ނުރައްކާ ބޮޑު އޮޕަރޭޝަނަށް ފަހު ރައިޝަންއަށް ބޮޑު ލުޔެއް

މުހައްމަދު ރައިޝަން އަށް ކުރިމަތިވެފައިވާ މަސްކިއުލާ އެޓްރޮޕީ ޓައިޕް 2 އަކީ އިށީނދެލައިގެން އިންނަން ވެސް އޭނާ އަށް ހުރަހެކެވެ. އެކަމުގައި އުފުލަމުން ދިޔަ ވޭން އޭނާ އަށް ބޮޑުވަމުން ދިޔައީ އަރިކަށީގެ ތިރިން ލާފައިވާ ގުދު އިތުރަށް ބޮޑުވަމުން ދިއުމުންނެވެ.

އެކަން ރަނގަޅުކުރަން އޮޕަރޭޝަންކުރަން ޑޮކްޓަރުން މީގެ ކުރިން ވެސް އިރުޝާދު ދިނެވެ. އެކަމަކު، ފުރާނައަށް ނުރައްކާ އޮތް ބޮޑު އޮޕަރޭޝަނަކަށް ވާތީ ރައިޝަންގެ މައިންބަފައިން ތިބީ އެކަމުގައި ހަދާނެ ގޮތެއް ނޭނގިފަ އެވެ.

އެކަމުގައި ގޮތް ނިންމީ، ޖިސްމާނީ ގޮތުން ހުރި ގޮންޖެހުންތަކާ އެކު ވެސް ތައުލީމު އުނގެނުމުގައި ނަމޫނާ ދައްކަމުން އަންނަ ރައިޝަން، 23، އޭނާގެ ސައިކޮލޮޖީގެ ޑިގްރީ ފުރިހަމަކުރުމަށް ފަހުގަ އެވެ.

ރައިޝަން ބުނީ މިދިޔަ އޮގަސްޓު 1ގައި ކުރި މައިބަދައިގެ އޮޕަރޭޝަނަށް 14 ވަރަކަށް ގަޑިއިރު ހޭދަވި ކަމަށެވެ. އޭނާ ބުނީ އޮޕަރޭޝަނަށް ފަހު ހަށިގަނޑަށް ވަރަށް ބޮޑު ލުޔެއް ލިބިއްޖެ ކަމަށެވެ.

މީގެ ކުރިން، ފުރޮޅުލީ ގޮނޑީގައި އޭނާ އިންނަނީ ބުރަކައްޓަށް ސަޕޯޓު ދޭނެ ބާލީސް ވެސް ޖައްސައިގެންނެވެ. އެކަމަކު، ޓްރިވެންޑްރަމްގެ ކިމްސް ހޮސްޕިޓަލުން ކުރި އޮޕަރޭޝަނަށް ފަހު ގުދު ފިލައި، ބުރަކަށި ސީދާވުމުން މިހާރު ސަޕޯޓަކާ ނުލައި އިށީނދެވޭ ވަރު ވެއްޖެ އެވެ.

"ކުރިއަށް ވުރެ ވަރަށް ފަސޭހަ މިހާރު. ކުރިން މީހަކު އައިސް ޖެހުނަސް ވެއްޓޭނެ. އެކަމަކު، މިހާރު ނުވާނެ އެހެންނެއް،" ރައިޝަން ބުންޏެވެ.

"މިހާރު އެއްވެސް ސަޕޯޓަކާ ނުލައި އިށީނދެވޭ އަދި އޮށޯވެވޭ، އެނދުގައި ވިއަސް، ގޮނޑީގައި ވެސް ސީދަލަށް،"

ރައިޝަންގެ މަންމަ އައިމިނަތު އިބްރާހިމް ބުނީ ދަގަނޑު ލައްވައިގެން މައިބަދަ އަލުން ހެދި ބޮޑު އޮޕަރޭޝަނަށް ފަހު އަށް ދުވަސް ވަންދެން ވެންޓިލޭޓަރުގައި ބޭއްވި ކަމަށެވެ.

