިންޓާ އެކު އޮތީ މި ހަފުތާގައި ވެސްޓް ހޭމް ޔުނައިޓެޑް އަތުން 5-2 އިން މޮޅުވި އާސެނަލް އެވެ. ހަމަ އެ އަދަދަށް ޕޮއިންޓް އެއްކޮށްގެން ލަނޑުގެ ތަފާތުން ތިން ވަނައިގައި އޮތީ ރޭ އެސްޓަން ވިލާ އަތުން 3-0 އިން މޮޅުވި ޗެލްސީ އެވެ. ސިޓީއާ އެއް އަދަދަކަށް ޕޮއިންޓް ހޯދައިގެން ލަނޑުގެ ތަފާތުން ހަތަރު ވަނައިގައި އޮތީ ބްރައިޓަން އެވެ.

ދަށް ނަތީޖާތަކުގެ ސަބަބުން ސިޓީ އަށް މި ސީޒަނުގައި ޕްރިމިއާ ލީގު ކާމިޔާބުކުރެވިދާނެ ކަމަށް ތަޖުރިބާކާރުން ބުނެ އެވެ. އެ ޓީމަށް ދިމާވެފައިވާ އެންމެ ބޮޑު މައްސަލައަކީ އަނިޔާ އެވެ. ހާއްސަކޮށް މެދުތެރޭގެ މައިތަނބު ރޮޑްރީ އަށް އަނިޔާވުމުން ޓީމުގެ ކުޅުމަށް ވަނީ އަސަރުކޮށްފަ އެވެ.

ގާޑިއޯލާ ވަނީ ހާލަތު ބަދަލުކުރަން އިތުރު ފުރުސަތަކަށް މެނޭޖްމަންޓުގައި އެދޭނެ ކަމަށާއި، އެކަން ނުކުރެވިއްޖެ ނަމަ އިސްތިއުފާ ދޭނެ ކަމަށް ބުނެފަ އެވެ.