ނަޝާތާއި އާސިފް ވަކިކޮށްފި، ޒާހިރު ވަކިކުރަން ފާހެއް ނުވި

މިދިޔަ އަހަރު ބޭއްވި ރިޔާސީ އިންތިހާބުގެ ރީރެޖިސްޓްރޭޝަން އޮޅުވާލުމާއި އިންތިހާބުގެ ޑޭޓާބޭސް އިން އެޕްލިކޭޝަން ހަދައިގެން އެ ވިއްކުން ފަދަ ބޮޑެތި ތުހުމަތުތަކެއްކޮށް އިލެކްޝަންސް ކޮމިޝަންގެ މެންބަރުންގެ ތެރެއިން ވަކިކުރަން ނިންމި ތިން މެންބަރުންގެ ތެރެއިން ޑރ. މުހައްމަދު ޒާހިރު ވަކިނުކުރަން މަޖިލީހުން ފާސްކޮށްފި އެވެ.

އިލެކްޝަންސް ކޮމިޝަނުން ވަކިކުރަން ކޮމިޓީން ނިންމީ އެ ކޮމިޝަންގެ ނައިބު ރައީސް އަލީ ނަޝާތާއި މެންބަރު މުހައްމަދު އާސިފްގެ އިތުރުން ޒާހިރެވެ.

ނަމަވެސް، ރިޔާސީ އިންތިހާބުގައި ރީރެޖިސްޓްރޭޝަން އޮޅުވާލި ކަމުގެ ތުހުމަތު ކުރެވުނު ތިން ބޭފުޅުންގެ ތެރެއިން ވަކިކުރަން މަޖިލީހުން ފާސްކުރީ އާސިފާއި ނަޝާތެވެ.

މަޖިލީހުގައި ނެގި ވޯޓުގައި ނަޝާތު ވަކިކުރަން ފެންނަ ކަމަށް 69 މެންބަރުން ވޯޓު ދެއްވި އެވެ. އާސިފް ވަކިކުރަން 68 މެންބަރުން ވޯޓު ދެއްވި އެވެ. ދެ ބޭފުޅުން ވެސް ވަކިކުރަން ނުފެންނަ ކަމަށް އެމްޑީޕީގެ 10 މެންބަރުން ވޯޓު ދެއްވި އެވެ.

ޕީއެންސީގެ މެޖޯރިޓީ އޮންނަ ކޮމިޓީން ފާސްކުރި ގޮތާ ހިލާފަށް ޒާހިރު މަގާމުގައި ބަހައްޓަން ފާސްކުރީ 70 ވޯޓުންނެވެ.

މި ތިން ބޭފުޅުން ވަކިކުރުމުގެ މައްސަލަ ކޮމިޓީން ފާސްކުރި ގޮތުގެ ރިޕޯޓުގައިވާ ގޮތުން ނަޝާތާއި އާސިފާއި ޒާހިރަށް 19 ތުހުމަތެއް ކޮށްފައިވެ އެވެ. ތިން ބޭފުޅުންނަށް ގިނަ ތުހުމަތުތައް ނިސްބަތްވިއިރު، ޒާހިރު ވަކިނުކުރަން ސަރުކާރު ހިންގާ ޕީއެންސީގެ މެޖޯރިޓި އޮންނަ މަޖިލީހުން ނިންމި ސަބަބެއް ސާފެއްނުވެ އެވެ.

ރިޕޯޓުގައިވާ ތުހުމަތުކޮށްފައިވާ ގޮތުގައި، ފަހުގެ ރިޔާސީ އިންތިހާބުގައި އީސީގެ ޑޭޓާބޭސްއިން މައުލޫމާތު ނަގައިގެން ނަޝާތު އެޕްލިކޭޝަންތައް ހަދައި، އެ އެޕްލިކޭޝަންތައް ވިއްކައި ބައެއް ސިޔާސީ ޕާޓީތަކަށް ދީފައިވެ އެވެ. އަދި، ރިޔާސީ އިންތިހާބު ވަކި ޕާޓީއަކަށް ކާމިޔާބުކޮށްދިނުމަށް މި ތިން ބޭފުޅުން މަސައްކަތް ކޮށްފައިވާ ކަމަށް ވެސް ރިޕޯޓުގައި ތުހުމަތުކޮށްފައިވެ އެވެ.

މީގެ ކުރިން ވެސް ރިޔާސީ އިންތިހާބުގެ ރީރެޖިސްޓްރޭޝަންގައި މަކަރުހަދައި އޮޅުވާލުމުގެ އަމަލުތަކެއް ހިންގާފައިވާ ކަމަށާއި އީސީގައި ހުރި ދިވެހި ރައްޔިތުންގެ މައުލޫމާތު ވިއްކައިގެން ވެސް ނަޝާތާއި އާސިފް އަދި ޒާހިރު ނަފާ ހޯދާފައިވާ ކަމަށް ކަމަށް ރިޕޯޓުގައި ބުނެފައިވެ އެވެ.

ތިން ބޭފުޅުންނަށް ވަނީ ވަކި ސިޔާސީ ޕާޓީއެއް އުވާލުމުގެ މަގްސަދުގައި ވަގުފޯމު ހެދުމާއި އެ ޕާޓީއަށް 3،000 މެންބަރުން ހަމަވިޔަނުދޭން މަސައްކަތް ކޮށްފައިވާ ކަމަށް ވެސް ތުހުމަތުތަކުގެ ތެރޭގައިވެ އެވެ.