އައިމިނަތު ބުނި ގޮތުގައި އޭނާގެ ދެ ކުދިންގެ ތެރެއިން ހަގު ދަރިފުޅު އޮޕަރޭޝަން ކުރަން ވެއްދި ވަގުތަކީ އޭނާގެ ހަޔާތުގައި އައި އެންމެ ނާޒުކު ވަގުތުކޮޅެވެ. އޭނާ ބުނީ މިއީ ކޮންމެ ގޮތެއް ވެސް ވެދާނެ އޮޕަރޭޝަނެއް ކަމަށް ޑޮކްޓަރުން އޮތީ ކިޔައިދީފައި ކަމަށެވެ.

"އޮޕަރޭޝަނަށް ވައްދަން އުޅުނީމާ ޑިސްކަސްކުރިން 50/50 ޕަސެންޓް އޮޕަރޭޝަނެއް ވީމަ ދެން މަންމަ ކިހިނެއް ހެއްޔޭ ހަދާނީ [ކާމިޔާބު ނުވިއްޔާ]. ވަރަށް ވާހަކަދެއްކިން ރައިޝަންއާ،" އައިންތު ބުންޏެވެ.

ނިއުރޯ މަސްކިއުލާ ސްކޯލިއޯސިސްގެ މި އޮޕަރޭޝަން ކުރި ޑރ. ރަންޖިތު އުންނިކްރިޝްނަން، ކިމްސް ހޮސްޕިޓަލްގެ ވީޑިއޯއެއްގައި ވިދާޅުވެފައިވާ ގޮތުގައި ރައިޝަންގެ މައިބަދައިގެ މައްސަލަ ދުވަސްވާ ވަރަކަށް ދިޔައީ ގޯސްވަމުން ކަމަށެވެ. އޮޕަރޭޝަން ކުރިއިރު، ވަރަށް ބޮޑަށް ގޯސްވެފައިވާ ކަމަށް އޭނާ ވިދާޅުވި އެވެ.

ޑޮކްޓަރު ވިދާޅުވީ ބޮލުން ފެށިގެން ޅިނދު ކަށިގަނޑާ ހަމައަށް އޮޕަރޭޝަން ކުރަންޖެހޭ ކަމަށާއި އެ ނޫން ގޮތަކަސް ކޮށްގެން އޮޕަރޭޝަން ކާމިޔާބު ވާނެ ގޮތެއް ނެތް ކަމަށެވެ.

"ސާވިކަލް ވާޓިބްރާ، ތޮރާސިކް ވާޓިބްރާ، ލަމްބާ ވާޓިބްރާ އަދި ޕެލްވިސް. އެއްވެސް އެއްޗެއް މަދުން ކޮށްފިއްޔާ އޭނާ ވެއްޓޭނެ،" ރަންޖިތު ވިދާޅުވި އެވެ.

"ކިޔައިދިން މި ސާޖަރީގެ ރިސްކުތައް. އޮޕަރޭޝަންގެ ތެރޭގައި ވެސް މަރުވެދާނެ ކަމަށް ބުނީމަ ރައިޝަން ބުނީ އެކަމުގައި މައްސަލައެއް ނެތް ކަމަށް."

ޑޮކްޓަރު ވިދާޅުވީ ރައިޝަންއާ މީގެ ކުރިން ވާހަކަދެއްކެވި ފަހަރުތަކުގައި ވެސް ހުރީ ވަރަށް ޕޮޒިޓިވްކޮށް ކަމަށާއި އެކަމަކު، ބޮލުން ފެށިގެން ޕެލްވިސްއާ ހަމައަށް އެއްފަހަރާ މީގެ ކުރިން އޭނާ އޮޕަރޭޝަނެއް ކޮށްފައި ނެތުމުން ހާސްކަން އޮތް ކަމަށެވެ.

