މަތީ ތައުލީމަށް ކިޔަވާ ފިރިހެން ކުދިން މަދުވުން: ހައްލު ނުހޯދި އޮތް ކަންބޮޑުވުމެއް!

ރާއްޖޭގެ ކޮލެޖް ޔުނިވާސިޓީތަކުން ކޮންމެ އަހަރަކު ވެސް އެތައް ސަތޭކަ ދަރިވަރުން މަތީ ތައުލީމަށް ފަހު ގްރެޖުއޭޓްވެ އެވެ. އެކަމަކު އޭގެތެރޭގައި ނިސްބަތުން ގިނައީ އަންހެން ކުދިންނެވެ. އަހަރުތަކެއް ވަންދެން ފެންނަން އޮތް މި ޓްރެންޑް ބަދަލު ނުވެ، މަތީ ތައުލީމް ހާސިލްކުރާ ފިރިހެން ކުދިންގެ އަދަދު ދަނީ ކަންބޮޑުވާންޖެހޭ ވަރަށް ދަށްވަމުންނެވެ.

މި ނަތީޖާގެ އަސަރު ބައެއް ދާއިރާތަކުން ފެނެ އެވެ.

ހަޔާ އެޑިއުކޭޝަން މިނިސްޓަރު ޑރ. މަރިޔަމް މާރިޔާ މިދިޔަ މަހު "މިހާރު" އަށް ވިދާޅުވީ މަތީ ތައުލީމަށް ކިޔަވާ ފިރިހެން ކުދިންގެ އަދަދު އަހަރުން އަހަރަށް ދަށްވަމުންދާ ތަން ފެނުމަކީ އެކި ދާއިރާތަކަށް އޮތް ގޮންޖެހުމެއް ކަމަށެވެ. އެއީ، ކަންބޮޑުވެވަޑައިގަންނަވާ ކަމެއް ކަމަށް ވިދާޅުވި އެވެ.

މިއީ، ދުނިޔޭގެ ގިނަ ގައުމުތަކުގައި ވެސް އޮތް ޓްރެންޑެއް ކަން ފާހަގަކުރައްވައި މިނިސްޓަރު ވިދާޅުވީ ރާއްޖޭގައި އޮތް ބިރަކީ ވަކި ދާއިރާތަކެއްގައި ފިރިހެނުން މަދުވުން ނުވަތަ އެއްގޮތަކަށް ވެސް ފިރިހެން ކުދިން ނޫޅުމެވެ.

ރާއްޖޭގައި ކިޔެވުމުގައި ދެޖިންސުގެ ހަމަހަމަކަން އޮތް ނަމަވެސް އަންހެނުންނާއި ފިރިހެނުން ކިޔެވުމަށް ދާއިރާތައް ކަނޑައަޅާފައި އޮންނަ ކަމުގެ ކަންބޮޑުވުން މިނިސްޓަރު ފާޅުކުރެއްވި އެވެ.

މިނިސްޓަރު ވިދާޅުވި ގޮތުގައި އަބަދު އަންހެނުން މަސައްކަތުގައި ފެންނާތީ ޓީޗިން އާއި ނާސިން އަކީ ހަމައެކަނި އަންހެނުން ކުރަން ޖެހޭ ކަމެއްގެ ގޮތުގައި ވެސް ބައެއް މީހުން ގަބޫލު ކުރެވެ އެވެ. އެ ދާއިރާ ތަކުގައި އުޅޭ ފިރިހެނުންގެ އަދަދު ވަރަށް މަދު ކަމަށް މަރިޔާ ވިދާޅުވި އެވެ.

"ކުޑަކުޑަކުދިން ޕްރީ ސްކޫލަށް މި ދަނީ. ދާއިރު މި ތިބެނީ އަންހެން ކުދިން. އެ ކުދިންނަށް ރޯލް މޮޑަލް މިއީ، ވަރަށް މުހިންމު ކަމެއް. ސްކޫލުން ވެސް މި ފެންނަނީ އަންހެން ކުދިން ކިޔަވައިދޭން އުޅޭ ތަން. އެހެންވެ ފިރިހެން ކުދިން ބޭނުން ނުވަނީހެން ހީވަނީ ޓީޗަރަކަށް ވާން،" މިނިސްޓަރު ވިދާޅުވި އެވެ.

ކުދިން ބޮޑެތިވަމުން އަންނައިރު އެ މާހައުލުން ފެންނަ ކަންކަމުގެ މައްޗަށް އެ ކުދިންގެ މުސްތަގުބަލް ބިނާކުރާ ކަމަށް މާރިޔާ ވިދާޅުވި އެވެ. ފިރިހެން ކުދިންނަށް ގިނަ ފަހަރަށް ފެންނަނީ ބައްޕަމެން ނުވަތަ ބޭބެމެން ސްކޫލު ނިންމުމަށް ފަހު އިތުރަށް ކިޔެވުމުގެ ބަދަލުގައި ކޮންމެވެސް މަސައްކަތެއްގައި އުޅޭތަން ކަމަށާއި އެއީ ވެސް ފިރިހެން ކުދިން އިތުރަށް ކިޔަވަން ބޭނުން ނުވެދާނެ ސަބަބެއް ކަމަށް މާރިޔާ ވިދާޅުވި އެވެ.

