ވ. އަތޮޅުގައި ނުވިހާތާ 12 އަހަރު، އެންމެން މާލެއަށް

ވ. އަތޮޅުގައި މީހުން ނުވިހާތާ 12 އަހަރަށް ވުރެ ގިނަ ދުވަސް ވެއްޖެ ކަމަށް އަތޮޅު ހޮސްޕިޓަލުން މިއަދު ބުނެފި އެވެ.

ފެލިދޫގައި ހިންގާ ހޮސްޕިޓަލްގެ މެނޭޖަރު އަހުމަދު ނަސްރުﷲ "މިހާރު" އަށް ވިދާޅުވީ، ކުރީގެ ރައީސް މައުމޫން އަބްދުލްގައްޔޫމްގެ ވެރިކަމުގައި ސިއްހީ މަރުކަޒު، ހޮސްޕިޓަލަކަށް ބަދަލުކުރި ފުރަތަމަ ކޮޅު އެ ތަނުގައި މީހުން ވިއްސި ކަމަށެވެ.

އެކަމަކު، ބެކަޕް ޖަނަރޭޓަކަށް މައްސަލައެއް ދިމާވެ، ކުރީގެ ރައީސް މުހައްމަދު ނަޝީދުގެ ވެރިކަމުގައި ޖެހުނީ ވިހެއުމުގެ ހިދުމަތް ވަގުތީ ގޮތުން މެދުކަނޑާލާށެވެ. އޭރުއްސުރެ އެ އަތޮޅުގައި މީހުން ދިރިއުޅޭ ފަސް ރަށުގެ މީހުން ވިހަން ދަތުރު ހަދާފައި ދަނީ މާލެއަށެވެ.

ނޭޝަނަލް ސްޓެޓިކްސް އޮފް ބިއުރޯއިން ނެރުނު ވައިޓަލް ސްޓެޓިކްސް 2024 ގެ ރިޕޯޓު ދައްކާ ގޮތުން، 2021 ވަނަ އަހަރު ވ. އަތޮޅުގައި އެއްވެސް މީހަކު ނުވިހަ އެވެ.

އެ ތަފާސްހިސާބުތަކުން ދައްކާ ގޮތުން ވ. އަތޮޅު ފިޔަވައި ދެ ވަނަ އަށް އެންމެ މަދުން ވިއްސީ ކ. އަތޮޅު ހޮސްޕިޓަލުގަ އެވެ. އެއީ އެންމެ ދެ ކުދިންނެވެ.

އެ އަހަރު އެންމެ ގިނަ މީހުން ވިހާފައިވަނީ ހދ. އަތޮޅުގަ އެވެ. އެއީ 8.7 ނުވަތަ 514 ކުދިންނެވެ. ދެ ވަނައަށް އެންމެ ގިނަ މީހުން ވިހެއި ރ. އަތޮޅުގައި 395 ކުދިން ވިއްސި އެވެ.

އެ އަހަރު މާލޭގައި 3،192 ކުދިން އަދި ރަށްރަށުގައި 2،725 ކުދިން ވިއްސި އެވެ.

ފެލިދޫގައި ހިންގާ ހޮސްޕިޓަލްގެ މެނޭޖަރު ނަސްރުﷲ ވިދާޅުވީ ކޮވިޑުގެ ސަބަބުން 2020 އަދި 2021 ވަނަ އަހަރު ވ. އަތޮޅުގެ ގިނަ މީހުން ވިހަން ދިޔައީ މ. އަދި ފ. އަތޮޅަށް ކަމަށެވެ. އެކަމަކު، އެ އަހަރު ވިހެއި ކުދިންގެ އަދަދެއް ސާފެއް ނުވެ އެވެ. އެހެން ނޫނީ، އަބަދު ވެސް ސްޕެޝަލިސްޓުންނަށް ދެއްކުމާއި ވިހެއުމުގެ ކަންކަމަށް ދަނީ މާލެއަށް ކަމަށް އޭނާ ވިދާޅުވި އެވެ.

ނަމަވެސް ވިއްސުން ފިޔަވައި މާބަނޑު މީހުންނަށް ބޭނުންވާ އެހެން ހިދުމަތްތަކެއް ލިބޭކަން ފެލިދޫގައި ހޮސްޕިޓަލުން ފާހަގަކުރެ އެވެ. އެ ތަނުގައި މިހާރު ވެސް ސްކޭން ހެދުމާއި އަންހެނުންގެ ބަލިތަކުގެ ހާއްސަ ޑޮކްޓަރަކާއި ކުޑަކުދިން އަދި އެތެރެ ހަށީގެ ޑޮކްޓަރެއް މަސައްކަތްކުރެ އެވެ.

ވިހެއުމުގެ ހިދުމަތް ނުދެނީ ހޮސްޕިޓަލުގައި އޮޕަރޭޝަން ތިއޭޓަރަކާއި އެންއައިސީޔޫއެއް ނެތުމުން، ދިމާވެދާނެ ހާލަތަކަށް ބަލާފައި ކަމަށް ނަސްރުﷲ ވިދާޅުވި އެވެ. އެކަމަކު، ހޮސްޕިޓަލުން މިހާރު އަންނަނީ އެ ހިދުމަތްތައް ފެށުމަށް ތައްޔާރުވަމުންނެވެ.

"މަސައްކަތަށް ތައްޔާރުވާން ބަލާއިރު ބެކަޕް ޖަނަރޭޓަރު ހަލާކުވެފައި ހުރީ. މިހާރު އެސްޓިމޭޓަށް ބަލާއިރު ކަރަންޓު އަޕްގްރޭޑު ކުރަން އެކަނި ވެސް ދެ މިލިއަނަށް ވުރެ ގިނަ ރުފިޔާ ހަރަދުވޭ. އެކަން ކޮށްގެން ދެން ހުރި ހިދުމަތްތައް ފެށޭނީ. އެކަމަކު އެ މަސައްކަތް ކުރަން އެބަ،" ނަސްރުﷲ ވިދާޅުވި އެވެ.

ރާއްޖޭގެ އާބާދީ އެންމެ ކުޑަ ވ. އަތޮޅުގައި މި ވަގުތު 2،688 މީހުން ދިރިއުޅެ އެވެ.