އޭނާ ވިދާޅުވި ގޮތުގައި މި ފަދަ އޮޕަރޭޝަނަކީ ދުނިޔޭގައި ވެސް ވަރަށް މަދުން ނޫނީ ނުކުރާނެ ކަމެކެވެ.

"އޮޕަރޭޝަންގައި ވެސް ސްޓޭޖުތަކަށް ބަހާލައިގެން ޕްލޭންކުރީ ލޭ މަދުވެދާނެތީ، އެއް ސާޖަރީއެއް ދެތިން ސްޓޭޖަށް ބަހާލައިގެން. އެކަމަކު، އޮޕަރޭޝަން ކުރީ އެއް ސްޓޭޖުން." އޭނާ ވިދާޅުވި އެވެ.

ޑޮކްޓަރު ވިދާޅުވީ އޮޕަރޭޝަނަށް ހަތަރު މަސް ފަހުން އެކްސްރޭ ނަގަން ރައިޝަން ހޮސްޕިޓަލަށް ދިއުމުން މިހާ ރިސްކު ބޮޑު އޮޕަރޭޝަނެއް ކުރީ ކީއްވެގެންތޯ ސުވާލުކުރެއްވި ކަމަށެވެ.

"ރައިޝަން ބުނީ މަސްކިއުލާ އެޓްރޮފީ ޓައިޕް 2 ހުއްޓަސް ތިމަންނަ ކުރަން ބޭނުންވި ހުރިހާ ކަމެއް ވެއްޖެއޭ. އެހެންވީމަ، މަރުވިއަސް މައްސަލައެއް ނެތޭ...މި އޮޕަރޭޝަނުގައި ރިސްކް ވަރަށް ވަރަށް ބޮޑު." ޑޮކްޓަރު ވިދާޅުވި އެވެ.

ރައިޝަންގެ މަންމަ ބުނީ އޮޕަރޭޝަންގެ ކުރިން ނަމަ ރައިޝަންއަށް ހަމަޖެހިލައިގެން އިނދެވޭ ގޮތަށް ސްޕައިން ޖެކެޓު އަޅުވައި ގޮނޑިއަށް ލައި، ތައްޔާރުކުރަން ގަޑިއިރަކަށްވުރެ ގިނައިރުވާ ކަމަށެވެ. އެކަމަކު އޮޕަރޭޝަނަށް ފަހު މިހާރު 15 މިނެޓުން އެ ކަންކަން ނިމޭ ކަމަށް ބުންޏެވެ.

އާސަންދައިން ހުރިހާ ހަރަދެއް ހަމަޖެހުނު މި އޮޕަރޭޝަން ރައިޝަން އާއި އާއިލާ އިންޑިއާގައި ގިނަ ދުވަސްތަކެއް ވަންދެން ތިބެން ޖެހުނެވެ. އެހެންވެ މިކަމުގައި ގިނަ ބައެއްގެ އެހީތެރިކަން ލިބުނު ކަމަށް އޭނާ ބުންޏެވެ.

މިހާރު ރައިޝަންގެ ވަގުތު ހުސްކޮށްފައިވަނީ ރިކަވަރީއަށެވެ. އޯ ލެވެލްގެ ގައުމީ ގަދަ 10ގެ 10 ވަނަ އަދި 2019 ގައި ހެދި އޭ ލެވެލް އިމްތިހާނުގައި ވެސް ވަރަށް ރަނގަޅު ނަތީޖާއެއް ހޯދި ރައިޝަން ދެން ބޭނުންވަނީ އޭނާ ކުރިން ވެސް ޕްލޭން ކުރި ގޮތަށް ޕާފޯމެންސް ސައިކޮލޮޖީން އިނގިރޭސިވިލާތުން މާސްޓާސް ހަދަން ފުރުސަތެއް ލިބޭތޯ ބަލާށެވެ. މި ސަރަހައްދުގެ ގައުމުތަކުން މި ވަގުތު އެ ކޯސް ހެދެން ނެތުމުންނެވެ.