"ޓީޗަރުންނަށް ގިނައީ އަންހެންކުދިން، ފިރިހެން ކުދިންނަށް ވުރެ. ޓީޗަރުން އެކަންޏެއް ނޫން އެހެން މާއްދާތަކުން އެހެން ދާއިރާތަކުން ކިޔަވަން ބޭނުންވާ ފިރިހެން ކުދިން ވެސް ވަރަށް މަދު. މިއީ ވަރަށް ބޮޑު މައްސަލައެއް. ވަރަށް ބޮޑު ގޮންޖެހުމެއް،" މިނިސްޓަރު ވިދާޅުވި އެވެ.

ވިލާ ކޮލެޖްގެ ރެކްޓަރު ޑރ. އަހުމަދު އަންވަރު ވިދާޅުވީ މަތީ ތައުލީމަށް ކިޔެވުމުގައި ގިނައީ ފިރިހެން ކުދިންނަށް ވުރެ އަންހެން ކުދިންކަން އެނގޭނެ ގޮތަކަށް ރާއްޖޭގައި މިހާތަނަށް ދިރާސާއެއް ހަދާފައި ނުވާ ކަމަށެވެ. ނަމަވެސް ވިލާ ހައި ސްކޫލާއި ވިލާ ކޮލެޖުގައި ވެސް ގިނައީ އަންހެން ކުދިން ކަމަށް އަންވަރު ވިދާޅުވި އެވެ.

"ނަރުސް ކޯސް ތަކުގައި ގިނައީ އަންހެން ކުދިން، ހުސް އަންހެން ކުދިންނޭ އުޅެނީ ބުނެވިދާނެ. އިންޖިނިއަރިން ކޯސްތަކުގައި ގިނައީ ފިރިހެން ކުދިން. އެކި ކޯސްތަކުގައި އެ ހުންނަ ގޮތަކަށް ކުދިން ތިބެނީ. އެކަމަކު އަންހެން ކުދިން ވިލާގައި ގިނައީ، ނަތީޖާ ވެސް ރަނގަޅީ އަންހެން ކުދިންގެ،" އޭނާ ވިދާޅުވި އެވެ.

ފިރިހެނުން މަތީ ތައުލީމަށް ނުކިޔަވާ ނަމަ ބައެއް ފަހަރު ވަޒީފާ ނުލިބި މަސައްކަތް ނުކޮށް ތިބުމުގެ ސަބަބުން ގޯސް މަގަކުން ދެވުމުގެ ފުރުސަތު އޮންނާނެ ކަމަށް ވެސް އަންވަރު ވިދާޅުވި އެވެ.

މޯލްޑިވްސް ބިއުރޯ އޮފް ސްޓެޓިސްޓިކްސް އިން މިދިޔަ އަހަރު އާންމުކުރި 2022ގެ ބޯހިމެނުމުގެ މައުލޫމާތުގައިވާ ގޮތުން އުމުރުން 17 އަހަރުން ދަށުގެ އާބާދީއަކީ 121،634 ކުދިންނެވެ. އޭގެ ތެރޭގައި ހިމެނެނީ 62،541 ފިރިހެން ކުދިންނާއި 59،093 އަންހެން ކުދިންނެވެ.

މިދިޔަ ފަސް އަހަރު ރާއްޖޭގައި އޯލެވެލް އިމްތިހާނު ހަދާފައި ވަނީ ކޮންމެ އަހަރަކު އެވްރެޖުކޮށް 5،000 އެއްހާ ދަރިވަރުންނެވެ. އޭގެ ތެރެއިން އޭ ލެވެލް ކިޔަވަން ފަށަނީ އެވްރެޖުކޮށް، އަހަރަކު 2،000 ދަރިވަރުންނެވެ. އޭގެ ތެރޭގައި ވެސް ގިނައީ އަންހެން ކުދިންނެވެ.

ސަރުކާރުން އެޅި ފިޔަވަޅުތަކާ އެކު، އޭ ލެވެލްގެ އަދަދު މި އަހަރު އިތުރު ވެފައިވާ ކަމަށް އެޑިޔުކޭޝަން މިނިސްޓަރު ޑރ. އިސްމާއިލް ޝަފީއު ވިދާޅުވި ނަމަވެސް ކަންބޮޑުވުން ފާޅުކުރައްވާފައި ވަނީ އޭލެވެލް އިމްތިހާނުތަކުން ފާސްވާ ދަރިވަރުންގެ ނިސްބަތް ދަށް ވާތީ އެވެ. އެ ކަންކަން ހައްލުކުރުމަށް، ތައުލީމީ ދާއިރާގައި ހުރި ގޮންޖެހުންތައް ދެނެގަނެ، ގާބިލު މީހުން އުފެއްދުމަށާއި މަތީ ތައުލީމަށް ކިޔަވާ ދަރިވަރުން އިތުރު ކުރުމަށް އިތުރު މަސައްކަތްތަކެއް ކުރަމުން އަންނަ ކަމަށް މިނިސްޓަރު ވިދާޅުވި އެވެ.

ފުރަތަމަ ޑިގްރީ އަށް ހިލޭ ކިޔަވައިދޭން ސަރުކާރުން ހިންގާ ސްކީމުގެ ތަފާސްހިސާބުތަކުން ވެސް ދައްކާ ގޮތުގައި މިހާތަނަށް 10،050 އަންހެން ދަރިވަރުންނާއި 4،950 ފިރިހެން ދަރިވަރުން ވަނީ ފުރަތަމަ ޑިގްރީ ކޯހުގައި ބައިވެރިވެފައި އެވެ. އޭގެ ތެރެއިން ކޯސް ނިންމި އަންހެން ކުދިންގެ ނިސްބަތް ވަރަށް މައްޗެވެ.

ހަޔާ އެޑިއުކޭޝަން މިނިސްޓްރީން 2020 ވަނަ އަހަރު ތައްޔާރުކުރި މަތީ ތައުލީމާއި ތަމްރީނުގެ ތަފާސްހިސާބު ދައްކާ ގޮތުން ވެސް ކޮލެޖްތަކާއި ޔުނިވާސިޓީތަކުން ތަމްރީން ހޯދާ މީހުންގެ ބޮޑުބަޔަކީ ވެސް އަންހެނުންނެވެ.

އޭގައި ބުނާގޮތުން 2019 ވަނަ އަހަރު ކޮލެޖު/ޔުނިވާސިޓީތަކުން 843 ޕްރޮގްރާމު ހިންގި އިރު 13،000 އަށް ވުރެ ގިނަ ދަރިވަރުން ބައިވެރިވި އެވެ. އޭގެ. ތެރެއިން ފިރިހެނުން ހިމެނެނީ އެންމެ 41 ޕަސެންޓުގަ އެވެ.

ރާއްޖެއިން ބޭރުގައި މިހާރު ކިޔަވާ ދަރިވަރުންގެ ދަފްތަރެއް މިނިސްޓްރީން އެކުލަވާލާފައި ވާއިރު، މިހާތަނަށް އޭގައި ރަޖިސްޓްރީ ވެފައިވާ ކުދިންގެ ތެރޭގައި ވެސް ގިނައީ އަންހެން ކުދިންނެވެ. ޖުމްލަ 2،116 ދަރިވަރަކު ރަޖިސްޓްރީ ވެފައި ވައިރު އެއީ 915 ފިރިހެން ދަރިވަރުންނާއި 1،201 އަންހެން ދަރިވަރުންނެވެ. މިނިސްޓަރު މާރިޔާ ވިދާޅުވީ މަތީ ތައުލީމަށް ކިޔަވާ ފިރިހެން ދަރިވަރުން މަދުވާ ހަގީގީ ސަބަބު ހޯދަން ޖެހޭ ކަމަށެވެ. އެހެންވެ، މަތީ ތައުލީމު އުގެނެން ބޭނުންވާ އަންހެން ކުދިންނަށް ވުރެ ފިރިހެން ކުދިންގެ އަދަދު މަދުވާ ސަބަބު ދެނެގަތުމަށް އެމްއެންޔޫ އިން ދިރާސާއެއް ހަދަން ނިންމާފައިވާ ކަމަށް ވިދާޅުވި އެވެ. "މި މައްސަލައަށް ހައްލު ހޯދުމަށްޓަކައި މޯލްޑިވްސް ނޭޝަނަލް ޔުނިވާސިޓީން ރިސާޗެއް ވެސް އެބަ ހަދާ. ކީއްވެގެންބާއޭ ފިރިހެން ކުދިން ހަޔާ އެޑިއުކޭޝަންގައި ނެތީ، މަދީ. މި ދިރާސާއިން އެނގިގެންދާނެ މި ގޮންޖެހުންތައް ވެސް،" މާރިޔާ ވިދާޅުވި އެވެ.

މަތީ ތައުލީމަށް ކިޔަވާ ފިރިހެން ކުދިންގެ އަދަދު މަދުކަން ތަފާސްހިސާބުން ފެންނަން އޮތްއިރު، އެކަމަށް ހައްލު ހޯދުން މާ ބޮޑަށް ލަސް ވެއްޖެ އެވެ. މީގެ އެތައް އަހަރެއް ކުރިން ފެށިގެން ފާހަގަ ވެފައިވާ މައްސަލައަށް އަޅާނުލާ އޮތުމުން މަތީ ތައުލީމަށް ފިރިހެން ކުދިން ދާން ބޭނުން ނުވާ ސަބަބު ވެސް އޮތީ ދެނެނުގަނެވިފައި އެވެ. ސަރުކާރުގެ އަމާޒަކީ، އެ ދިރާސާ އިން ހައްލު ހޯދައި އަންހެން ކުދިންނެކޭ އެއްގޮތަށް މަތީ ތައުލީމްގައި ފިރިހެން ކުދިން ގިނަ ކުރަން މަސައްކަތްތަކެއް ކުރުމެވެ.